އެލައިޑް އިންޝުއަރެންސްއިން މާލެ ސަރަހައްދުގެ ގެސްޓް ހައުސްތަކަށް ޚާއްސަކޮށްގެން ހަރަކާތެއް ކުރިއަށް ގެންގޮސްފިއެވެ.
މާފުށީގައި މިހަރަކާތަކީ އެލައިޑް އިންޝުއަރަންސް ކުންފުނީގެ އިސްލާމިކް ވިންޑޯ، އަޔާދީ ތަކާފުލްގެ ދަށުން ކުރިއަށްގެންދިޔަ ހަރަކާތެކެވެ.
މިހަރަކާތުގެ މަޤްސަދަކީ ގެސްޓްހައުސްތަކާއި އޮތް ގުޅުން އިތުރަށް ވަރުގަދަކޮށް އެފަރާތްތަކަށް އިންޝުއަރަންސްގެ ފައިދާ ލިބިގަނެވޭނެ ގޮތްތަކާއި ބެހޭގޮތުން މަޝްވަރާކޮށް ޚިޔާލު ހޯދުން ކަމަށް އެލައިޑުން ބުނެއެވެ.
މިހަރަކާތުގެ ތެރެއިން ސޯޝަލް މީޑިޔާގައި ގެސްޓްހައުސް ވިޔަފާރި ޕްރޮމޯޓުކޮށް، އިތުރު ދޮރުތައް ހުޅުވޭނެ އުކުޅުތަކާއި ބެހޭގޮތުން އެލައިޑް އިންޝުއަރަންސް ކުންފުނީގެ ސީސީއޯ ޔޫލިއަނާ ރުސޭއި ވަނީ މުހިންމު މައުލޫމާތުތަކެއް ހިއްސާކުރައްވާފައެވެ.
އެލައިޑްގެ އިސްލާމިކް ވިންޑޯ, އަޔާދީއިން ދަނީ މިހާރުވެސް "ގެސްޓްހައުސް ތަކާފުލް"ގެ ނަމުގައި ގިނަ ކަވަރޭޖްތަކެއް ހިމެނޭ ޕްލޭންތަކެއް ފޯރުކޮށްދެމުންނެވެ. މިޚިދުމަތް ފޯރުކޮށްދެނީ 3 ގިންތިއަކަށް ބަހާލައިގެންނެވެ.
މާލެ ސަރަހައްދަކީ ރާއްޖޭގައި އެންމެ ފުޅާ ދާއިރާއެއްގައި ގެސްޓަ ހައުސް ވިޔަފާރި ކުރާ އެއް ސަރަހައްދެވެ. ރަށުގެ ގެސްޓްހައުސް ވިޔަފާރިކުރާ ފަރާތްތަކުގެ ގެސްޓްހައުސް ވިޔަފާރިއާއިއެކު މުޅި ރަށުގެ ފުދުންތެރިކަން އިތުރުވެފައިވާ ކަމަށް ރައްޔިތުން ޤަބޫލުކުރެއެވެ.