ރާއްޖެއާއި ސަރބިއާއާއި ދެމެދު ސީދާ ވައިގެ ދަތުރުފަތުރުކުރުމާއި، އިޤްތިޞާދާއި، ޑިޕްލޮމެޓިކް ތަޢުލީމީ ދާއިރާ ހިމެނޭހެން މުހިންމު 4 ދާއިރާއަކުން އެއްބަސްވުމުގައި ސޮއިކުރައްވައިފިއެވެ.
އެ އެއްބަސްވުމުގައި ސޮއިކުރައްވާފައިވަނީ ފޮރިން މިނިސްޓަރ ޢަބްދުﷲ ޝާހިދު ސަރބިއާއަށް ކުރައްވަމުން ގެންދަވާ ރަސްމީ ދަތުރުފުޅުގައެވެ.
ރާއްޖެއާއި ސަރބިއާ ދެމެދު ސޮއިކުރެއްވި އެއްބަސްވުންތައް
1- އިޤްތިޞާދީ އަދި ވިޔަފާރީގެ ދާއިރާއިން އެއްބާރުލުން އިތުރުކުރުމުގެ އެއްބަސްވުން
2- ވައިގެ ޚިދުމަތުގެ ދާއިރާއިން ގުޅުން ބަދަހިކުރުމުގެ އެއްބަސްވުން
3- ކުޅިވަރުގެ ދާއިރާއިން ދެޤައުމުގެ ދެމެދު ގުޅުން ޤާއިމްކުރުމުގެ އެއްބަސްވުން
4- ޑިޕްލޮމެޓިކް ތަޢުލީމުގެ ރޮނގުން ގުޅުން ބަދަހިކުރުމުގެ އެއްބަސްވުން
ރާއްޖެއާއި ސަރބިއާއި ދެމެދު ސޮއިކުރެއްވި އެއްބަސްވުންތަކާއި ގުޅޭގޮތުން ފޮރިން މިނިސްޓަރ ޢަބްދުﷲ ޝާހިދު ވިދާޅުވީ، އިޤްތިޞާދީ އަދި ވިޔަފާރީގެ ދާއިރާއިން އެއްބާރުލުން އިތުރުކުރުމަށްޓަކައި ދިވެހިރާއްޖެ އާއި ސަރބިއާއާ ދެމެދު ސޮއިކުރެއްވި އެއްބަސްވުމުގެ ސަބަބުން ރާއްޖޭގެ އެކްސްޕޯޓްތަކަށް އައު މާކެޓެއް ލިބި، ސަރބިއާއިން ރާއްޖޭގައި ކުރާ އިންވެސްޓްމަންޓްތައް އިތުރުކުރުމަށް މަގުފަހިވެގެންދާނެކަމަށެވެ.
ރާއްޖެއާއި ސާރބިއާއާ ދެމެދު ސޮއިކުރެއްވި ވައިގެ ޚިދުމަތުގެ އެއްބަސްވުމުގެ ސަބަބުން ދެ ޤައުމުގެ ދެމެދުގައި ސީދާ ވައިގެ ދަތުރުފަތުރުކުރުމަށް މަގުފަހިވެ، ރާއްޖޭގެ ފަތުރުވެރިކަމުގެ ސިނާޢަތަށް އިތުރު ކުރިއެރުމެއް ލިބިގެންދާނެކަމަށާއި، ކުޅިވަރުގެ ދާއިރާއިން ސޮއިކުރެއްވި އެއްބަސްވުމުގެ ސަބަބުން ދިވެހި އެތުލީޓުންނަށް ސާރބިއާގައި ތަމްރީނުވެ ތަޖުރިބާ ހޯދުމަށް އައު ދޮރުތަކެއް ހުޅުވި ދިވެހި ޒުވާނުންނަށް ކުޅިވަރުގެ ރޮނގުން އިތުރު ފުރުސަތުތައް ފަހިވެގެންދާނެކަމަށް ފޮރިން މިނިސްޓަރ ވިދާޅުވިއެވެ.
މީގެ އިތުރުން ރާއްޖޭގެ މިނިސްޓްރީ އޮފް ފޮރިން އެފެއާޒްއާއި ސަރބިއާގެ މިނިސްޓްރީ އޮފް ފޮރިން އެފެއާޒްއާއި ދެމެދު ޑިޕްލޮމެޓިކް ތަޢުލީމުގެ ރޮނގުން ސޮއިކުރެއްވި އެއްބަސްވުމަކީ ދެ ޤައުމުގެ ޚާރިޖީ ގުޅުން އިތުރަށް ހަރުދަނާވެ ދެ ޤައުމުގެ ފޮރިން ސަރވިސް އޮފިސަރުންނަށް ތަމްރީނާއި ތަޖުރިބާ ލިބިގެންދާނޭ ފުރުސަތެއްކަމަށް ފޮރިން މިނިސްޓަރ ވިދާޅުވިއެވެ.
Delighted to meet with Foreign Minister Ivica Dačić of #Serbia.
— Abdulla Shahid (@abdulla_shahid) May 9, 2023
We discussed extensively on human resource development, sports coopoeration, promoting trade ties and tourism, and multilateral cooperation.
Confident that ?? - ?? relations will reach new heights. pic.twitter.com/MFuUXfue6G
ފޮރިން މިނިސްޓަރ ސަރބިއާއަށް ކުރައްވަމުން ގެންދަވާ ދަތުރުފުޅުގައި ވަނީ ސާރބިއާގެ ފޮރިން މިނިސްޓަރ އިވިކާ ޑާޗިޗް އައިވެސް ބައްދަލުކުރައްވާ ދެޤައުމުގެ ދެމެދު ރަސްމީ މަޝްވަރާތައް ބާއްވަވާފައެވެ.
އެ މަޝްވަރާތަކާއި ގުޅޭގޮތުން ފޮރިން މިނިސްޓަރ ޢަބްދުﷲ ޝާހިދު ވިދާޅުވީ، އިންސާނީ ވަޞީލަތް ތަރައްޤީކުރުމަށާއި، ކުޅިވަރުގެ ދާއިރާއިން އެއްބާރުލުން އިތުރުކުރުމާއި، ވިޔަފާރީގެ ގުޅުންތައް ހަރުދަނާކުރުމާއި ފަތުރުވެރިކަން ކުރިއެރުވުމާ ގުޅޭގޮތުން މަޝްވަރާކުރެއްވިކަމަށެވެ. އަދި ބައިނަލްއަޤްވާމީ މަސްރަހުގައި އެއްބާރުލުން އިތުރުކުރުމާ ގުޅޭގޮތުންވެސް މަޝްވަރާކުރެއްވިކަމަށް މިނިސްޓަރ ވިދާޅުވިއެވެ. އަދި މި ދަތުރުފުޅުގެ ސަބަބުން ރާއްޖެއާއި ސާރބިއާއާއި ދެމެދު އޮތް ގުޅުން އިތުރަށް ބަދަހިވެގެންދާނެކަމަށް ޔަގީންކުރައްވާކަމަށްވެސް މިނިސްޓަރ ވިދާޅުވިއެވެ.