ޚިދުމަތް ދޭ ފަރާތަކުން އެންގިނަމަވެސް، މަގުތަކަށް ކުނި ކޮތަޅުތައް ނެރެފައި ނުބެހެއްޓުމަށް އެންވަޔަރަމަންޓަލް ޕްރޮޓެކްޝަން އެޖެންސީ، އީޕީއޭއިން އަންގައިފިއެވެ.
މާލޭގައި މަގުތަކަށް ކުނި ނެރެ ޖަމާކޮށްފައި ބަހައްޓާ މައްސަލައިގައި ކަންބޮޑުވުން ފާޅުކޮށް އީޕީއޭއިން ނެރުނު ބަޔާނުގައި ބުނީ މިހާރަކަށް އައިސް މާލޭ ސަރަހައްދުގެ މަގުތަކަށާއި، ގޭދޮރުމައްޗަށް ކުނިނެރެފައި ބެހެއްޓުމާއި ކުނި ޖަމާކުރަމުން ދިޔުން ވަރަށް ބޮޑަށް އިތުރުވެފައިވާކަމަށެވެ. މީގެ ސަބަބުން މަގުތައް ހަޑިވުމާއި، ހިނގާބިނގާވެ އުޅޭމީހުންނާއި ދުއްވާ މީހުންނަށްވެސް އޭގެ އުނދަގޫ ވަރަށް ބޮޑަށް ކުރިމަތިވަމުންދާކަންވެސް އީޕީއޭގެ ބަޔާނުގައި ފާހަގަކޮށްފައިވެއެވެ.
އީޕީއޭއިން ބުނީ މާލެ ސަރަހައްދުގެ މަގުތަކަކީ ކާރު ބާރުބޮޑު އަދި ހަނި މަގުތަކަކަށްވުމުން މިގޮތަށް ކުނި ނެރެފައި ބެހެއްޓުމުން ތަފާތު އެކި އުނދަގޫތަކާއި ކުރިމަތިލާންޖެހި މަގުތަކުގެ ސާފުތާހިރުކަން ގެއްލި މަގުތައް ގޮނޑުވަމުންދާކަމަށެވެ.
އީޕީއޭގެ ބަޔާނުގައި ކުނި ނެގުމުގެ ޚިދުމަތް ދޭ ފަރާތުން އައިސް ކުނި ނަގާނެކަމަށް ބަލައިގެން ގެއިން ބޭރުގައި ކުނި ބެހެއްޓުމާއި، ކުނި ނަގާ ގަޑިއަށް ބެލުމެއް ނެތި ކުނި މަގުތަކަށް ނެރުންފަދަ ކަންކަން ފާހަގަވެފައިވާކަމަށެވެ. އަދި އެކިއެކި މަސައްކަތްކުރާ ތަންތަނުން ކުނި ނެރެ މަގުތަކަށް ޖަމާކުރުމާއި، ބަލްކު ކުނި އުކައިދޭ އަގުބޮޑުކަމަށް ބުނެ މަގުތަކާއި ކަންކަންމައްޗަށް ކުނި އަޅާފައި ބަހައްޓާކަންވެސް ފާހަގަކުރެވިފައިވާކަމަށް އީޕީއޭއިން ބުނެއެވެ.
އީޕީއޭއިން ބުނީ ކުނި ނެގުމުގެ ޚިދުމަތްދޭ ފަރާތްތަކުން ކުނިގެންދާ ވެހިކަލްތަކަށް ކުނި އެޅުމުގެ ބޭނުމަށް ކަންކަންމައްޗަށާއި މަގުތަކުގެ އެކި ތަންތަނަށް ކުނި އަޅާފައި ބަހައްޓާކަން ފާހަގަކުރެވިފައިވާކަމަށެވެ.
މީގެއިތުރުން ކުނި އުކާލުމުގެ ޚިދުމަތްދޭ ފަރާތަކުންވެސް މަގުމައްޗަށް ކުނި ނެރުމަށް އަންގައިގެން ނުވާނެކަމަށެވެ. އަދި އެގޮތަށް އެންގިނަމަވެސް، ކުނި ކޮތަޅުތައް މަގުމަތީގައި ބަހައްޓައިގެން ނުވާނެކަމަށް އީޕީއޭއިން ބުނެއެވެ.
އީޕީއޭގެ ވާހަކަތަކާއި ގުޅިގެން ވެމްކޯއިން ބުނީ ކުނި ނެރެ މަގުމަތީގައި ބެހެއްޓުމަށް ކަސްޓަމަރުންނަަށް އަންގާފައި ނުވާނެކަމަށެވެ. އަދި ވެމްކޯގެ މުވައްޒަފުން ކުނި ނަގަމުންދާނީ ގޭގެއަށް ވަދެގެންކަމަށާއި ބައެއް ކަސްޓަމަރުން މިގޮތަށް ކުނި ނެރެ މަގުމަތީގައި ބަހައްޓަމުންދާތީ، އެކަން އެގޮތަށް ނުކުރުމަށް އަންގާކަމަށްވެސް ވެމްކޯއިން ބުނެއެވެ.