ބަރަހަނާ ފިލްމުތަކެއް ހަދައި އެ އެއްޗެހި މޮބައިލް ޕްލެޓްފޯމެއްގައި ދައުރުކުރި ކަމަށް ބުނާ މައްސަލައެއްގެ ތުހުމަތުގައި ބޮލީވުޑްގެ ބަތަލާ ޝިލްޕާ ޝެޓީގެ ފިރިމީހާ އަދި އިންޑިއާގެ ވިޔަފާރިވެރިޔާ ރާޖް ކުންދުރާގެ މައްޗަށް އަނެއްކާވެސް އިތުރު ދައުވާއެއް އުފުލައިފިއެވެ.
މި މައްސަލައިގައި ރާޖް ހައްޔަރުކޮށްފައި ހުއްޓައި ކަފާލާތުގެ ދަށުން ދޫކޮށްލާފައި ވަނީ މިދިޔަ ސެޕްޓެމްބަރުމަހުއެވެ. އޭގެފަހުން ނޫސްވެރިންނަށް ފިލަން ވެގެން ރާޖް ބޭރަށް ނިކުމެ އުޅެނީ ފޭސް މާސްކު އަޅައި މޫނު ނިވާކޮށްގެނެވެ.
މިކަމާއި ގުޅިގެން އެންމެ ފަހުގެ ރިޕޯޓުތައް ބުނާ ގޮތުގައި ރާޖަށް މިހާރު ކޮށްފައިވާ ތުހުމަތަކީ އިންޑިއާގެ މުއްސަނދި ހޮޓާ ތަކުގައި ބަރަހަނާ ފިލްމުތައް ޝޫޓްކޮށް އެ އެއްޗެހި އޯޓީޓީ ޕްލެޓްފޯމުތަކުގައި ބެހުމުގެ ތުހުމަތެވެ. ރާޖަށް މި ތުހުމަތު ކޮށްފައި މިވަނީ ދެ މަފިރިންގެ ކައިވެންޏަށް 13 އަހަރު ފުރޭ ދަނޑިވަޅާއި ދިމާކޮށް ކަމަށްވެސް ރިޕޯޓުތައް ބުނެއެވެ.
ވެބް ސީރީޒްތަކާއި ފިލްމުތަކުން ފުރުޞަތު ދޭނެ ކަމަށް ބުނެ ބަރަހަނާ ފިލްމުތައް ރާޖް ކުޅުވި ކަމުގައި ބައެއް ބަތަލާއިންވެސް ވަނީ ބުނެފައެވެ.
އެ ގޮތުން ބަރަހަނާ ފިލްމުތައް ކުޅުމުގައި ބައިވެރިވި ޝާލީން ޗޯޕްޅާ އާއި ޕޫނަމް ޕާންޑޭ ފަދަ ބަތަލާއިން ވެސް ވަނީ ރާޖާއި ދެކޮޅަށް ވާހަކަ ދައްކާފައެވެ. މި ފިލްމުތައް ކުޅުވުމުގެ އެންމެ އަޑީގައި ހުރީ ރާޖް ކަމަށްވެސް އެމީހުން ތުހުމަތު ކުރެއެވެ. މި މައްސަލައިގައި ފިލްމު ޕްރޮޑިއުސަރު މީތާ ޖުންޖުންވާލާ އާއި ކެމެރާމަން ރާޖޫ ޑޫބޭ އަށް ވެސް ތުހުމަތު ކުރާ ކަމަށް ރިޕޯޓުތައް ބުނެއެވެ.
ރާޖަކީ އަބަދު ވެސް އެކި ތުހުމަތުތައް ކުރެވި އޭނާގެ ވާހަކަ މީޑިއާތަކުގެ ފަލަ ސުރުޚީތަކަށް އަރާ މީހެކެވެ. މީގެކުރިން އޭނާގެ މައްޗަށް ތުހުމަތު ކުރެވިފައި ހުރީ ވިޔަފާރީގެ ތެރޭގައި މަކަރާއި ހީލަތް ހެދުމުގެ މައްސަލަތަކެވެ.