ސަރުކާރުން ގެންގުޅުއްވާ ސިޔާސަތުގެ ސަބަބުން ދުނިޔޭގެ އެހެން ބައެއް ޤައުމުތަކާއި އަޅާބަލާއިރު ރާއްޖެއަކީ ބޭރުގެ އިންވެސްޓަރުންނަށް ވަރަށް ފަހި މާހައުލެއްކަމަށް ރާއްޖޭގެ ފަތުރުވެރިކަމުގެ ދާއިރާއަށް އިންވެސްޓްކުރައްވައިގެން އުޅުއްވާ އިޓަލީވިލާތުގެ އިންވެސްޓަރެއްކަމަށްވާ އެލެކްސް އަޒޯލާ ވިދާޅުވެއްޖެއެވެ.
ޓުއަރ އޮޕަރޭޓަރ ވިޔަފާރިން ރާއްޖޭގެ ފަތުރުވެރިކަމުގެ ސިނާއަތަށް ވަދަވެޑައިގެންނެވި އެލެކްސް އަޒޯލާއަކީ ރާއްޖޭގައި ހިންގާ އިޓަލީގެ ލަޤްޒަރީ ހޮޓެލް ބްރޭންޑެއްކަމަށްވާ ކޮކޫން ކަލެކްޝަންގެ މެނޭޖިންގ ޑިރެކްޓަރެވެ.
ރާއްޖޭގައި ހުޅުވުނު ކޮކޫން ކަލެކްޝަންގެ ފުރަތަމަ ރިސޯޓަކީ 2015 ވަނަ އަހަރު ޅ.އަތޮޅުގައި ހުޅުވިގެންދިޔަ ކޮކޫން މޯލްޑިވްސްއެވެ. އެއަށްފަހު 2019 ވަނަ އަހަރު ރ.އަތޮޅުގައި ވަނީ ޔޫ އެންޑް މީ ބައި ކޮކޫންގެ ނަމުގައި އިތުރު ރިސޯޓެއްވެސް ހުޅުވާފައެވެ. އަދި އަންނަ އަހަރުގެ މޭމަހު މާލެ އަތޮޅުގައި "ޖޯއީ އައިލެންޑް"ގެ ނަމުގައި ކޮކޫން ކަލެކްޝަންގެ އިތުރު ރިސޯޓެއް ހުޅުވުމަށް މިހާރު ދަނީ މަސައްކަތްކުރަމުންނެވެ.
ޒުވާނުން ބިނާކޮށް، ތިމާވެށި ހިމަޔާތްކުރުމުގެ މަސައްކަތަށް ޤާއިމްވެގެންދިޔަ ކޮކޫން ފައުންޑޭޝަން ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ކޮކޫން ކަލެކްޝަންގެ މެނޭޖިންގ ޑިރެކްޓަރ އެލެކްސް އަޒޯލާ ވިދާޅުވީ ރާއްޖޭގައި އިންވެސްޓްކޮށްގެން މަސައްކަތްކުރުމަކީ ލިބޭ ވަރަށް ބޮޑު އުފަލެއްކަމަށާއި، ރާއްޖެއަކީ ފަތުރުވެރިކަމުގެ ދާއިރާއިން ގިނަ މަސައްކަތްތަކެއް ކުރެވެން އޮތް ޤައުމެއްކަމަށެވެ.
އެލެކްސް ވިދާޅުވީ ރާއްޖެއަކީ އިންވެސްޓަރުންނަށް ވަރަށް ފަހި ފުރުސަތުތަކެއް އޮތް މަންޒިލެއްކަމަށާއި، ސަރުކާރުންވެސް އިންވެސްޓަރުންނަށް ވަރަށް ބޮޑު އެއްބާރުލުމެއް ދެއްވާކަމަށެވެ. އަދި ސަރުކާރުން ސިނާއަތް ކުރިއަރުވަމުން ވިޔަފާރިވެރިންނަށް ދެއްވާ އެއްބާރުލެއްވުމަކީ ފަތުރުވެރިކަމުގެ ދާއިރާއިން ރާއްޖެއަށް ލިބޭ ކުރިއެރުމާއި ކާމިޔާބީގެ ސިއްރުކަމަށް އެލެކްސް ވިދާޅުވިއެވެ.
"ސަރުކާރުން ވަރަށް ބޮޑަށް އެހީތެރިވެދޭ ފަތުރުވެރިކަމުގެ ދާއިރާގެ މަޝްރޫއުތައް ހިންގުމަށް. ރާއްޖޭގައި ވިޔަފާރިކުރަން އޮންނަ ފަހި މާހައުލަކީ ފަތުރުވެރިކަމުގެ ދާއިރާގެ އެންމެ މަތީ ފަންތީގައި ރާއްޖެ މިއަދު އޮންނަ ސަބަބު" އެލެކްސް ވިދާޅުވިއެވެ.
އެލެކްސް ވިދާޅުވީ އޭނާއަކީ ދުނިޔޭގެ އެހެން ބައެއް ޤައުމުތަކުގައިވެސް އިންވެސްޓްކޮށްގެން އުޅޭ މީހެއްކަމަށާއި، ނަމަވެސް ރާއްޖެއާ އަޅާބަލާއިރު އެހެން ޤައުމުތަކުގައި ފަތުރުވެރިކަމުގެ ވިޔަފާރި ހިންގުން ދަތިކަމަށެވެ. އެހެންކަމުން ސަރުކާރުން ދެއްވާ އެއްބާރުލެއްވުމަށް އެލެކްސް ވަނީ ޝުކުރު އަދާކުރައްވާފައެވެ.
"އަޅުގަނޑަކީ ވަރަށް ގިނަ އެހެން ޤައުމުތަކުގައި އިންވެސްޓްކޮށްގެން އުޅޭ މީހެއް. އެހެން ޤައުމުތަކުގައި ސަރުކާރުން މިކަމަށް އެއްބާރުލުން ހޯދުން ވަރަށް ދަތި. ޒަންޒިބާރު، އިޓަލީ އަދި ލަންކާގައި މިފަދަ ކަންކަން ވަރަށް ދަތި. އެހެންކަމުން ސަރުކާރަށް ވަރަށް ބޮޑަށް ޝުކުރު ދަންނަވަން އަޅުގަނޑުމެންގެ މަސައްކަތަށް ތިދެއްވާ އެހީތެރިކަމަށް" އެލެކްސް ވިދާޅުވިއެވެ.
ސަރުކާރުގެ ސިޔާސަތުތަކަށް ބޭރުގެ އިންވެސްޓަރުން ތައުރީފްކުރައްވާއިރު، ސަރުކާރުން ގެންދަވަނީ ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރުން ފަސޭހަކޮށްދިނުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން އިންވެސްޓަރުންނަށް ފަހިވާނޭ ފަދައިން ޤާނޫނުތަކާއި ސަރުކާރުގެ ސިޔާސަތުތަކަށް ދަނީ ބަދަލުތައް ގެންނަވަމުންނެވެ. އަދި ރާއްޖޭގައި އިންވެސްޓްކުރުމަށް ހުރި ފުރުސަތުތަކުގެ މައުލޫމާތު ދުނިޔޭގެ އެކި ކަންކޮޅުތަކުގައި ހަރަކާތްތެރިވާ އިންވެސްޓަރުންނަށް ދަނީ ފޯރުކޮށްދެމުންނެވެ.