ގުރުއާން ފެސްޓިވަލަކާއެކު، ކީރިތި ޤުރުއާން ކިޔެވުމުގެ 35ވަނަ ޤައުމީ މުބާރާތް ފަށައިފިއެވެ. މިފަހަރުގެ މުބާރާތް ކުރިއަށްދަނީ ކިންގް ސަލްމާން މިސްކިތުގައެވެ.
ކީރިތި ޤުރުއާން ކިޔެވުމުގެ ޤައުމީ މުބާރާތް ބާއްވަމުން އަންނަނީ 1980ވަނަ އަހަރުން ފެށިގެންނެވެ. 1984ވަނަ އަހަރުން ފެށިގެން މި މުބާރާތް ބާއްވަމުން އައިސްފައިވަނީ އިސްލާމީ މަރުކަޒުގައެވެ. 22 އަހަރަށް ފަހު، މި މުބާރަށް ބޭއްވުން، ކިންގް ސަލްމާން މިސްކިތަށް މިވަނީ ބަދަލުކޮށްފައެވެ.
ކީރިތި ޤުރުއާން ކިޔެވުމުގެ 35ވަނަ މުބާރާތް ފައްޓަވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމްއެވެ. ނައިބު ރައީސް ވަނީ މިމުބާރާތާއި އެކުއެކީގައި ކުރިއަށްދާ ޤުރުއާން ފެސްޓިވަލް "މަޚުރަޖާނުލް ޤުރުއާން"ފެސްޓިވަލްވެސް ހުޅުއްވައިދެއްވާފައެވެ.
ކީރިތި ޤުރުއާން ކިޔެވުމުގެ ޤައުމީ މުބާރާތަކީ މުޅި ރާއްޖެއަށް ހުޅުވާލައިގެން ބާއްވާ އެންމެ ބޮޑު މުބާރާތެވެެ. މިފަހަރުގެ މުބާރާތުގައި 121 މުއައްސަސާއަކުން 1022 ބައިވެރިން ޤުރުއާން ކިޔަވާނެއެވެ.
މުބާރާތް ފަށްޓަވައިދެއްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވީ، މި މުބާރާތަކީ ކީރިތި ޤުރުއާނަށް އޮންނަ ލޯބި މުޖުތަމަޢުގައި އިތުރުކުރުމަށް ކުރެވޭ ވަރަށް މުހިންމު މަސައްކަތެއްކަމަށެވެ. އަދި މިފަދަ މުބާރާތެއްގެ އެންމެ ބޮޑު ބޭނުމަކަށްވާންވާނީ، ޤުރުއާން ކިޔަވާ، ޤުރުއާނުގެ ޢިލްމު އިތުރުކުރުންކަމަށެވެ.
ޤުރުއާނަކީ ދިރިއުޅުން ބައްޓަންކުރަންވީ ގޮތް ބުނެދޭ ފޮތްކަމަށާއި، ކިޔެވުމުގެ އިތުރުން ޤުރުއާނުގެ އިލްމު ފެތުރުމަށް މިފަހަރުގެ މުބާރާތުގައި ޚާއްސަ އިސްކަމެއް ދީފައިވާކަން ނައިބު ރައީސް ފާހަގަކުރެއްވިއެވެ. އަދި މުބާރާތާއެކު ކުރިއަށްދާ ޤުރުއާން ފެސްޓިވަލަކީ، މިކަން ވަރަށް ފުރިހަމައަށް ފެންނަ ކަމެއްކަމަށްވެސް އެމަނިކުފާނު ވިދާޅުވިއެވެ.
"އަހަރަމެއް އުޅެންވީ ގޮތް ޤުރުއާނުން ބުނެދެނީ. ޤުރުއާން ކިޔަވާ، ޤުރުއާނަަށް ލޯބިކުރާ، މާނަ އޮޅުންފިލުވާ އެ މަގުން އުޅޭބަޔަކަށް އަހަރަމެން ވާންވީ." ނައިބު ރައީސް ވިދާޅުވިއެވެ.
