ކޮވިޑް ވޭރިއަންޓްތައް ދެެނެގަތުމަށް ހަދާ ޓެސްޓް ރާއްޖޭގައިވެސް ހަދަން ފަށައިފިއެވެ. 2019 ވަނަ އަހަރު ފެނުނު ކޯވިޑްގެ އެކި ވޭރިއަންޓްތައް އުފަންވެ އެ ބަލި ވަނީ ހަލުވިކަމާއި އެކު ދުނިޔޭގެ އެކި ހިސާބުތަކުގައި ފެތުރިފައެވެ.
މި ބަލީގެ ވޭރިއަންޓްތައް ދެނެގަތުމަށް މިހާތަނަށް ރާއްޖެއިން ޓެސްޓްތައް ހަދަމުން އައީ އަވަށްޓެރި އިންޑިއާއަށް ސާމްޕަލްތައް ފޮނުވައިގެންނެވެ.
ދުނިޔޭގެ ސިއްހަތު ޖަމުއިއްޔާ ޑަބްލިއުއެޗްއޯގެ ރާއްޖޭގެ ގޮފިން ބުނީ ކޯވިޑް ވޭރިއަންޓް ޓެސްޓްތައް ހަދާ ހިއުމަން ޖީން ސީކއުންސް މެޝީނެއް ރާއްޖޭގައި ފުރަތަމަ ފަހަރަށް ބަހައްޓާފައިވާކަމަށެވެ. އަދި މި މެޝިނަކީ ޑަބްލިއުއެޗްއޯއިން ހަދިޔާކުރި މެޝިނެއްކަމަށްވެސް އެ ޖަމްއިއްޔާގެ ރާއްޖޭގެ ގޮފިން ބުނެއެވެ.
"މީސެކް މެޝިން" ގެ ނަމުން ނަންދީފައިވާ މި މެޝިން ބޭނުންކޮށްގެން ކޯވިޑްގެ ވޭރިއަންޓްތައް ދެނެގަތުމުގެ ޓެސްޓްތައް ހަދަން ފަށާފައިވަނީ އެކަމަށް ބޭނުންވާ މުވައްޒަފުން ތަމްރީނުކުރުމަށްފަހުއެވެ. މި މުވައްޒަފުން ތަމްރީނުތައް ފުރިހަމަކޮށްފައިވަނީ އިންޑިއާއިންނެވެ.
އެޗްޕީއޭއިން އެންމެ ފަހުންއާއްމުކޮށްފައިވާ ހިސާބުތައް ދައްކާގޮތުން މިދިޔަ ހަފްތާގެ ތެރޭގައި ރާއްޖެއިން ކޯވިޑްގެ 6 ކޭސް ފެނިފައިވެއެވެ. މީގެތެރެއިން އެކަކަށް ވަނީ ހޮސްޕިޓަލްގައި އެޑްމިޓްކޮށްގެން ފަރުވާ ދީފައެވެ.
ކޯވިޑްގެ ބަލީގައި ރާއްޖެއިން މިހާތަނަށް 311 މީހަކު ވަނީ މަރުވެފައެވެ. އަދި 185،708 މީހަކަށް ވަނީ މި ބަލިޖެހިފައެވެ.