އައްޑޫ ސިޓީ ތަރައްޤީކުރަނީ އައްޑޫގެ ރައްޔިތުން އެކުލަވާލި މެނިފެސްޓޯއާއި އެއްގޮތަށް، އަކުރަކަށް ފިއްޔަކަށް އެއްވެސް ބަދަލެއް ގެނައުމެއް ނެތިކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އައްޑޫ ފޭދޫގައި ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސް ވިދާޅުވީ އައްޑޫ ސިޓީ ތަރައްޤީނުވެ ރާއްޖެ ތަރައްޤީ ނުވާނެކަމަށެވެ. އަދި އެސިޓީގެ ތަރައްޤީއާއި އެންމެ ބޮޑަށް ގުޅިފައިވަނީ އިޤްތިޞާދީ ކުރިއެރުންކަން ފާހަގަކުރައްވާ ރައީސް ވިދާޅުވީ، އިޤްތިޞާދީ ބޮޑެތި ބަދަލުތައް އައްޑުއިން ފެންނާނެކަމަށެވެ.
ޚާއްސަކޮށް ސަރުކާރުން އިޢުލަންކޮށް މަސައްކަތް ފަށާފައިވާ އައްޑޫ ގަން އިންޓަރނޭޝަނަލް އެއަރޕޯޓް ތަރައްޤީ ނުވެ، އެ ސިޓީ ތަރައްޤީ ނުވާނެކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ އެ މަޝްރޫޢު މިހާރު އޮތީ ޓެންޑަރިންގެ އެންމެ ފަހު މަރުހަލާގައިކަމަށާއި، ވަރަށް އަވަހަށް ކޮންޓްރެކްޓަރާ ހަވާލުކޮށް ޢަމަލީ މަސައްކަތް ފައްޓަވާނެކަމަށެވެ.
ރައީސްގެ ވާހަކަފުޅުގައި މި ދައުރަކީ އައްޑޫ ސިޓީގައި އެންމެ ބިޔަ މަޝްރޫޢުތައް ފެށިގެންދާ ދައުރުކަން ފާހަގަކުރައްވާ، އައްޑޫއިން 198 ހެކްޓަރުގެ ބިން ހިއްކުމާއި، އައްޑޫގެ މަގު ހެދުމުގެ މަސައްކަތަކީވެސް ރަށުގެ ރައްޔިތުން އެންމެ ބޮޑަށް ބޭނުންވެފައި ތިބި ކަންކަން ކަމަށް ވިދާޅުވިއެވެ.
"އައްޑޫގެ ތަރައްޤީގެ ޕްލޭން ތައްޔާރުކުރީ ސިޓީގެ ރައްޔިތުން. އެއަކަށް އަކުރަކަށް ފިއްޔަކަށް ބަދަލެއް ނުގެންނަން. އެ މެނިފެސްޓޯ އޮތް ގޮތަށް ތަންފީޒް ކުރަނީ." ރައީސް ވިދާޅުވިއެވެ.
އައްޑޫ ސިޓީގެ ބިން ހިއްކުމާއި ގުޅޭ މަސައްކަތްތައް މިމަހުގެ 5ވަނަ ދުވަހު ވަނީ ފަށާފައެވެ. މި މަސައްކަތް ނިމޭއިރު ބޯހިޔާވަހިކަމުގެ އިތުރުން، އިޤްތިޞާދީ މުހިންމު މަސައްކަތްތަކަށް ބިން ހަމަޖެހޭނެއެވެ. އައްޑޫގެ އާބާދީ 30000އިން މައްޗަށް އަރައެވެ. އައްޑޫގައި ސަރުކާރުން އަންނަނީ ތަރައްޤީގެ ގިނަ މަޝްރޫޢުތަކެއް ހިންގަމުންނެވެ. އޭގެ ތެރޭގައި މަގުތައް ޒަމާނީ ފެންވަރަށް ތަރައްޤީކުރުމާއި، އައްޑޫގެ ރަށްތަކުގެ ބަނދަރުތައް ތަރައްޤީކުރުމާއި، ގޮނޑުދޮށް ހިމާޔަތްކުރުންފަދަ މަޝްރޫޢުތައް ފާހަގަކޮށްލެވެއެވެ.