ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ބައިނަލްއަޤްވާމީ ލަގްޒަރީ ޓޫރިޒަމް ބްރޭންޑެއްކަމަށްވާ، ކޮކޫން ކަލެކްޝަންސްއިން މުޖްތަމައުއަށް އެހީވުމުގެ ގޮތުން "ކޮކޫން ފައުންޑޭޝަން" ނަމުގައި ފައުންޑޭޝަނެއް އިފްތިތާހުކޮށްފިއެވެ.
ރ.އަތޮޅުގައި އޮންނަ "ޔޫ އެންޑް މީ ބައި ކޮކޫން"ގައި ބޭއްވި ރަސްމިއްޔާތެއްގައި މި ފައުންޑޭޝަން އިފްތިތާހުކޮށްދެއްވީ ޓޫރިޒަމް މިނިސްޓަރ އަބްދުﷲ މައުސޫމާއި، ކޮކޫން ކަލެކްޝަންގެ އިސް ވެރިންނެވެ.
ކޮކޫން މޯލްޑިވްސް ރާއްޖޭގައި ޤާއިމުވިތާ 7 އަހަރުވީއިރު، މުޖްތަމައުއަށް އެހީތެރިވުމަށް އެކުންފުނިން އިފްތިތާހުކުރި ފައުންޑޭޝަންގެ އެންމެ ބޮޑު މަޤްޞަދަކީ ތިމާވެށި ރައްކާތެރިކުރުމާއި، މުޖްތަމަޢުއަށް އެހީތެރިވެ އެކި ދާއިރާތަކުން ޒުވާނުން ބިނާކުރުމެވެ.
ކޮކޫން ފައުންޑޭޝަން އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވީ ސީއެސްއާރު ނުވަތަ ވިޔަފާރިތަކުން މުޖްތަމައުއަށް އެހީތެރިވުމަކީ ވަރަށް އާއްމު ބަހެއް ނަމަވެސް، އެކަން ހަގީގީ މާނައިގެ ކުރާ މަންޒަރު އެހާ އާއްމު ނޫންކަމަށެވެ. ނަމަވެސް މީހުން ބިނާކުރުމުގެ މަސައްކަތަށް ހާއްސަކޮށްގެން ފައުންޑޭޝަނެއް އުފެދިގެން ދިއުމަކީ ސަރުކާރުން އެކަން ވަރަށް ބޮޑަށް ބަލައިގަންނަކަމެއްކަމަށް މިނިސްޓަރ ވިދާޅުވިއެވެ.
"މީހުން އަހާ އަޅުގަނޑު ކައިރީ ކޮބާހޭ އެންމެ އުނދަގޫކަމަކީ ޓޫރިޒަމަށް އޮތް. އާދެ، އެއީ މުވައްޒަފުންގެ ދަތިކަން. ރާއްޖޭގެ ޓޫރިޒަމް މިދާ ސްޕީޑުގައި ބޭނުންވާ މުވައްޒަފުން ނުއުފެއްދުން. މި ޕްރޮޖެކްޓް ސަބަބުން މީހުން ބިނާކުރުމަށް އިސްކަމެއްދޭ. އެއީ ސަރުކާރުގެ މީހުން ބިނާކުރުމުގެ ސިޔާސަތާއި ލާމެހިފައިވާ ކަމެއް. އެހެންވީމަ ވަރަށް މުހިއްމު މި ފައުންޑޭޝަނުން ކުރާ މަސައްކަތް.
ފައުންޑޭޝަނުން ދެން ކުރާ ކަމަކީ ތިމާވެށި ރައްކާތެރިކުރުން. ރާއްޖެއިން މަސައްކަތްކުރަނީ ދެމެހެއްޓެނިވި ޓޫރިޒަމްގެ ނަމޫނާއެއް ދައްކަންކަމަށްވާއިރު، މިކަމުގައި އިންޑަސްޓްރީގެ ބައިވެރިވުން ލިބޭކަމީ ވަރަށް ބޮޑު ހިތްހަމަޖެހުމެއް"
ކޮކޫން ކަލެކްޝަންގެ ކޯޕަރޭޓް ޖެނެރަލް މެނޭޖަރ އަހުމަދު ޖިހާދު ވިދާޅުވީ ކުރިއަރަމުން އަންނަ ލަގްޒަރީ ބްރޭންޑެއްގެ ހައިސިއްޔަތުން މުޖްތަމުއަށް އެހީތެރިވެދިނުމަކީ ލިބޭ ވަރަށް ބޮޑު އުފަލެއްކަމަށެވެ. އަދި މި ފެށޭ މަސައްކަތާއެކު ރ.އަތޮޅާއި ޅ.އަތޮޅުގެ ކައުންސިލްތަކާއި އެންޖީއޯތައް ގުޅިގެން ޒުވާނުންނަށާއި މުޖްތަމަޢުއަށް ފައިދާކުރަނިވި ތަފާތު މަސައްކަތްތައް ކުރަމުންދާނޭކަމަށް ޖިހާދު ވިދާޅުވިއެވެ.
