ޤާނޫނީ ވަކީލުން ކުރައްވާ މަސައްކަތާއި، ދެއްވާ ޚިދުމަތަށް ގަބޫލުކުރެވޭ ފީއެއް ނެގި ކަމުގައިވިޔަސް، އަބަދުވެސް އިންސާފަށްވުރެ ފައިސާ އިސްނުކުރުމަށް އުއްތަމަ ފަނޑިޔާރު އަޙްމަދު މުޢުތަޞިމް ޢަދުނާން އިލްތިމާސް ކުރައްވައިފިއެވެ.
ދިވެހިރާއްޖޭގެ ބާ ކައުންސިލުގެ ފަރާތުން ބޭއްވި ރާއްޖޭގައި ޤާނޫނީ ވަކީލެއްގެ ހައިސިއްޔަތުން މަސައްކަތްކުރުމުގެ ހުއްދަދިނުމުގެ ރަސްމިއްޔާތުގައި ވާހަކަފުޅު ދައްކަވަމުން އުއްތަމަ ފަނޑިޔާރު ވިދާޅުވީ ކޮންމެ ވަކީލަކުވެސް ޤާނޫނީ ވަކީލުކަމުގެ ހުވާކުރުމަށްފަހު، އެންމެ މުހިންމު އެއްކަމެއްގެ ގޮތުގައި ދެކެވަޑައިގަންނަވަންވީ ފަންނުވެރިކަމާއެކު ވަޒީފާގެ މައިދާނުގައި ކުރިޔަށް ވަޑައިގަތުމުގެ މަސައްކަތް އަވަހަށް ފެއްޓެވުމަށް ކަމުގައެވެ.
އުއްތަމަ ފަނޑިޔާރު ވިދާޅުވީ ޤާނޫނީ ވަކީލެއްގެ ގޮތުގައި މަސައްކަތްކުރުމަކީ ފަސޭހަ ކަމެއްނޫން ކަމަށެވެ. ފަނޑިޔާރުންނަކީ ހުކުރެއް ހޮނިހިރެއް ބެލުމެއްނެތި އަބަދުވެސް މަސައްކަތުގައި ޝާމިލްވާންޖެހޭ ބައެއް ކަމަށާއި، ޤާނޫނީ ވަކީލެއްގެ ކުޑަކުޑަ އިހުމާލަކުންވެސް އަދި ޒިންމާއަދާނުކޮށް ފަރުވާ ކުޑަކުރެވިއްޖެނަމަ، އިޢާދަކުރަން ދަތި ގެއްލުންތައް ކުރިމަތިވުމުގެ ފުރުޞަތު އެބައޮތް ކަމަށް އެމަނިކުފާނު ވިދާޅުވިއެވެ. އަދި މި މަސައްކަތަކީ އުޖޫރުއަކާނުލައި ދާއިމީ ގޮތެއްގައި ކުރެވޭނެ މަސައްކަތެއް ނޫންކަމަށާއި، އެހެންކަމުން ޤާނޫނީ ވަކީލުންގެ ޚިދުމަތަށް ގަބޫލު ކުރެވޭ ފީއެއް ނެގިކަމުގައިވިޔަސް، އަބަދުވެސް އިންސާފަށްވުރެ ފައިސާ އިސްނުކުރުމަށް އުއްތަމަ ފަނޑިޔާރު އިލްތިމާސްކުރެއްވިއެވެ. އަދި މުވައްކިލުގެ މަޞްލަޙަތުގެ ކުރިޔަށް އުޖޫރަ އިސްނުކުރުމަށްވެސް އުއްތަމަ ފަނޑިޔާރުވަނީ އިލްތިމާސް ކުރައްވާފައެވެ.
އުއްތަމަ ފަނޑިޔާރު ވިދާޅުވީ މިފަންނާ އަލަށް ގުޅިވަޑައިގަންނަވާއިރު، ރަނގަޅު އާމްދަނީއެއް ނުލިބުމަކީ އެކަށީގެންވާ ކަމެއްކަމަށެވެ. ވަކީލެއްގެ މަސައްކަތް ބަލައިގަނެ އިތުބާރު ލިބިގެންދާނީ އެ ވަކީލެއްގެ ޤާބިލުކަމާއި، ސުލޫކު އަދި އަޚުލާޤު ބަހައްޓަވާ ގޮތެއްގެ މައްޗަށް ކަމަށް އެމަނިކުފާނު ވިދާޅުވިއެވެ.
އަލަށް މިދާއިރާއާއި ގުޅިވަޑައިގެންނެވި ވަކީލުނަށް އިޝާރާތް ކުރައްވައި އުއްތަމަ ފަނޑިޔާރު ވިދާޅުވީ އަލަށް މި ފަންނާ ގުޅިގެންދާއިރު ހަނދާނުގައި ބަހައްޓަންޖެހޭ އަނެއް ކަމަކީ، ބައެއް ފަހަރު ޢަމަލީ މައިދާނަށް ނިކުމެ ކާމިޔާބީ ޙާޞިލުކުރުމަށް ކޮންމެވެސް ވަރެއްގެ އިންތިޒާރެއް ކުރަން ޖެހިދާނެކަންކަމަށެވެ. ނަމަވެސް މާޔޫސް ވުމެއްނެތި ހިއްމަތާއެކު މަސައްކަތުގައި ދެމިތިބެ، ފަރުވާތެރިކަމާއިއެކު ކުރިއަށް ދިއުމަށް އުއްތަމަފަނޑިޔާރު ވަނީ އެދިވަޑައިގެންފައެވެ.
އުއްތަމަ ފަނޑިޔާރު ވިދާޅުވީ ޤާނޫނީ ފަންނުގެ ޤާނޫނުގެ ދަށުން ފުރަތަމަ ފަހަރަށް ބޭއްވުނު ބާ އިމްތިޙާނަކީ ޤާނޫނީ ދާއިރާ ހަރުދަނާކުރުމުގައި ހޯދުނު ވަރަށް ބޮޑު ކާމިޔާބީއެއް ކަމަށެވެ.
މިފަދަ ބޮޑު އިމްތިޙާނެއް ފުރިހަމަކަމާއެކު ބޭއްވިފައިވަނީ ބޭރުގެ ފަރާތްތަކެއްގެ އެހީތެރިކަމާއެކު، ދިވެހިރާއްޖޭގެ ބާ ކައުންސިލުން ކުރެއްވި ބުރަ މަސައްކަތްޕުޅުގެ ސަބަބުންކަން އެމަނިކުފާނު ފާހަގަކުރެއްވިއެވެ. މިހާކާމިޔާބު މަސައްކަތެއް ކުރެއްވިކަމަށްޓަކައި ބާ ކައުންސިލަށާއި، އެމެރިކަން ބާ އެސޯސިއޭޝަނަށާއި، ޔޫއެސް އެއިޑަށް ޢަދުލު އިންޞާފު ޤާއިމުކުރުމުގެ ބާރުގެ ނަމުގައި އެމަނިކުފާނު ވަނީ ޝުކުރު އަދާކުރައްވާފައެވެ.