ރާއްޖޭގެ މޫދު ކުޅިވަރުގެ އެކިއެކި ހަރަކާތްތައް ޕްރޮމޯޓްކުރުމަށް މޮސްކޯ ޑައިވް ޝޯގައި އެމްއެމްޕީއާރުސީން ބައިވެރިވެއްޖެއެވެ. މިއީ ރަޝިއާ އަދި އީސްޓަން ޔޫރަޕްގައި މޫދުކުޅިވަރާއި ޑައިވިންގއަށް އަމާޒުކޮށްގެން ބާއްވާ އެންމެ މަޝްހޫރު ފެއަރއެވެ.
މިއީ އެމްއެމްޕީއާރުސީން މޮސްކޯ ޑައިވް ޝޯގައި ބައިވެރިވާ 3 ވަނަ އަހަރެވެ. މިއަހަރުގެ ޝޯ ކުރިއަށްދާނީ މިމަހުގެ 9 އިން 12 އަށް ރަޝިއާގެ މޮސްކޯގައި ހުންނަ "ގޮސްޓީނީ ޑްވޯ" އެގްޒިބިޝަން ސެންޓަރުގައެވެ.
މި ޝޯގައި މޫދުކުޅިވަރާއި ގުޅުންހުރި އެކިއެކި ޚިދުމަތްތަކާއި އުފެއްދުންތައް ޕްރޮމޯޓްކުރެއެވެ. އޭގެތެރޭގައި ޑައިވިންގ، ސްޕިއާ ފިޝިންގ، ފްރީޑައިވިން، ކަނޑުއަޑީގެ ފޮޓޯގްރަފީ ހިމެނެއެވެ. އެހެންކަމުން މިފަދަ އުފެއްދުންތަކާއި ޚިދުމަތްތައްދޭ ފަރާތްތަކަށް މިއީ ވަރަށް މުހިންމު ފެއަރއެކެވެ.
މި އެގްޒިބިޝަންގައި އެމްއެމްޕީއާރުސީއާއިއެކު ފަތުރުވެރިކަމުގެ ސިނާއަތުގައި މަސައްކަތްކުރާ 6 ފަރާތުން ވަނީ ބައިވެރިވެފައެވެ. އެމްއެމްޕީއާރުސީން ބުނީ މި ފެއަރގައި ބައިވެރުވުމުގެ އެއް އަމާޒަކީ މޫދު ކުޅިވަރު އަދި ޑައިވިންގަށް އެންމެ މަގުބޫލު އެއް މަންޒިލްގެ ގޮތުގައި ދިވެހިރާއްޖެ ދެމެހެއްޓުން ކަމަށެވެ. އަދި މި ފެއަރގައި ބައިވެރިވުމުން ރަޝިޔާ އަދި ސީއައިއެސް މާކެޓްތަކުގައި ދިވެހިރާއްޖޭގެ ބްރޭންޑް އިތުރަށް ހަރުދަނާކުރެވޭނެކަމަށްވެސް އެމްއެމްޕީއާރުސީން ވަނީ ބުނެފައެވެ.
2022 ވަނަ އަހަރު ދިވެހިރާއްޖެއަށް 2 ވަނައަށް އެންމެ ގިނައިން ފަތުރުވެރިން ޒިޔާރަތްކުރި ޤައުމަކީ ރަޝިޔާއެވެ. މިދިޔަ އަހަރު ރަޝިއާއިން ރާއްޖެއަށް 201،954 ފަތުރުވެރިން ވަނީ ޒިޔާރަތްކޮށްފައެވެ. މިއަހަރުގެ މިހާތަނަށް ރަޝިއާއިން ރާއްޖެއަށް 28000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށްވެސް ތަފާސްހިސާބުތަކުން ދައްކައެވެ.