"ފަތުރުވެރިކަމުގެ ދާއިރާގެ ކުރީކޮޅު ސިނާއަތުގެ އިސް މަޤާމްތަކަށް ދިވެހިން އައުމަށް ވަރަށް ބޮޑެތި ގޮންޖެހުންތައް ހުރި. ދިވެހިން އެ މަގާމްތަކަށް ޝަރުތު ހަމަނުވާކަމަށް ބައެއް މީހުން ދިޔައީ ބުނަމުން. އަދި އަތޮޅުތަކާއި ރަށްތަކުގެ ވަސީލަތްތައް ބޭނުންކޮށްގެން އިންވެސްޓްމަންޓްތައް ތަރައްޤީކުރާއިރު ބައެއް ވިޔަފާރިތައް ރާއްޖެއަށް އަންނަނީ އެއްވެސް ވަރަކަށް މުޖްތަމައުއަށް އެހީތެރިވުމުގެ ވިސްނުމެއް އޮވެގެން ނޫން. ކޮކޫން ފައުންޑޭޝަނުން މަސައްކަތްކުރާނީ ރަށްރަށުގެ ކައުންސިލްތަކާއި އެންޖީއޯތަކާއި ގުޅިގެން އިންސާނީ ވަސީލަތްތައް އިތުރަށް ތަރައްޤީކޮށް، ރަށްރަށުގެ ރައްޔިތުންގެ ދިރިއުޅުމުގެ ފެންވަރު އިތުރަށް ރަނގަޅުކޮށްދޭން" ރާއްޖޭގެ ފަތުރުވެރިކަމުގެ ސިނާއަތުގައި 20 އަހަރަށްވުރެ ގިނަ ދުވަސްވަންދެން ހިދުމަތްކުރާއްވާފައިވާ، ކޮކޫން ކަލެކްޝަންގެ ކޯޕަރޭޓް ޖެނެރަލް މެނޭޖަރ އަހުމަދު ޖިހާދު (ޖޭ) ވިދާޅުވިއެވެ.
ކޮކޫން ކަލެޝަންގެ މެނޭޖިންގ ޑިރެކްޓަރ އެލެކްސް ވިދާޅުވީ އޭނާގެ އާއިލާއިން 1982 ވަނަ އަހަރުން ފެށިގެން ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވަމުން އަންނަކަމަށެވެ. އަދި މުޖްތަމައަށް އެހީތެރިވުމަށް ކޮކޫންއިން ބޭނުންވަނީ ފައިސާތަކެއް ދޭން ނޫންކަމަށާއި، އޭގެ ބަދަލުގައި ބޭނުންވަނީ ޒުވާނުން އެކި ދާއިރާތަކުން ބިނާކޮށްގެން މުޖްތަމަޢުއަށް އެހީތެރިވުންކަމަށް އެލެކްސް ވިދާޅުވިއެވެ.
"މީގެ ދުވަސްކޮޅެއް ކުރިން ފެށި މަސައްކަތެއް ހަގީގަތަކަށްވުންކަމަށެވެ. ކޮކޫންއިން ބޭނުމެއް ނުވޭ ހައިރާތެއް ކުރާކަށް. އެއީ ހައިރާތެއް ކުރުމުން އޭގެއިން ފައިދާވާނީ ދުވަސްކޮޅަކަށްކަމަށާއި، އޭގެ ބަދަލުގައި ކޮކޫންއިން ބޭނުންވަނީ މަސައްކަތްތެރި ޒުވާނުންތަކެއް ބިނާކޮށް، އެމީހުންގެ އަމިއްލަ ފައި މައްޗަށް ތެދުވާ ތަން ބަލަން" އެލެކްސް ވިދާޅުވިއެވެ.
އިޓަލީގެ ކޮކޫން ބްރޭންޑުން ފުރަތަަމަ ރިސޯޓް ރާއްޖޭގައި ހުޅުވީ 2015 ވަނަ އަހަރު އެވެ. އެއީ ޅ. އަތޮޅު ކޮކޫން މޯލްޑިވްސްއެވެ. އަދި އޭގެ ފަހުން ރ. އަތޮޅުގައި ކޮކޫން ޔޫ އެންޑް މީ ގެނަމުގައި މޫދު އަޑީގެ ރެސްޓޯރެންޓަކާއެކު ރިސޯޓެއް ވަނީ ހުޅުވާފައެވެ. ރާއްޖޭގެ އިތުރުން ކޮކޫން ދަނީ ޒަންޒިބާރުގައި ރިސޯޓް ހޮޓާ ހިންގަމުންނެވެ.