ރާއްޖޭގައި ފުރަތަމަ ފަހަރަށް ފާހަގަކުރާ ޑިމޮކްރަސީ ހަފްތާގެ އިންތިޒާމްތަކުގެ އެންމެ ފަހުގެ ތައްޔާރީތައް ހއ. ހޯރަފުށި ރައްޔިތުން ކުރަމުން އެބަގެންދެއެވެ. "ޑިމޮކްރަސީގައި އެންމެންގެ ބައިވެރިވުން" މި ޝިޔާރުގެ ދަށުން ފާހަގަކުރާ ޑިމޮކްރަސީ ހަފްތާގެ ޙަރަކާތްތައް ހއ. ހޯރަފުށީގައި ހޯމަ ދުވަހުން ފެށިގެން ކުރިޔަށްދާނެއެވެ.2008 ވަނަ އަހަރު ޢަމަލުކުރަން ފެށި ދިވެހި ޖުމްހޫރިއްޔާގެ ޤާނޫނު އަސާސީއާއެކު ދިމިޤްރާތީ ވެށީތަކުގައި ރައްޔިތުންނަށް ލިބިދޭ އެތައް ޙައްގުތަކެއް ދިވެހިންނަށް ވަނީ ލިބެން ފަށާފައެވެ. އާ ޤާނޫނު އަސާސީއާއެކު ރާއްޖޭގައި ފުރަތަމަ ފަހަރަށް މަލްޓި ޕާޓީ އިންތިޚާބެއް ބާއްވައި ޒަމާނީ ޑިމޮކްރެޓިކް ވެރިކަމެއް ޤާއިމްކުރެވުނެވެ. އެ ބަދަލާއެކު ދިވެހިން ޒަމާންނުންސުރެ ނުދެކޭ އެތައް ޙައްގުތަކެއް ލިބިގެން ދިޔައެވެ.2008 ވަނަ އަހަރު ރާއްޖޭގައި ޤާއިމްވި ޑިމިކްރެޓީކް ނިޒާމްގެ ތެރއިން މިނިވަން އެތައް މުވައްސަސާތަކެއް އުފެދި ޑިމޮކްރަސީ ނެގެހެއްޓުމަށް އެތައް މަސައްކަތެއް ކުރެވެން ފެށުނެވެ. އެހެންމަވެސް ޅަފަތުގައި އޮތް ޑިމޮކްރަސީގައި ގިނަ ގޮންޖެހުންތަކެއް ރާއްޖެއަށް ކުރިމަތިވަމުންދާއިރު ކަމާގުޅޭ މުވައްސަސާތައް ގުޅިގެން މަސައްކަތްކުރަމުން ދަނީ ރައްޔިތުންނާއެކު ރާއްޖޭގައި ފައްކާވަމުން އަންނަ ޑޮމޮކްރަސީއަށް ރައްޔިތުން ހޭލުންތެރިކުރުވައި އެކަމުގައި ރައްޔިތުން ބައިވެރިވުން އިތުރުކުރުމަށް ގިނަ ގުނަ މަސައްކަތްތަކެއް ކުރަމުންނެވެ. މި ގޮތުން ޑިމޮކްރަސީއަށް ރައްޔިތުން ހޭލުންތެރިކުރުވައި އެންމެންގެ ބައިވެރިވުން އިތުރުކުރެއްވުމަށް އިލެކްޝަންސް ކޮމިޝަނުން އިސް ނަންގަވައިގެން ރާއްޖޭގައި ފާހަގަކުރައްވާ ފުރަތަމަ ޑިމޮކްރަސީ ހަފްތާގެ މުހިއްމު ޙަރަކާތްތައް ފެއްޓެވުމުގެ ވަގުތު މިވަނީ ކުޑަތަންވެފައެވެ. ޑިމޮކްރަސީގައި އެންމެންގެ ބައިވެރިވުން މި ޝިޢާރުގެ ދަށުން ފާހަގަކުރައްވާ ހަފްތާގެ ޙަރަކާތްތައް އާދީއްތަ ދުވަހު ފެށިފައިވާއިރު މި ހަފްތާގެ އެންމެ މުހިއްމު ޙަރަކާތްތައް ހއ. ހޯރަފުށީގައި ހިންގެވުމަށް އެރަށު ރައްޔިތުން ދަނީ ވަރަށް ފޯރީގައި މަސައްކަތް ކުރަމުންނެވެ. އުމުރުން ދުވަސްވީ މީހުންނާއި ޒުވާނުނާއި އަންހެނުން މިހާރު ދަނީ ޑިމޮކްރަސީ ހަފްތާގައި ބައިވެރިވުމަށް މިރަށަށް ވަޑައިގަންނަވާ މެހެމާނުންނަށް