ސިވިލް ކޯޓުގެ އިސްޤާޟީ ކަމަށާއި، ކްރިމިނަލް ކޯޓުގެ އިސްޤާޟީކަމަށް ބޭފުޅުން އައްޔަންކުރައްވައިފިއެވެ.
ޖުޑީޝަލް ސާރވިސް ކޮމިޝަން، ޖޭއެސްސީން ވިދާޅުވީ، ސިވިލް ކޯޓުގެ އިސްޤާޟީ ކަމަށް އެކޯޓުގެ ޤާޟީކަމުގައި ހުންނެވި ޅ.ހިންނަވަރު، މާތިލަ، އަލްއުސްތާޛު އާދަމް މުޙައްމަދު އައްޔަނު ކުރައްވާފައިވާކަށެވެ. އަދި ކްރިމިނަލް ކޯޓުގެ އިސްޤާޟީކަމަށް އެކޯޓުގެ ޤާޟީ ގއ.މާމެންދޫ، ފެހިގެ، އަލްއުސްތާޛު އަޙްމަދު ނިމާލް ޖުނައިދު އައްޔަނު ކުރައްވާފައިވާކަމަށް ޖޭއެސްސީން ވިދާޅުވިއެވެ.
ޤާޟީ ކަމަށް އައްޔަންކުރެއްވި ބޭފުޅުންނަށް މަޤާމުގެ ފަތްކޮޅު އަރުވާފައިވަނީ ޖޭއެސްސީގައި ބޭއްވި ރަސްމިއްޔާތެއްގައި އެ ކޮމިޝަންގެ ރައީސް އަލްއުސްތާޛާ ޙިސާން ޙުސައިންއެވެ.
ސިވިލް ކޯޓަށް ޤާޟީއަކު އައްޔަންކުރައްވާފައި މިވަނީ ކުރިން އެކޯޓުގެ އިސް ޤާޟީކަމުގެ މަޤާމުގައި ހުންނެވި ޢަބްދުﷲ ޢަލީ ރިޓަޔަރ ކުރެއްވުމުންނެވެ. އަދި ކްރިމިނަލް ކޯޓަށް ޤާޟީއަކު އައްޔަނުމިކުރެއްވީ އެކޯޓުގެ އިސް ޤާޟީކަމުގެ މަޤާމުގައި ކުރިން ހުންނެވި އަޙްމަދު ޝަކީލް ހައި ކޯޓުގެ ފަނޑިޔާރުކަމަށް އައްޔަންކުރެއްވުމާއި ގުޅިގެން، މަޤާމު ހުސްވުމުންނެވެ.