ރިޔާސީ އިންތިޚާބުގެ ފުރަތަމަ ބުރުގައި ޖުމްހޫރީ ޕާޓީގެ ރިޔާސީ ކެނޑިޑޭޓެއް ވާދަކުރުމަށް ނުވަތަ ޖުމްހޫރީ ޕާޓީ އިސްވެ އުފައްދާ ކޯލިޝަނަކުން ރިޔާސީ އިންތިޚާބުގައި ވާދަކުރުމަށް ގޮވާލާ ޤަރާރު އެޕާޓީގެ ކޮންގްރެސް އިން ފާސްކޮށްފިއެވެ. އެ ޤަރާރު ފާސްވީ ކޮންގްރެސްގައި އެވަގުތު ބައިވެރިވެވަޑައިގެންނެވި 416 މެންބަރުންގެ އިއްތިފާޤުންނެވެ.
ޖޭޕީން ރިޔާސީ އިންތިޚާބުގައި ވާދަކުރާނެ ގޮތެއް ކަނޑައެޅުމަށް އެޕާޓީގެ ކޮންގްރެސްއަށް ޤަރާރު ހުށައެޅުއްވީ ތިނަދޫ އުތުރު ދާއިރާގެ ކުރީގެ މަޖިލިސް މެންބަރު އަދި ޖޭޕީގެ ކައުންސިލް މެންބަރު ޢަބްދުﷲ އަޙްމަދެވެ. އެ ޤަރާރަށް ތާޢީދުކުރެއްވީ ކުރީގެ މަޖިލިސް މެންބަރު ޢަލީ ޝާހެވެ.
ކައުންސިލް މެންބަރު ޢަބްދުﷲ ހުށައެޅުއްވި ޤަރާރުގައި ވަނީ މިއީ ޖުމްހޫރީ ޕާޓީގެ ވެރިކަމެއް ޤާއިމްކޮށް ރައްޔިތުންނަށް ޚިދުމަތްކުރަން އެންމެ ފަހި ފުރުޞަތުކަމަށް ވިދާޅުވެފައެވެ. ރައްޔިތުން މާލީގޮތުން ބާރުވެރިކޮށް، މިނިވަން އިޤްތިޞާދެއް އަދި އިޖްތިމާޢީ ހަމަޖެހުން ޤާއިމްކުރުމަށް ޖުމްހޫރީ ޕާޓީން އިންތިޚާބުގައި ވާދަކުރަން ނުވަތަ އެޕާޓީ އިސްވެ އުފައްދާ ކޯލިޝަނަކުން އިންތިޚާބުގައި ވާދަކުރުމަށް އެ ޤަރާރުގައި ގޮވާލާފައިވެއެވެ.
މި ޤަރާރަށް ބަހުސްކުރުމަށް ހުޅުވާލި ރިޔާސަތު ބެލެހެއްޓެވީ ޖޭޕީގެ ލީޑަރު ޤާސިމް އިބްރާހީމެވެ. ގަޑިއެއްހާއިރަށް ދެމިގެންދިޔަ މިބަހުސްގައި ވާހަކަފުޅު ދެއްކެވި ގިިނަ މެންބަރުން ވަނީ ޖުމްހޫރީ ޕާޓީގެ ކެނޑިޑޭޓެއް ރިޔާސީ އިންތިޚާބުގައި ވާދަކުރުމަށް ތާޢީދުކުރައްވާ ވާހަކަފުޅު ދައްކަވާފައެވެ.
"...ރާއްޖޭގައި ދިރިއުޅޭ އެންމެހާ ރައްޔިތުންނަކީ މާލީގޮތުން މިނިވަން، އިޤްތިޞާދީ ހަމަޖެހުމާ، އިޖްތިމާޢީ ހަމަޖެހުން ޤާއިމްވެފައިވާ، ފަހި ދިރިއުޅުމަކަށް މަގުފަހިވެފައިވާ، ތަޢުލީމީ އަދި އުފެއްދުންތެރި ބަޔަކަށް ހަދަން، ޢުމްރާނީގޮތުން ތަރައްޤީ، އަސާސި ޚިދުމަތްތައް ތިޔާގި، ޒަމާނީ ތަހްޒީބީ އިންތިޒާމްތަކަކުން ތަރުތީބުވެފައިވާ ބަޔަކަށް ހެދުމުގެ އުއްމީދުގައި މިހިނގާ 2023ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރުގައި ޖުމްހޫރީ ޕާޓިގެ ރިޔާސީ ކެނޑިޑޭޓެއް ވާދަކުރުމަށް ނުވަތަ ޖުމްހޫރީ ޕާޓީ އިސްވެ އުފައްދާ ކޯލިޝަނަކުން ރިޔާސީ އިންތިޚާބުގައި ވާދަކުރުމަށް ކައުންސިލަށް އިލްތިމާސްކޮށް ޕާޓީގެ ޤައުމީ ކޮންފަރެންސްއަށް ހުށައަޅަމެވެ." ޢަބްދުﷲ ހުށައެޅުއްވި ޤަރާރުގައިވެއެވެ.
ރިޔާސީ އިންތިޚާބުގައި ވާދަކުރުމަށް ޖުމްހޫރީ ޕާޓީގެ ކޮންގްރެސްއިން ފާސްކުރިނަމަވެސް، މިއީ އެޕާޓީގެ ކައުންސިލަށް ދިން ލަފައެކެވެ. އެކަމުގައި އިތުރަށް ކުރަންޖެހޭ ކަންކަން ކުރިއަށްގެންދާނީ އެޕާޓީގެ ކައުންސިލުންނެވެ.
ޖޭޕީއަކީ މިހާރުގެ ސަރުކާރުގެ ކޯލިޝަން ބައިވެރިއެއްވެސްމެއެވެ. ކުރިއަށް އޮތް ރިޔާސީ އިންތިޚާބުގައި ވާދަކުރައްވާ އެމްޑީޕީގެ ކެނޑިޑޭޓުގެ ހައިސިއްޔަތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، އިންތިޚާބުގައި ވާދަކުރަން ކޯލިޝަން ހެދުމުގެ ދަޢުވަތު ޖުމްހޫރީ ޕާޓީއަށްވެސް ދެއްވާފައެވެ. މީގެ އިތުރުން ޢަދާލަތު ޕާޓީއާއި، އެމްއާރުއެމާއި އެމްޑީއޭއަށްވެސް ރައީސުލްޖުމްހޫރިއްޔާ އެ ދަޢުވަތު ދެއްވިއެވެ. މިހާތަނަށް އެމްޑީޕީއާއެކު ކޯލިޝަން ހަދަން ނިންމާފައިވަނީ ޢަދާލަތު ޕާޓީއާއި، އެމްޑީއޭއިންނެވެ.