ތިމާވެއްޓާއި ރައްޓެހި ޓެކްނޮލޮޖީއަށް އިންވެސްޓްކުރުމަށް ހިތްވަރުދިނުމުގެ ގޮތުން ބޭންކް އޮފް މޯލްޑިވްސް، ބީއެމްއެލުން "ގްރީން ލޯން" ތައާރަފްކޮށްފިއެވެ.
މިދިޔަ ޑިސެމްބަރ މަހު ބޭންކުން ޤާއިމުކުރި ބީއެމްއެލް ގްރީން ފަންޑްގެ ދަށުން މިއަދު މި ލޯނު ތަޢާރަފްކޮށްދެއްވީ ވ.ފެލިދޫގައި ބޭއްވި ރަސްމިއްޔާތެއްގައި މިނިސްޓަރ އޮފް އެންވަޔަރަމަންޓް އެންޑް އެނަރޖީ ތާރިޤް އިބްރާހީމެވެ. މި ލޯން ތައާރަފްކޮށްފައިމިވަނީ އިޔާދަކުރެނެވި ހަކަތައިން ހިންގޭގޮތަށް ރާއްޖޭގައި ފުރަތަމަ ހުޅުވުނު ބީއެމްއެލްގެ ފެލިދޫ ބްރާންޗް ހުޅުވުމުގެ ރަސްމިއްޔާތުގެ ތެރެއިންނެވެ.
ބީއެމްއެލުން ބުނީ ގްރީން ލޯން މެދުވެރިކޮށް ބޭނުންވާ ހަކަތަ އުފެއްދުމަށް ސޯލާ ފެނަލް، ފޮޓޯވޮލްޓެކް ޕެނަލް އަދި ސިސްޓަމް ނުވަތަ ހަކަތަ ވީހާވެސް ބޭނުންތެރިކޮށް ހިފުމަށްޓަކައި ބޭނުންކުރެވިދާނެ އާލަތްތައް ހޯދުން ފަދަ ތިމާވެއްޓާ ރައްޓެހި ޓެކްނޮލޮޖީ އަށް ފައިނޭސް ކުރުމުގެ ފުރުސަތު އަމިއްލަ ފަރުދުންނާއި ވިޔަފާރިތަކަށް ލިބޭނެ ކަމަށެވެ. ގްރީން ލޯން މެދުވެރިކޮށް 50،000 ރުފިޔާއިން ފެށިގެން 20 މިލިއަން ރުފިޔާ އާ ހަމަޔަށް ލޯނު ލިބޭއިރު، ލޯނު އަނބުރާ ދެއްކުމަށް 20 އަހަރުގެ މުއްދަތެއް ލިބިގެންދާނެއެވެ.
އިމާރާތާއި ގޯތި އަދި ކަނޑުގައި ދުއްވާ އުޅަނދުފަހަރުގެ އިތުރުން ލޯނުގެ ގޮތުގައި ނަގާ ފައިސާއިން ހޯދާ ތަކެތި ނުވަތަ އާލާތްވެސް ރަހުނުގެ ގޮތުގައި ބެހެއްޓިދާނެ ކަމަށް ބީއެމްއެލުން ބުނެއެވެ. މިދިޔަ ޑިސެމްބަރ މަހު ޕެރިހުގައި ނިމިގެންދިޔަ ތިމާވެށްޓާއި ބެހޭ ސަމިޓަށްފަހު، ބީއެމްއެލް އާއި މިނިސްޓަރީ އޮފް އެންވަރަޔަމަންޓާ ގުޅިގެން ބީއެމްއެލް ގްރީން ފަންޑް ގެ ނަމުގައި ވަނީ ފަސް ފަތޭކަ މިލިއަން ރުފިޔާގެ ފަންޑެއް އިފްތިތާހުކޮށްފައެވެ.