ފުލުހުންގެ ޚިދުމަތަކީ ރައްޔިތުންނާއި ގާތުން ރައްޔިތުން އެދޭފަދަ ޚިދުމަތަކަށް ހަދައި، ފުލުހުން ދެމުންގެދާ ޚިދުމަތް ހަރުދަނާކުރެވޭނެ ކަންކަން ދެނެގަތުމަށް ޕޮލިސް ރިސާރޗް އެންޑް އިނޮވޭޝަން ކޮންފަރެންސްގެ ނަމުގައި ޚާއްޞަ ކޮންފަރެންސެއް ބޭއްވުމަށް ނިންމައިފިއެވެ. މިކޮންފަރެސް ބޭއްވުމަށް ހަމަޖެހިފައިވަނީ މާޗް މަހުގެ 18 އިން 21 އަށެވެ. މި ކޮންފަރެންސް ކޮންމެ އަހަރަކު ބާއްވަން ވަނީ ނިންމާފައެވެ.
ހޯމް މިނިސްޓްރީއާއި، ފުލުހުންނާއި، ފުލުހުންގެ ބޯޑުން އިސްނަގައިގެން ކުރިއަށް ގެންދާ މި ކޮންފަރެންސަކީ އިލްމީ ދިރާސާތަކެއްގެ މައްޗަށް ކުރިއަށް ގެންދިއުމަށް ހަމަޖެހިފައިވާ ކޮންފަރެންސެވެ. މިކޮންފަރެންސާއި ގުޅޭގޮތުން މައުލޫމާތު ދެއްވުމަށް އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރ އިމްރާން އަބްދުﷲ ވިދާޅުވީ ފުލުހުންގެ ޚިދުމަތުގެ ފާއިތުވެދިޔަ 89 އަހަރުގެ ތެރޭގައި ޚިދުމަތަށް ބޮޑެތި ބަދަލުތަކެއް ގެނެވިފައިވާކަމަށެވެ.
2004 ވަނަ އަހަރުން ފެށިގެން ފުލުހުންގެ ޚިދުމަތް މަދަނީ ޚިދުމަތެއްގެ ގޮތުގައި ތަޢާރަފްވުމަށްފަހު މިދައުރުގެ ތެރޭގައި އަމަލުކުރަންފެށި ފުލުހުންގެ އާ ޤާނޫނަކީ ފުލުހުންގެ ޚިދުމަތަށް ބޮޑެތި ބަދަލުތަކެއް ގެނުވި މުހިންމު ޤާނޫނެއްކަން މިނިސްޓަރ ފާހަގަކުރެއްވިއެވެ. އެ ގާނޫނުގެ ދަށުން ފުލުހުންގެ ޚިދުމަތަކީ ރައްޔިތުންނާއި ގާތުން އަދި ރައްޔިތުން ބަލައިގަންނަ ޚިދުމަތަކަށް ހެދުމަށް ގިނަ މަސައްކަތްތަކެއް ކުރެވެމުންދާކަމަށް މިނިސްޓަރ ވިދާޅުވިއެވެ.
ފުލުހުންގެ ޚިދުމަތުގައި ހުރި ރަނގަޅުކުރަންޖެހޭ ކަންކަމަކީ، ރައްޔިތުންގެ ހުރި ކަންބޮޑުވުންތަކަށް ހައްލު ގެނެވޭނެ ގޮތަކަށް އެޖާގަ ދެވިގެން ގެނެވޭ ބަދަލުތަކަށް ވާންޖެހޭކަމަށް މިނިސްޓަރ ވިދާޅުވިއެވެ. އެގޮތުން މި ކޮންފަރެންސުގެ އެންމެމުހިންމު މަޤްސަދަކީ ރައްޔިތުންގެ ޚިޔާލާއި މަޝްވަރާއާއި، މުޖުތަމައުގެ ބައިވެރިވުން ހިމެނޭ ޚިދުމަތަކަށް ފުލުހުންގެ ޚިދުމަތް ހެދުމެވެ. އަދި އެ ކޮންފަރެންގައި ޤާނޫނު ތަންފީޒުކުރާ އިދާރަތަކާއި، ޔުނިވާސިޓީ، ކޮލެޖް، މަދަނީ ޖަމްއިއްޔާތައް ހިމެނޭހެން އަދި އަމިއްލަ ފަރަތްތަކުންވެސް ކަރުދާސް ހުށަހަޅައި މަޝްވަރާކުރެވިގެން ފުލުހުންގެ ޚިދުމަތް ރަނގަޅު ކުރުމަށް މަސައްކަތް ކުރުމަކީވެސް މި ކޮންފަރެންސްގެ މަޤްޞަދެކެވެ.
"މިކޮންފަރެންސް ވެގެންދާނީ ފުލުހުންގެ ޚިދުމަތް ރައްޔިތުން އެދޭފަދަ ބޭނުންވާފަދަ ޚިދުމަތަކަށް ހެދުމަށް ރައްޔިތުންގެ ފަރާތުން ޚިޔާލް ހުށަހެޅުމަށް އެންމެ ތަނަވަސްކޮށް ފުރުސަތު ލިބިގެންދާ ފޯރަމަކަށް." ހޯމް މިނިސްޓަރ އިމްރާން ވިދާޅުވިއެވެ.
މިކޮންފަންސާއި ގުޅޭގޮތުން ކުރީގެ ކޮމިޝަނާ އޮފް ޕޮލިސް އަދި ފުލުހުންގެ ބޯޑުގެ ޗެއާމަން އަހުމަދު ފަސީހު ވިދާޅުވީ މިއީ ފުލުހުންގެ ތަރީހުގައި ބޭއްވޭ މިފަދަ ފުރަތަމަ ކޮންފަރެންސް ކަމަށެވެ. ތަހުޒީބް މުޖުތަމައުތަކުގައި އަބަދުވެސް ކަންކަން ނިންމަނީ އިލްމީ މީހުންގެ ލަފަޔާއި މަޝްވަރާގެ މަތީން ކަމަށާއި، މި ކޮންފަރެންސަކީ އެކަށީގެންވާ ނަތީޖާ ލިބިގެންދާނެ ކޮންފަރެންސަކަށް ވެގެންދާނެކަމަށް ފަސީހު ވިދާޅުވިއެވެ.
މިކޮންފަރެންސުގައި 10 ދާއިރާއަކުން ދިރާސާ ކަރުދާސް ހުށައެޅުމަށް ނިންމާފައިވެއެވެ. އެގޮތުން ކްރައިމް ޕްރިވެންޝަން، ނެޝަނަލް ސެކިއުރިޓީ އެންޑް ކައުންޓާ ޓެރެރިޒަމް، ފައިނޭޝަލް ކްރައިމް އެންޑް އެންޓި މަނީ ލޯންޑަރިން، ސައިބާ ކްރައިމް، ފޮރިންސިކް ލީޑަރޝިޕް އޯގައިނޭޝަން ރެސިލިއަންސް، އިނޮވޭޝަން އެންޑް ޓެކްނޮލޮޖީ، ޓްރާސްޕޯޓް އެންޑް މެރިޓައިމް ސެކިއުރިޓީ، އެފެޝެންސީ އެންޑް އެފްޓިވްނެސް، އަދި ރޯޑް ސޭފްޓީއެވެ.