ގަވާއިދާ ޚިލާފަށް ރަށުގެ ގޮނޑުދޮށުން ވެއްޔާއި އަކިރި ނެގި މައްސަލައެއްގައި، ފީވަކު ކައުންސިލް ބޮޑު އަދަދަކުން ޖޫރިމަނާކޮށްފިއެވެ.
އެންވަޔަރަމަންޓަލް ޕްރޮޓެކްޝަން އެޖެންސީ އީޕީއޭއިން ނެރެފައިވާ ނޫސްބަޔާނެއްގައިވަނީ ށ.ފީވަކު ކައުންސިލް ޖޫރިމަނާކޮށްފައިވަނީ، ރަށުގައި ކުޑަކުދިންގެ ޕާކެއް ތަރައްޤީކުރުމަށް ގަވާއިދާ ޚިލާފަށް ރަށުގެ ގޮނޑުދޮށުން ވެއްޔާއި އަކިރި ނެގި މައްސަލައަކާ ގުޅިގެންނެވެ.
އީޕީއޭއިން ބުނެފައިވަނީ މިދިޔަ އަހަރުގެ އޮގަސްޓް 7ވަނަ ދުވަހު، އެއެޖެންސީއަށް ހުށަޅާފައިވާ މައްސަލައަކާއި ގުޅިގެން ބެލި ބެލުމުން، ފީވަކު ކައުންސިލްގެ އިސްނެގުމަށް ރަށުގެ ގޮނޑުދޮށުން 25 ބަސްތާ ވެއްޔާއި، 20 ބަސްތާ އަކިރި ނަގާ، ކުޑަކުދިންގެ ޕާކެއް ހެދުމުގެ މަސައްކަތަށް ބޭނުންކޮށްފައިވާކަން ޔަގީންވެފައިވާކަމަށެވެ.
މިއާއި ގުޅިގެން ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގައި ހިމެނޭ (ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާ ބަދަލު ހޯދުމުގެ ގަވާއިދު)ގެ ދަށުން ފީވަކު ކައުންސިލު ވަނީ 83525 (އައްޑިހަ ތިންހާސް ފަސްސަތޭކަ ފަންސަވީސް) ރުފިޔާއިން ޖޫރިމަނާކޮށްފައެވެ.
އަދި ސަރުކާރު ބަންދު ދުވަސްތައް ހިމަނައިގެން 30 ދުވަހުގެ ތެރޭގައި ޖޫރިމަނާ ފައިސާ ދެއްކުމަށް، ފީވަކު ކައުންސިލަށް އީޕީއޭއިން މިމަހުގެ 12ވަނަ ދުވަހުވަނީ އަންގާފައެވެ.
ތިމާވެށި ރައްކާތެރިކުރުމުގެ ޤާނޫނު ބުނާގޮތުން ރަށުގެ ވަކި އިމެއްގެ ތެރެއިން ވެއްޔާ އަކިރި ނެގުމަކީ މަނާކަމެކެވެ. އަދި މިއީ ބޮޑެތި އަދަދުތަކުން ޖޫރިމަނާ ކަނޑައަޅޭ ކަމެކެވެ. މީގެކުރިންވެސް މިގޮތަށް ގަވާއިދާ ޚިލާފަށް ވެލި ނެގުމުގެ މައްސަލަތަކުގައި ކައުންސިލްތައް ޖޫރިމަނާކޮށްފައިވެއެވެ.