ނައިބު ރައީސް ވިދާޅުވީ ދީނީ ކަންކަން ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރާކަމަށެވެ. އެގޮތުން މިސްކިތްތައް ބިނާކުރުމާއި، ދިނީ ޕްރޮގްރާމްތައް އިތުރުކުރުމާއި ރަމަޟާންމަހު ހިންގާ ދީނީ ޕްރޮގްރާމްތައްވެސް އަތޮޅުތަކަށް ފުޅާކޮށްފައިވާކަމަށެވެ. އަދި ހުކުރު ޚުޠުބާވެސް، މުޖުތަމަޢުގައި ހުރި މައްސަލަތަކަށް އަލިއްއަޅުވާލާ ގެނެސްދެމުންދާކަމަށެވެ.
ކީރިތު ޤުރުއާނާ ބެހޭ މަރުކަޒާއި ހަވާލުވެ ހުންނެވި، މިނިސްޓްރީ އޮފް އިސްލާމިކް އެފެއާޒްގެ ސްޓޭޓް މިނިސްޓަރ އައްޝައިޚް އިލްޔާސް ޖަމާލު ވިދާޅުވީ މަރުކާޒު ހިންގާނެ ޖާގަ ސަރުކާރުން ކިންގް ސަލްމާން މިސްކިތުގައި ހަމަޖައްސައިދެއްވުމާއެކު މަރުކަޒުގެ މަސައްކަތްތަކަށް އިތުރު ކުރިއެރުންތައް ލިބިފައިވާކަމަށެވެ. އެގޮތުން ކްލާސްރޫމްތަކުގެ ތަނަވަސްކަމާއި، ކްލާސްތައް އިތުކުރުމާއި، ޤުރުއާނުގެ ޢިލްމު އުންގަންނައިދިނުމުގެ އާ ގޮތްތައްވެސް ފެށުމަށް ތައްޔާރުވަމުންދާކަމަށް އިލްޔާސް ޖަމާލް ވިދާޅުވިއެވެ.
"ލޯފަން ކުދިންނަށް ބްރައިލް ބޭނުންކޮށްގެން ކިޔަވައިދިނުމަށް، އެކަމަށް ބޭނުންވާ މުދައްރިސުން ތަމްރީން ކުރަން ފަށައިފިން. ވަރަށް އަވަހަށް މިގޮތަށް ކިޔަވައިދޭން ފެށޭނެ." ސްޓޭޓް މިނިސްޓަރ އިލްޔާސް ޖަމާލް ވިދާޅުވިއެވެ.
މިފަހަރުގެ މުބާރާތުގައި ސްކޫލްތައް، އަތޮޅުތަކުގެ ކައުންސިލްތައް، ކްލަބް ޖަމިއްޔާ ޖަމާތްތައް، ކުންފުނިތައް ޤުރުއާން ކްލާސްތައް، މުއައްސަސާތައް އަދި އަމިއްލަގޮތުން ބައިވެރިވާ ފަރާތްތަކާއި ޙާފިޡުން ޤުރުއާން ކިޔަވާނެއެވެ. އެގޮތުން ބަލައިގެން ކިޔެވުމުގެ ގޮފީގައި 600 ބައިވެރިން، ނުބަލާ ކިޔެވުމުގެ ގޮފީގައި 409 ބައިވެރިން، އަދި 13 ޙާފިޡުންގެ ހުށައެޅުން އޮންނާނެއެވެ.
މުބާރާތުގެ ކިޔެވުން 31 ޑިސެމްބަރުގެ ނިޔަލަށް ކުރިއަށްދާނެއެވެ. މި މުބާރާތުގެ ކިޔެވުން ޕީއެސްއެމްގެ މުންނާރު ޗެނަލްއިން ގެނެސްދޭނެއެވެ.