މާފުށިން އަލަށް ހިއްކި ބިމުން އަންނަ މަހުގެ ތެރޭގައި ގޯތިދޫކުރަން ފަށާނެކަމަށް އެރަށު ކައުންސިލުން ވިދާޅުވެއްޖެއެވެ. ރާއްޖޭގައި އެންމެ ފުޅާކޮށް ގެސްޓް ހައުސް ވިޔަފާރުކުރަމުން އަންނަ އަދި އެންމެ ބޮޑު އަދަދެއްގެ އާމްދަނީއެއް ވަންނަ މާފުއްޓަކީ ގިނަ ބަޔަކު ވިޔަފާރިކުރަން ޝައުގުވެރިކަން އޮތް ރަށެކެވެ.
"އާމާފުށި"، "މަންތާމާފުށި"، "ހިއްކި ބިން"
މާފުށީގައި އަލަށް ހިއްކި ސަރަހައްދަށް އަދި ވަކި ހާއްސަ ނަމެއް ނުކިޔައެވެ. އެހެންނަމަވެސް ރަށުގެ ރައްޔިތުންގެ މެދުގައި މިހާރުވެސް އެތަނަށް އާއްމުކޮށް ކިޔާ ތިން ނަމެއް އޮވެއެވެ. އެއްބަޔަކު ކިޔަނީ "އާމާފުށި" މިނަމެވެ. އަނެއްބަޔަކު އެތަނަށް "މަންތާ މާފުށި" މިހެންވެސް ކިޔައެވެ. މިހެން ކިޔާ މީހުން އެތަނަށް އެނަން ދިނީ އެ ސަރަހައްދު މަތިން ބަލާއިރު މަޑީގެ ބާވްތަތެއްކަމަށްވާ މަންތާާއާ ވައްތަރު ގޮތަށް އޮތުމުންނެވެ.
ރަށު ކައުންސިލްގެ ރައިސް ހުސެއިން ޞަލާޙް ވިދާޅުވީ އަލަށް ހިއްކި ބިމަށް މިވަގު ވަކި ނަމެއް ނެތްނަމަވެސް އެ ސަރަހައްދަށް ކިޔާނެ ނަމަކާއި މެދު ހިޔާލު ބަދަލުކުރުމަށް ވިސްނަވާކަމަށެވެ. "އާމާފުށި"، "މަންތާ މާފުށި" މީގެތެރެއިން ކޮންމެ ނަމެއްވިޔަސް ރަށު ރައްޔިތުންނަށް އެންމެ ރަނގަޅެވެ. ރަށު ރައްޔިތުން މަޝްވަރާއެކު ނޫނީ އެއްވެސް ކަމެއް ކައުންސިލަކުން ނުކުރެއެވެ.
ރަށުގެ "ބިނާވެށި ޕްލޭން" ލޭންޑްޔޫސް ޕްލޭން ރައްޔިތުންނާއި ބައްދަލުކޮށް ފާސްކޮށް ނިންމާފައިވާކަމަށެވެ. އެހެންކަމުން އަންނަ މަހުގެ ތެރޭގައި އަލަށް ހިއްކި ބިމުން ގޯތި ދޫކުރަން ފަށާނެކަމަށް ކައުންސިލްގެ ރައީސް ޞަލާޙް ވިދާޅުވިއެވެ.
އަލަށް ހިއްކި ބިމުން 312 ގޯތި ދޫކުރަން ވަނީ ނިންމާފައެވެ. އޭގެތެރެއިން 6 ބިމަކީ ވިޔަފާރީގެ އުސޫލުން ވިއްކުމަށް ނިންމާފައިވާ ބިމެވެ. ދެން ހުރި ބިންތައް ހުޅުވާލާނީ ރަށު ރައްޔިތުންނަށެވެ. އެކަމަށް ބޭނުންވާ އުސޫލްތައް އެކުލަވާލުމުގެ މަސައްކަތް އަންނަނީ ކުރަމުންނެވެ. އެކަމަކު އުސޫލް ނިންމާނީ ރައްޔިތުންނާއި މަޝްވަރާކޮށް ރައްޔިތުންގެ ހިޔާލާއި އެއްގޮތަށްކަމަށް ޞަލާޙް ވިދާޅުވިއެވެ. ރައްޔިތުންގެ ދިން ހިޔާލާއެކު މިހާރު ދޫކުރަން ނިންމާފައިވަނީ ސައިޒްގެ ގޮތުން 2000 އަކަފޫޓްގެ ގޯތި ދޫކުރުމަށްކަމަށެވެ.
