ޑިޒައިން އެންޑް ބިލްޑް އުސޫލުން، ނ.ހޮޅުދޫގެ މަގުތައް ޒަމާނީ ފެންވަރަށް ތަރައްޤީކުރުމުގެެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން އާރްޑީސީއާ ހަވާލުކޮށްފިއެވެ.
މި މަސައްކަތުގެ އެއްބަސްވުމުގައި މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤްއެވެ. މި މަސައްކަތުގެ ކޮންޓްރެކްޓަރ ރޯޑް ޑިވެލޮޕްމަންޓް ކޯޕަރޭޝަންގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މޫސާ އަލީ މަނިކެވެ.
ނ.ހޮޅުދޫގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތަކީ ރަށުގެ ކައުންސިލުންވެސް ސަރުކާރުގައި އެދެމުން އަންނަ މަސައްކަތަކެވެ. އަދި މިއަހަރުގެ ޖޫން މަހު، ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ހޮޅުދުއަށް ކުރެއްވި ދަތުރުފުޅުގައިވެސް ރަށުގެ ކައުންސިލުން ވަނީ، އެރަށުގެ މަގުތައް ތަރައްޤީކޮށްދެއްވުމަށް ރައީސްއަށް ދަންނަވާފައެވެ.
މަގުތައް އަޑިގުޑަންވުމާއި ވިއްސާރަ ދުވަސްވަރު މަގުތަކުގައި ފެން ބޮޑުވާ މައްސަލަ އެރަށަށް ބޮޑެވެ.
ހޮޅުދޫގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ދަށުން ރަށުގެ 4.3 ކިލޯމީޓަރުގެ މަގުގައި ތާރު އަޅައިގެން ތަރައްޤީކުރާނެއެވެ. މިމަޝްރޫއުގައި ހިމަނާފައިވަނީ ރަށުގެ މުހިންމު މުއައްސަސާތައް ހުރި މަގުތަކާއި، އާއްމުން ގިނައިން ޚިދުމަތްތައް ހޯދުމަށް ބޭނުންކުރާ މަގުތަކެވެ.
މަގުހެދުމުގެ މަސައްކަތުގެ ދަށުން ފެން ހިންދާ ނިޒާމު ޤާއިމުކުރުމާއި، މަގު ބައްތި ޖެހުމުގެ މަސައްކަތްވެސް ހިމެނެއެވެ.
މިމަސައްކަތް އާރްޑީސީއާ ހަވާލުކޮށްފައިވަނީ 1 އަހަރާ 3 މަސް ދުވަހުން ނިންމާގޮތަށެވެ. އާރްޑީސީއާ ހޮޅުދޫގެ މަގުތައް ތަރައްޤީކުރުމަށް ހަވާލުކޮށްފައިވަނީ 71 މިލިއަނަށްވުރެ ގިނަ ރުފިޔާއަށެވެ.