ބްރިޖްގެ މަސައްކަތް ނިންމުމަށް އެފްކޮންސަށް ދީފައިވާ ތާރީޚު ފަސްކޮށްފައި ނުވާކަމަށް މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ. މިނިސްޓަރ މިހެން ވިދާޅުވީ، މަޖިލީހުގައި ނައިފަރު ދާއިރާގެ މެންބަރު ޝިޔާމް ކުރެއްވި ސުވާލަކަށް ޖަވާބުދެއްވަމުންނެވެ.
ޝިޔާމް އައްސަވާފައިވަނީ، ބްރިޖްގެ މަސައްކަތް ނިންމުމަށް ކަނޑައަޅާފައިވާ ތާރީޚު ކިތައް ފަހަރު ފަސްކޮށްފައިވޭތޯ އާއި، އެފްކޮންސް ވިއްކާލުމުން ރާއްޖޭގެ މަޝްރޫޢުތަކަށް ކުރާނެ އަސަރާ ގުޅޭގޮތުންނެވެ.
މިނިސްޓަރ އަސްލަމް ވިދާޅުވީ އެފްކޮންސްގެ މައި ކުންފުނިން އެ ކުންފުނި ވިއްކާލިނަމަވެސް އެކަމުގައި ރާއްޖޭގައި ކުރިއަށްގެންދާ މަޝްރޫޢުތަކަށް އަސަރު ކުރާނެ ސަބަބެއް ނެތްކަމަށެވެ. ގްރޭޓަރ މާލެ ކަނެކްޓިވިޓީ ބްރިޖާއި، އައްޑޫ ސިޓީގެ މަގު ހެދުންވެސް ކުރިއަށްގެންދަނީ އިންޑިއާގެ އެފްކޮންސް ކުންފުނިންނެވެ. މިއީ 9 ބިލިއަނަށްވުރެ ގިނަ ރުފިޔާގެ މަޝްރޫޢުކެވެ.
މިނިސްޓަރ ވިދާޅުވީ ބޮޑެތި ކުންފުނިތަކުން ކުންފުނީގެ ޙިއްޞާ ވިއްކުމަކީ ކުރަމުން އަންނަ ކަމެއްކަމަށެވެ. ނަމަވެސް އެފްކޮންސް ވިއްކާލިނަމަވެސް ރާއްޖޭގެ މަޝްރޫޢުތަކަށް އަސަރު ނުކުރާނެކަމުގެ ޔަގީންކަންދެއްވާ ކަމަށާއި، ޕްރޮޖެކްޓްގެ ކޮންޓްރެކްޓް މިހާރު އޮތްގޮތަށް، މަސައްކަތްތައް ކުރިއަށްދާނެކަމަށެވެ.
ޕްރޮޖެކްޓްގެ ކޮންޓްރެކްޓްކުރެވިފައިވާ ތާރީޚާ ގުޅޭގޮތުން ޝިޔާމް ކުރެއްވި ސުވާލަށް މިނިސްޓަރ ވިދާޅުވީ، ޕްރޮޖެކްޓްގެ ކޮންޓްރެކްޓަށް އެއްވެސް ބަދަލެއް ގެނެސްފައި ނުވާކަމަށެވެ. އަދި ޕްރޮޖެކްޓްގެ މުއްދަތު އިތުރުކުރުމުގެ އެއްވެސް އެެއްބަސްވުމެއް ހަދާފައި ނޯންނާނެ ކަމަށެވެ.
"އެއްވެސް ތާރީޚެއް ކޮންޓްރެކްޓަރަށް އިތުރުކުރި ހަނދާނެއް ނުވޭ. ކޮންޓްރެކްޓް އޮތީ ފުރަތަމަވެސް ހެދި ތާރީޚުތަަކަށް. އިތުރަށް ވަގުތު އިތުރުކޮށް އެކްސްޓެންޝަންއެއް ދީފައެއް ނުވާނެ. ނަމަވެސް ކޮންޓްރެކްޓަރަށް ކްލެއިމް ކުރެވިދާނެ ކަމެއް ހުރެދާނެ. އެ ޙާލަތުގައި ގޮތް ނިންމާނީ އިންޖިނިއަރުންގެ އެހީގައި." މިނިސްޓަރ ވިދާޅުވިއެވެ.
ގްރޭޓަރ މާލެ ކަނެކްޓިވިޓީ ބްރިޖްގެ މަސައްކަތްތައް ބާރު ސްޕީޑްގައި ދަނީ ކުރިއަށެވެ. އެފްކޮންސްއާއެކު ކޮންޓްރެކްޓް ހަދާފައިވަނީ މިއަހަރުގެ ނިޔަލަށް، މާލެއިން ގުޅީފަޅާ ހަމައަށް ގުޅާލުމަށެވެ. އަދި އަންނަ އަހަރުގެ ނިޔަލަށް، ތިލަފުށްޓާ ހަމައަށް ބްރިޖްގެ މަސައްކަތް ނިންމުމަށެވެ.
ބްރިޖްގެ ތަނބުތަކުގެ މަސައްކަތާއެކު، ބްރިޖްގެ ޑެކްގެ މަސައްކަތްތައްވެސް އަންނަނީ ކުރަމުންނެވެ.
މުޅި މިމަޝްރޫޢަކީ 500 މިލިއަން ޑޮލަރުގެ މަޝްރޫޢެކެވެ.