ގޭންގުތައް ހުއްޓުވަން ފުލުހުންގެ ޚާއްޞަ ޑިޕާޓްމަންޓެއް: މީހުން ހުއްޓުވައި، ފޮޓޯނަގައި ސުވާލުކުރާނެ

ގޭންގު މާރާމާރީތައް ހުއްޓުވުމަށް ފުލުހުންގެ ޚާއްޞަ ޑިޕާޓްމެންޓެއް އުފައްދައި މަސައްކަތްކުރަމުން އަންނަކަމަށާއި، ޤާނޫނުން ލާޒިމް ނުކުރާ ތަންތަނުގައި ހެލްމެޓު އަޅާއިގެން އުޅޭ މީހުން ހުއްޓުވައި ފޮޓޯނަގައި ސުވާލުކުރަމުން ދާނެކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.

ކޮމިޝަނަރ އޮފް ޕޮލިސް މިހެން ވިދާޅުވީ މާލޭގައި ސިލްސިލާ މާރާމާރީތަކެއް ހިންގަމުން އަންނާތީ އެކަން ހުއްޓުވުމަށް ކުރާ މަސައްކަތްތަކާއި ގުޅޭގޮތުން ވާހަކަފުޅު ދައްކަވަމުންނެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވީ މިހާރު މާލޭގައި ހިންގަމުން އަންނަ މާރާމާރީތަކަކީ މިދިޔަ ޖެނުއަރީމަހުގެ 16 އިން ފެށިގެން ސިލްސިލާކޮށް ހިންގަމުން އަންނަ މާރާމާރިތަކެއްކަމަށެވެ. ގޭންގުތަކުން އެ މާރާމާރީތައް ހިންގަނީ، ހެލްމެޓު އެޅުން ލާޒިމް ނޫންތަންތަނުގައި ހެލްމެޓު އަޅައި މޫނު ނިވާކޮށްގެންކަމަށް ޙަމީދު ވިދާޅުވިއެވެ. ހެލްމެޓު އަޅަން ޖެހެނީ 30 ކިލޯމީޓަރަށްވުރެ ބާރަށް ދުއްވަންޖެހޭ ސަރަހައްދުތަކުގައިކަން ފާހަގަކުރައްވާ ޙަމީދު ވިދާޅުވި ހަނި ގޯޅިތަކުގައާއި ފިހާރަފަދަ ތަންތަނަށް ހެލްމެޓު އަޅައިގެން ކާކުކަން ނޭގޭގޮތަށް ގޭންގުތަކުގެ މީހުން ވަންނަކަން ފާހަގަކުރެވޭކަމަށެވެ.

މި މާރާމާރީތައް ހުއްޓުވުމަށް ފުލުހުން ޚާއްޞަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވަމުން ސީޕީ ހަމީދު ވިދާޅުވީ، ހެލްމެޓު އެޅުން ލާޒިމް ނޫންތަނުގައި ހެލްމެޓު އަޅާއިގެން އުޅޭ މީހުން ހުއްޓުވައި ފުލުހުން ފޮޓޯ ނަގަައި ސުވާލުކުރަމުން ދާނެކަމަށެވެ. އަދި މާރާމާރިތައް ހުއްޓުވުމަށް ހައިވިޒިބިލިޓީ ޕޮލިސިން ޑިޕާޓްމަންޓް ނަމުގައި ޚާއްޞާ ޑިޕާޓްމަންޓެއްވެސް މިހާރު މަސައްކަތްކުރާކަމަށް ޙަމީދު ވިދާޅުވިއެވެ.

"ޢާންމުކޮށް މާލެތެރޭގެ އެތެރެވަރީގެ މަގުތަކުގައި ހެލްމެޓު އަޅާއިގެން އުޅޭ މީހުން ހުއްޓުވައި ފޮޓޯ ނަގާނެ. އަދި އިތުރު ފިޔަވަޅުތަކެއްވެސް އަޅަމުން މިދަނީ. ގޭންގުތައް ހުއްޓުވަން ކުރާ މަސައްކަތްތައް އިތުރުކުރާނެ. މިހާރު އެކަމަށްވެސް ޚާއްޞަކޮށްގެންވެސް ފުލުހުން އެބަ ހަރަކާތްތެރިވޭ ފުދޭވަރަކަށް ވަރުގަދަ ޓީމެއް. ހައިވިޒިބިލިޓީ ޕޮލިސިން ޑިޕާޓްމަންޓް ނަމުގައި އެޓީމުގެ ދަށުން މަސައްކަތްތަކެއް އެބަކުރޭ." ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވިއެވެ.

