ވެލާނާ އިންޓަނޭޝަނަލް އެއަރޕޯޓްގައި ގިނަ އަދަދެއްގެ ޓޫރިސްޓް ރެޕްރެޒެންޓޭޓިވް ކައުންޓަރުތަކެއް ވިޔަފާރިތަކަށް ދޫކުރުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ހުޅުވާލައިފިއެވެ.
އެމްއޭސީއެލްއިން ބުނީ ވެލާނާ އިންޓަރނޭޝަނަލް އެއަރޕޯޓް، ވީ.އައި.އޭގެ އިންޓަނޭޝަނަލް ޓާރމިނަލްއިން 9 "ޓޫރިސްޓު ރެޕްރަޒެންޓޭޓިވް ކައުންޓަރު" ދޫކުރުމަށް ހަމަޖެހިފައިވާކަމަށެވެ. މި ކައުންޓަރުތަކަކީ ރާއްޖެ އަންނަ ފަތުރުވެރިންނާއި ގާތުން ޚިދުމަތްދިނުމަށް އަދި އެއަރޕޯޓްގައި އެމީހުން ބޭނުންވާ ކަންކަން ފަހިކޮށްދިނުމަށް ބަހައްޓާފައި ހުންނަ ކައުންޓަރުތަކެކެވެ.
އެމްއޭސީއެލްއިން ބުނީ މި ކައުންޓަރުތައް ދޫކުރާނީ ޓޫރިޒަމް މިނިސްޓްރީގައި ރަޖިސްޓްރީކޮށްފައިވާ ރިސޯޓް، ހޮޓެލް، ގެސްޓްހައުސް، ވެސަލް، ޔޮޓްމެރީނާ، ޑައިވްސެންޓަރ، ޓްރެވެލް އެޖެންސީތަކަށްކަމަށެވެ. އެހެންކަމުން ވިޔަފާރިތަކަށް މިކަމަށް އެދި ހުށައެޅުމުގެ އެންމެފަހު ތާރީހަކީ އަންނަ އަހަރުގެ ޖަނަވަރީ މަހުގެ 2 ވަނަ ދުވަހުގެ ކުރިންނެވެ.
ވީއައިއޭގައި މިހާރުވެސް ފަތުރުވެރިކަމުގެ ޚިދުމަތްދޭ ގިނަ ކުންފުނިތަކަކުން އަންނަނީ އެމީހުން ކައުންޓަރުތައް ހިންގަމުންނެވެ. މިއީ ރާއްޖޭގެ ފަތުރުވެރިކަމުގެ އެންމެ ހައި ސީޒަންއެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ މިހާތަނަށް ރާއްޖެއަށް 1،566،083 ފަތުރުވެރިން ވަނީ އައިސްފައެވެ. މިއީ 2021 ވަނަ އަހަރާއި އަޅާބަލާއިރު %27.6 ކުރިއެރުމެކެވެ.
ރާއްޖެ އަންނަ ފަތުރުވެރިންގެ އަދަދު އިތުރުވަމުން އަންނައިރު ވީއައިއޭގައި ވަސީލަތްތައް ތަރައްޤީކުރުމުގެ މަސައްކަތްވެސް އެމްއޭސީއެލްއިން އަންނަނީ ކުރަމުންނެވެ. އެގޮތުން މިދިޔަ އޮކްޓޯބަރމަހު ވަނީ ދުނިޔޭގެ އެންމެ ބޮޑު ސީޕްލޭން ޓަރމިނަލް ވީއައިއޭގައި ހުޅުވާފައެވެ. ވީއައިއޭގައި ހުޅުވާފައިވާ "ނޫވިލު" ސީޕްލޭން ޓަރމިނަލްއަކީ އެއަރކްރާފްޓް މެއިންޓެނަންސް އިމާރާތްތަކާއި، ޑޮކްތައް ހިމެނޭ ގޮތަށް، ޒަމާނީ ފެންވަރަކަށް ފަރުމާކުރެވިފައިވާ ޓަރމިނަލެކެވެ. މި ޓަރމިނަލްގައި 42 ލައުންޖް ހިމެނެއެވެ.
މީގެއިތުރުން ވީއައިއޭގެ އައު ރަންވޭވެސް ވަނީ އޮކްޓޯބަރ 6 ވަަނަ ދުވަހު ހުޅުވާފައެވެ. ދިގުމިނުގައި 3،400 މީޓަރު އަދި ފުޅާ މިނުގައި 65 މީޓަރު ހުންނަ މި ރަންވޭއަކީ ކޯޑް-އެފްގެ މިންގަނޑަށް ފެތޭގޮތަށް ތަރައްޤީކޮށްފައިވާ ރަންވޭއެކެވެ. މީގެކުރިން ރަންވޭ ބޭނުންކުރެވޭނީ ގަޑިއަކު 8 ނުވަތަ 10 ފްލައިޓަށެވެ. ނަމަވެސް އައު ރަންވޭއާއެކު ގަޑިއަކު ރަންވޭ ބޭނުންކުރާ ފްލައިޓްގެ އަދަދު ވަނީ ވިއްސަށްވުރެ އިތުރުވެފައެވެ.
އެއަރޕޯޓް ތަރައްޤީކުރުމުގެ މަސައްކަތުގެ ދަށުން މިހާރު އެންމެ ބާރަށް ކުރިއަށްދަނީ އައު ޕަސެންޖަރ ޓާމިނަލް އެޅުމުގެ މަސައްކަތެވެ. ވީ.އައި.އޭގައި މިހާރު ބޭނުންކުރާ އިންޓަރނޭޝަނަލް ޓަރމިނަލަކީ އަހަރަކު 1.5 މިލިއަން ފަސިންޖަރުންނަށް ޚިދުމަތް ދެވޭވަރުގެ ޓާރމިނަލެކެވެ. އެހެންނަމަވެސް އެންމެފަހުގެ ޒަމާނީ ވަސީލަތްތަކާއެކު އަލަށް ތަރައްޤީކުރާ އައު ޓަރމިނަލަކީ އަހަރަކު 7 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ ޓަރމިނަލެކެވެ. މި ޓަރމިނަލަކީ 78 ހާސް އަކަ މީޓަރުގެ ޖާގައިގެ ޓަރމިނަލެކެވެ.