މި މަހުގެ 20 ވަނަ ދުވަހު ޒީ5 އިން ޕްރީމިއާކުރަން ހަމަޖެހިފައިވާ ފިލްމު "ޗަތުރީވާލީ" ގެ ބަތަލާ ރަކުލް ޕްރީތް ސިންގް އަނެއްކާވެސް ތްރިލާ ފިލްމަކަށް ސޮއިކޮށްފިއެވެ.
ރަކުލްގެ މިފަހަރުގެ ފިލްމަކީ ސުނީރު ކޭތަރާޕަލް ޕްރޮޑަކްޝަން އުފައްދާ ނިކިލް މަހާޖަން ޑައިރެކްޓުކުރާ ފިލްމެކެވެ. މީގައި ރަކުލް ފެންނާނީ އަންހެން ލީޑް ރޯލުންނެވެ. މިސްޓްރީ ތްރިލާ އެއް ގޮތަށް ގެނެސްދޭ މި ފިލްމަކީ އެހެން ބަހަކުން ގެނެސްދީފައިވާ ފިލްމެއްގެ ރީމޭކެކެވެ.
މި ފިލްމާއި ބެހޭ ގޮތުން ރަސްމީކޮށް އަދި އެއްވެސް އެއްޗެއް ހާމައެއް ނުކުރެއެވެ.
ރަކުލް ދެން އެންމެ އަވަހަށް ފެންނަ ފިލްމު "ޗަތިރީވާލީ" އަކީ އާންމުކޮށް ވާހަކަ ވާހަކަ ނުދެކެވޭ އަދި އެ ވާހަކައެއް ދައްކަން ވެސް ގިނަ ބަޔަކު ލަދުވެތިވާ ޖިންސީ ވާހަކަ އާއި ރައްކާތެރި ގޮތުގައި ޖިންސީ އުފާ ހޯދަން ހޭލުންތެރިކަން އުފައްދައި ދިނުމުގެ މުހިއްމުކަން ދައްކުވައިދޭނެ ފިލްމެކެވެ. މިއީ ރޯނީ ސްކްރޫވާލާ ޕްރޮޑިއުސްކޮށް، ތޭޖާސް ޑިއޯސްކަރް ޑައިރެކްޓްކޮށްފައިވާ ފިލްމެކެވެ.
މި ފިލްމުގައި މައިގަނޑު ކެރެކްޓާއަކީ ބައޮލޮޖީ ޓީޗަރެއްގެ ރޯލުން ފެނިގެންދާ ރަކުލް ޕްރީތު ސިންގް އެވެ. "ޗަތުރީވާލީ" ގެ ކާސްޓްގައި ސުމީތު ވިއާސް، ސަތިޝް ކޯޝިކް، ޑޮލީ އަހްލުވާލިއާ އަދި ރާޖޭޝް ތައިލަންގް ވެސް ހިމެނެއެވެ.
ރަކުލްގެ ކުރިއަށް ހުރި ފިލްމުތަކުގެ ތެރޭގައި "އައިލާން" ތަމަޅަ ފިލްމު "އިންޑިއަން 2" ގެ އިތުރުން ތަމަޅަ އަދި ތެލުގޫ ބަހުން ގެނެސްދޭން ހަމަޖެހިފައިވާ ފިލްމި "31 އޮކްޓޫބަރު ލޭޑީސް ނައިޓް" ހިމެނެއެވެ.