ޖުޑީޝަލް ސަރވިސް ކޮމިޝަން (ޖޭއެސްސީ) އެކުލެވިގެންވާގޮތް ބަދަލުކުރުމަށް ޤާނޫނަށް އިސްލާހު ގެނައުމުގެ ބިލާއެކު 23 ބިލެއް މިއަހަރުގެ ފުރަތަމަ ދައުރަށް ހުށަހެޅުމަށް ގަސްތުކުރައްވާ ކަމުގައި ބަންޑާރަ ނާއިބުގެ އޮފީހުން ވިދާޅުވެއްޖެއެވެ.
ބަންޑާރަ ނާއިބުގެ އޮފީހުން ކޮންމެ އަހަރެއްގެވެސް އަދި މަޖިލީހުގެ ކޮންމެ ދައުރެއްވެސް ފެށުމުގެ ކުރިން އެ އޮފީހުން މަޖިލީހަށް ހުށަހެޅުމަށް ގަސްތުކުރައްވާ ބިލްތަކުގެ ލިސްޓެއް ރައްޔިތުންގެ މަޖިލީހަށް ފޮނުވައެވެ. މިއަހަރަށް މަޖިލިސް ހުޅުވުމާއި، ރިޔާސީ ބަޔާން އިއްވުމުގެ ޖަލްސާ މާދަމާ ބޭއްވުމަށް ވަނީ ހަމަޖެހިފައެވެ.
ސަރުކާރުގެ ފަރާތުން ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރަށް ހުށަހަޅަން ޤަޞްދުކުރާ ބިލުތަކުގެ ލިސްޓުގައި ހިމެނެނީ މުޅިން އަލަށް ހުށަހަޅާ 7 ބިލަކާއި، ޤާނޫނުތަކަށް އިސްލާހު ގެނައުމަށް ހުށަހަޅާ 16 ބިލެކެވެ.
އިސްލާހު ގެނައުމަށް ހުށަހަޅާ ބިލްތަކުގެ ތެރޭގައި ޖުޑީޝަލް ސަރވިސް ކޮމިޝަން އެކުލެވިގެންވާގޮތް ބަދަލުކުރުމަށް ހުށަހެޅުމަށް ވަނީ ހަމަޖެހިފައެވެ. ޖޭ.އެސް.ސީ އެކުލެވިގެންވާގޮތަށް ބަދަލު ގެނައުމަށްޓަކައި ގިނަ ބައެއްގެ ޚިޔާލާއެކު ބަންޑާރަ ނާއިބުގެ އޮފީހުން ވަނީ ގިނަ މަސައްކަތްތަކެއް ނިމިދިޔަ އަހަރުގެ ތެރޭގައި ކޮށްފައެވެ. ޖޭ.އެސް.ސީ އެކުލެވާލުމަށް ގިނަ މީހުންގެ ލަފަޔަކީ ސިޔާސީ މީހުން ނުހިމަނައި ކޮމިޝަން އެކުލަވާލުމެވެ.
ސަރުކާރުގެ ފަރާތުން ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރަށް ހުށަހެޅުމަށް ޤަޞްދުކުރާ ބިލުތަކުގެ ލިސްޓު، ރައްޔިތުންގެ މަޖިލީހުގެ ގަވާއިދުގެ 82 ވަނަ މާއްދާގެ (ރ) ގައި ބަޔާންކޮށްފައިވާ ގޮތުގެމަތިން ރައްޔިތުންގެ މަޖިލީހުގެ ރައީސަށް ފޮނުވައިފިއެވެ. pic.twitter.com/eYszwwr4mb
— AG Office Maldives (@AGOmv) February 5, 2023
މިބިލާއިއެކު އިސްލާހު ގެނައުމަށް ހުށަހަޅާ ބިލުތަކުގެ ތެރޭގައި ޤާނޫނު އަސާސީއަށް އިސްލާހު ގެނައުމުގެ ބިލާއި، ޤާނޫނުލް އުގޫބާތާއި، ޖިނާއީ އިޖުރާތު ޤާނޫނާއި، މަސްތުވާތަކެއްޗާއިބެހޭ ޤާނޫނާއި، މައުލޫމާތުހޯދާ ލިބިގަތުމުގެ ޙައްޤުގެ ޤާނޫނާއި، ރިޔާސީ އިންތިޚާބުގެ ޤާނޫނަށް އިސްލާހު ގެނައުމަށްވެސް ވަނީ ހަމަޖެހިފައެވެ.
އަލަށް ހުށަހަޅާ ބިލްތަކުގެ ތެރޭގައި، ހައްޖާއި އުމުރާގެ ބިލާއި، އިސްރަށްވެހިންގެ ބިލާއި، ފޮރިން އިސްވެސްޓަރުންގެ ބިލާއި، މޯލްޑިވްސް މީޑިއާ އެންޑް ބްރޯޑްކާސްޓިންގެ ބިލާއި، އަބުރާއި ބެހުމުގެ ސަބަބުން ލިބޭ ގެއްލުމުގެ ބަދަލު ނެގުމުގެ ބިލުވެސް ހިމެނެއެވެ.
ރައްޔިތުންގެ މަޖިލީހުގެ ނިމިދިޔަ ދައުރުގައިވެސް މަޖިލީހުން ވަނީ މުހިންމު ބިލްތަކެއްގެ މަސައްކަތް ކޮށްފައެވެ. އަދި ބައެއް ބިލްތަކުގެ މަސައްކަތްތައް އަދިވެސް ކޮމެޓީ މަރުހަލާގައި ކުރިއަށްދާކަން ފާހަގަކޮށްލެވެއެވެ.