އަލަށް ހިއްކި ބިމުން ގޯތި ދޫކުރަން ތައްޔާރުވާއިރު ކައުންސިލްގެ ވަރަށް މުހިއްމު އެހެން ވިސްމުމެއްވެސް އެބައޮތެވެ. އެއީ މިހާރު ފެންނަ މާފުށި ގޮތަށް ބޮޑެތި އުސްއިމާރާތްތަކުން ފުރިފައި އޮތް ސަރަހައްދަކަށް އައު ސަރަހައްދު ނެހެދުމެވެ. ކައުންސިލްގެ ވިސްނުކަމީ ޖަޒިރާ ވަންތަ ދިވެހި ވަންތަކަން ފެންނަ ސަރަހައްދެއްގެ ގޮތުގައި އެ ސަރަހައްދު ތަރައްޤީކުރުމެވެ.
ޕިކްނިކް އައިލެންޑް "ވަށްމާފުށި"
ރަށުގެ ބިން ހިއްކުމުގެ ތެރެއިން އެރަށު ރައްޔިތުން ދަތުރު ދިޔުމަށް ސަރުކާރުންވަނީ ޕިކްނިކް އައިލެންޑެއްވެސް ހަދާދީފައެވެ. ފަޅުތެރެއިން 2 ހެކްޓަރުގެ ބިން ހިއްކައިގެން ތަރައްޤީކުރި މިރަށް މާފުށީ ކައުންސިލާއި މިދިޔަމަހުގެ ތެރޭގައިވަނީ ސަރުކާރުން ހަވާލުކޮށްފައެވެ. އެއާއި އެކު އެރަށަށް ދަތުރު ދާން ބޭނުންވާ ފަރާތްތަކަށް ކައުންސިލުން ވަނީ އެފުރުސަތުވެސް ހުޅުވާލާފައެވެ.
ކައުންސިލްގެ ވިސްނުމަކީ މިރަށްވެސް ދަތުރު ދާ މީހުންނަށް ބޭނުންވާ ވަސީލަތްތަކާއި އެކު ތަރައްޤީކުރުމެވެ. އެ ސަރަހައްދަކީ ދިވެހިންނާއި ފަތުރުވެރިންނަށްވެސް ބޭނުންކުރެވޭ ސަރަހައްދަކަށް ހެދުން އެއީ ކައުންސިލްގެ އެންމެ ބޮޑު ވިސްނުމެވެ. އަދި އެ ސަރަހައްދުގައިވެސް ވިޔަފާރީގެ އުސޫލުން ހިންގޭނެ ބައެއް ވިޔަފާރީގެ އުސޫލެއް އެކުލަވާލުމަކީވެސް ކައުންސިލްގެ ވިސްނުމެވެ. ކައުންސިލްގެ އެންމެ އިސްކަމެއް ދީގެން މިހާރު ކުރަނީ ހިއްކި ބިމުން ގޯތި ދޫކުރުމަށް ކުރަންޖެހޭ މަސައްކަތެވެ. އެއަށްފަހު އަހަރުގެ ދެވަނަ ކުއަޓަރގައި ޕިކްނިކް އައިލެންޑްގެ އުސޫލްތަކާއި ވިޔާފާރި ކޮންޕޯނަންޓް އިއުލާންކުރަން މަސައްކަތް ކުރަމުން އަންނަކަން ކައުންސިލްގެ ރައީސް ޞަލާޙް ފާހަގަކުރެއްވިއެވެ.
ކ.މާފުށީގެ ބިން ހިއްކުމުގެ މަޝްރޫޢުގެ ޢަމަލީ މަސައްކަތްވެސް އެމް.ޓީ.ސީ.ސީއާ ހަވާލުކޮށް، އެ މަސައްކަތް 2021 އޮކްޓޯބަރުމަހު ވަނީ މުޅިން ނިންމާފައެވެ. މިމަޝްރޫޢުގައި އެރަށު ފަޅުން 25 ހެކްޓަރުގެ ބިން ވަނީ ހިއްކާފައެވެ. އަދި 1100 ހެކްޓަރުގެ ސަރަޙައްދެއް ވަނީ ޙިމާޔަތްކޮށްފައެވެ. އަލަށް ހިއްކި ސަރަހައްދާއި މާފުށި ގުޅާލާނީ ކޯޒްވޭއަކުންނެވެ.