ފްރާންސްގެ ޓޮޕް ލަގްޜަރީ ޓްރެވަލް ޓްރޭޑް ފެއަރ، އައިއެލްޓީއެމް ކާންސްގައި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީން ރާއްޖެ އިޝްތިހާރުކުރަން ފަށައިފިއެވެ.
ޑިސެމްބަރު މަހުގެ 5 ވަނަ ދުވަހުން 8 ވަނަ ދުވަހުގެ ނިޔަލަށް ކުރިއަށްދާ މިފެއަރގައި ޓޫރިޒަމް އިންޑަސްޓްރީގެ 13 ފަރާތަކުން ވަނީ ބައިވެރިވެފައެވެ.
އައިއެލްޓީއެމް ކާންސް އަކީ ފްރާންސްގައި ބާއްވާ ދުނިޔޭގެ އެންމެ ބޮޑު އެއް ލަގްޜަރީ ޓްރެވަލް ޓްރޭޑް ފެއާއެވެ. މި ފެއާގެ ޒަރިއްޔާއިން ފްރާންސް އަދި ބައިނަލްއަޤްވާމީ އެހެން މާކެޓްތަކުގެ ޓްރެވަލް ޓްރޭޑް ޕާޓްނަރުންނަށް ދުނިޔޭގެ ފާހަގަކޮށްލެވޭ އަދި އެކްސްކްލޫޒިވް ފަތުރުވެރިކަމުގެ ހިދުމަތްދޭ ފަރާތްތަކާއި، މަންޒިލްތަކާއި ބައްދަލުކޮށް، ވިޔަފާރީގެ މަޝްވަރާތަކާއި ގުޅުން ބަދަހިކުރުމަށް ފުރުސަތު ލިބެއެވެ.
ރާއްޖެއަކީ ތަފާތު އުފެއްދުންތަކާއި ހިދުމަތްތަކާއި ތަޖުރިބާތައް ލިބޭ އަލްޓްރާ ލަގްޒަރީ މަންޒިލެއްގެ ގޮތުގައި މަޝްހޫރު ގައުމެކެވެ. އެމްއެމްޕީއާރުސީގެ މާކެޓިންގ ސްޓްރެޓެޖީތައް ބިނާވެފައިވަނީ ލަގްޒަރީ ސެގްމަންޓާއި، އެހެނިހެން ސެގްމަންޓްތައް ދުނިޔޭގެ އެކި ޕްލެޓްފޯމްތަކުގައި ޕްރޮމޯޓުކުރުމުގެ މައްޗަށެވެ. އެމްއެމްޕީއާރުސީން އައިއެލްޓީއެމް ފެއަރގައި ބައިވެރިވެފައި ވަނީ ފްރާންސް އާއި އެހެން މާކެޓްތަކުގެ ޓޫރިޒަމް އޯޑިއަންސަށް ރާއްޖޭގެ ޕްރޮޑަކްޓްތަކާއި، ޚިދުމަތްތަކުގެ، އަދި ތަފާތު ތަޖުރިބާތަކުގެ އެންމެ ފަހުގެ މައުލޫމާތު ފޯރުކޮށްދިނުމުގެ މަޤްޞަދުގައެވެ.
އައިއެލްޓީއެމްގައި ރާއްޖޭގެ ސްޓޭންޑު ޑިޒައިން ކުރެވިފައިވަނީ ރާއްޖޭގެ ހައި އެންޑް ޓޫރިޒަމްގެ ސިފަތަކާއެކުއެވެ. މި އިވެންޓުގައި އެމްއެމްޕީއާރުސީން ފްރާންސްގެ ލަގްޒަރީ މާކެޓުގައި ހަރަކާތްތެރިވާ ޓްރެވަލް ޓްރޭޑް ޕާޓްނަރުންނާއެކު ޕްރީ ޝެޑިއުލް ބައްދަލުވުންތައް ބާއްވައި، ސްޓޭންޑަށް ޒިޔާރަތްކުރާ ފަރާތްތަކަށް މަންޒިލުގެ މައުލޫމާތާއި ޕްރޮމޯޝަނަލް މެޓީރިއަލް ފޯރުކޮށްދިނުމާއި، މާކެޓާ ބެހޭ އިތުރު މައުލޫމާތު ހޯދުމަށް ޓްރޭޑް ސާވޭތައް ކުރިއަށް ގެންދާނެއެވެ.
އެމްއެމްޕީއާރުސީގެ އަމާޒަކީ މިފެއަރ މެދުވެރިކޮށް ފްރާންސްގެ މާކެޓްގައި ހަރަކާތްތެރިވާ ޓްރެވަލް ޓްރޭޑާއި ނެޓްވޯކްކޮށް، ގުޅުން ބަދަހިކުރުމާއި، މަންޒިލުގެ އެންމެ ފަހުގެ އަޕްޑޭޓްތަކާއި، ރާއްޖޭގެގެ ޚާއްޞަ ޖިއޮގްރަފިކަލް ސިފަތަކާއި، ލަގްޒަރީ ސެގްމަންޓު މާކެޓް ކުރުމަށެވެ.
ފަތުރުވެރިންގެ މެދުގައި އެންމެ މަޤްބޫލު މާކެޓުތަކުގައި ރާއްޖޭގެ އެންމެ މަތީ މަޤާމު ދެމެހެއްޓުމަށާއި ލަގްޒަރީ ސެގްމަންޓުން އަންނަ މީހުން އިތުރުކުރުމަށް މާކެޓުގައި ރާއްޖޭގެ ބްރޭންޑް ހަރުދަނާ ކުރުމުގެ ފުރުސަތުވެސް މި ފެއަރއިން ލިބިގެންދެއެވެ. އަދި ސެގްމަންޓުން އަންނަ މީހުން އިތުރުކުރުމަށް މާކެޓުގައި ރާއްޖޭގެ ބްރޭންޑް ހަރުދަނާ ކުރުމުގެ ފުރުސަތު ވެސް މި އިވެންޓުން ލިބިގެންދެއެވެ.
ދުނިޔޭގެ ހުރިހާ ކަންކޮޅެއްގައިވެސް ރާއްޖެއަކީ ފަތުރުވެރިންގެ އިތުބާރު ލިބިފައިވާ މަންޒިލެއްކަމަށް ހެކިވާ އެންމެ އަލިގަދަ ނިޝާނަކަށް ވެގެންދިޔައީ، 'ވޯލްޑް ޓްރެވަލް އެވޯރޑްސް'، ޑަބްލިއުޓީއޭގައި 'ވޯލްޑްސް ލީޑިންގް ޑެސްޓިނޭޝަން' ގެ ލަޤަބު ޖެހިޖެހިގެން ތިންވަނަ ފަހަރަށް ރާއްޖެއަށް ކާމިޔާބު ކުރުމެވެ. މީގެ އިތުރުންވެސް އެތައް ޙާއްސަ އެވޯޑްތަކެއްދިވެހިރާއްޖެއިން ވަނީ ޑަބްލިއުޓީއޭ ގައި ޙާސިލްކޮށްފައެވެ. މިގޮތުން ރާއްޖޭގެ ތާރީޙުގައި ފުރަތަމަ ފަހަރަށް މި އަހަރު އެމްއެމްޕީއާރުސީއިން ވަނީ 'ވޯލްޑްސް ލީޑިންގ ޓޫރިސްޓް ބޯޑު'ގެ ލަޤަބުވެސް ހާސިލްކޮށްފައެވެ.