ހަމީދު ވިދާޅުވީ، މާލޭގައި ގޭންގުތަކުން ހަރަކާތްތެރިވާ ގޮތާއި އުކުޅުތަކަށްވެސް ބަދަލުތަކެއް އައިސްފައިވާކަމަށެވެ. އެގޮތުން ގޭންގުތަކުން ހަމަލާދެނީ ބައި ހަދައިގެން ދިއުމުގެ ބަދަލުގައި އެކަކު ނުވަތަ ދެމީހަކުވެގެންކަމަށްވެސް ޙަމީދު ވިދާޅުވިއެވެ.

" ވަރަށް ރާވައިގެން ދުރުދުރުގައި ތިބެގެން، ބައިގަނޑެއްގެ ގޮތުގައި އޮޕަރޭޓްނުކޮށް، އެމީހަކު މިސާލަކަށް ރައިވަލް ގޭންގެއްގެ މީހަކަށް ޓާގެޓްކޮށްގެން މިވެނި ތަނެއްގައި ހުރިކަން އައިޑެންޓިފައިކުރެވުނީމަ، އެކާކުތޯ ބަލާފަ އެމީހަކު ހުރިތަނަކަށްގޮސްފަ އެމީހަކު އަތުގަ އޮންނަ ވަޅިއަކުން ނުވަތަ އެހެން ހަތިޔާރަކުން ދެމީހުން ނުވަތަ އެކަކު ގޮސްފަ މި ހަމަލާއެއް ދެނީ. އެހެންދާއިރު ފިހާރައެއްގެތެރޭ ހުރުން ނުވަތަ ޕަބްލިކް އެހެންތަނެއްގަ ހުރުން އެއީ މިވާގޮތަކީ. މިކަމުގަ ޖެހޭނީ އެމީހުންގެ މައްޗަށް ހެކި ހޯދައި އެމީހުންނަކީ ކޮންބައެއްކަން ދެނެގަނެވި އެކަންކަމުގެ ތެރެއިން ފިޔަވަޅު އެޅޭނީ." ހަމީދު ވިދާޅުވިއެވެ.

ސީޕީ ޙަމީދު މިހެން ވިދާޅުވެފައިވާއިރު، ފާއިތުވި ދެތިން ދުވަހު މާލޭގައި ވަނީ ނުރައްކާތެރި މާރާމާރިތަކެއް ހިންގާ ބައެއް މީހުން ޒަޚަމްކޮށްލާފައެވެ. އެގޮތުން ހުޅުމާލޭގައި ހިންގާ ކެފޭއަކަށް ހެލްމެޓު އަޅައިގެން ތިބި ދެމީހުން ވަދެ އެތަނަށް ގެއްލުންތަކެއް ދީފައިވެއެވެ. އަދި ހެލްމެޓު އަޅައިގެން ތިބި ބަޔަކު މާލޭގެ ފިހާރައަކަށްވަދެ ތޫނު އެއްޗަކުން ހަމަލާދީ މީހަކު ޒަޚަމްކޮށްލާފައިވާއިރު އެ މައްސަލައާ ގުޅިގެން މީހަކު ވަނީ ހައްޔަރުކޮށްފައެވެ. މީގެ އިތުރުން މިދިޔަ މަހުން ފެށިގެން ހިންގަމުން އަންނަ ސިލްސިލާ މާރާމާރީތަކާއި ގުޅިގެން 16 މީހަކު މިހާތަނަށް ހައްޔަރުކޮށްފައިވާކަމަށްވެސް ކޮމިޝަނަރ އޮފް ޕޮލިސް ވިދާޅުވިއެވެ.