މެހްމާންދާރީ އަދާކުރުމަށް ރަށުތެރެ ޒީނަތްތެރި ކުރަމުންނެވެ. ފިރިހެންވެރިން ރަށުގެ ބަންދަރުމަތީ ދިދަ ދަމައި ކުލަ ލައި ޒީނަތްތެރި ކުރަމުންދާއިރު އަންހެންވެރިން ރަށުތެރެ ކުނިކަހައި ސާފުކުރަމުންދެއެވެ. ޒުވާނުން ފެންނަނީ ކުލަބޮކިން ރަށުތެރެ ޒީނަތްތެރިކުރުމުގައި އަވަދިނެތި އުޅެމުންދާތަނެވެ.ރާއްޖޭގެ ހުރިހާ ހިސާބެއްގައި އޮންނަހެން ސިޔާސީ ގޮތުން ފިކުރު ތަފާތުކަން ހޯރަފުށީގައިވެސް އޮތްއިރު ޑިމޮކްރަސީ ހަފްތާއަށް ތައްޔާރުވުމުގައި އެންމެންވެސް މަސައްކަތް ކުރަމުންދަނީ ޚިޔާލް ތަފާތުވުންތައް ދުރުގައި ބޭއްވުމަށްފަހު އެންމެ އެކުގައި އަތުކުރި އޮޅާލައިގެންނެވެ. ހޯރަފުށީ ކައުންސިލްގެ ރައީސް ޢަލީ ޢާރިފް ވިދާޅުވީ ޑިމޮކްރަސީ ހަފްތާއަށް ތައްޔާރުވުމުގެ މަސައްކަތް ކުރިޔަށްދަނީ ހުރިހާ ރައްޔިތުންގެ ފުރިހަމަ އެއްބާރުލުމާ އެކުކަމަށެވެ. އަދި މިކަމުގައި ހުރިހާ ގިންތިއެއްގެ މީހުން ބައިވެރިވާކަން އޭނާ ފާހަގަކުރެއްވިއެވެ. ޑިމޮކްރަސީ ހަފްތާއަށް ތައްޔާރުވުމުގެ މަސައްކަތްތައް ހޯރަފުށިގައި ކުރިޔަށްދާއިރު އެކަމުގައި ރަށު ރައްޔިތުންގެ އިތުރުން ސަރުކާރުގެ މުވައްސަސާތަކުންވެސް ބައިވެރިވަމުންދެއެވެ. ހޯރަފުށީ ދައިރާގެ މެމްބަރު މުޙައްމަދު އިސްމާޢީލް ވިދާޅުވީ މިހަފްތާ ފާހަގަކުރުމުގެ އެންމެ ބޮޑު ބޭނުމަކީ ޑޮމިކްރަސީއަށް އަހައްމިޔަތަކަން ސަރުކާރުންދޭ މިންވަރު މުޅި ރާއްޖޭގެ ރައްޔިތުންގެ ކިބައިގައި އަށަގެންނެވުން ކަމަށެވެ. މި ގޮތުން މިއީ އެކަމުގެ ފުރަތަމަ މަރްޙަލާކަމަށް މުޙައްމަދު އިސްމާޢީލް ވިދާޅުވިއެވެ. ޑިމޮކްރަސީ ހަފްތާގައި ހޯރަފުށީގައި ހިންގާ ޙަރަކާތްތަކުގައި ބައިވެރިވުމަށް ގިނަ ޢަދަދެއްގެ މެހުމާނުން ހޯރަފުށްޓަށް ޒިޔާރަތްކުރެއްވުމަށް ހަމަޖެހިފައިވާކަމުގައި އިލެކްޝަންސް ކޮމީޝަނުން ވިދާޅުވެއެވެ. ކޮމިޝަންގެ މެމްބަރ އަޙުމަދު އަކްރަމް ވިދާޅުވީ ރާއްޖޭގެ ހުރިހާ މުއައްސަސާއަކުން މި ޙަރަކާތްތަކުގައި ބައިވެރިވުމަށް 500 އެއްހާ ބޭފުޅުން މާލެއިން ވަޑައިގަންނަވާއިރު މި ވަފްދުތައް ހޯރަފުށްޓަށް އަންނަން ފަށާނެކަމަށެވެ. ޑިމޮކްރަސީ ހަފުތާގެ ޙަރަކާތްތަކަށް ހޯރަފުށް ޒިޔާރަތްކުރާ ވަފްދުތަކަށް މަރުޙަބާ ކިޔުމަށް ހޯރަފުށި ރައްޔިތުން ރެއާއި ދުވާލު މަސައްކަތް ކުރަމުންދަނީ ނުހަނު ޖޯށާއި ފޯރީގައެވެ.ޑިމޮކްރަސީ ހަފްތާގެ ޙަރަކާތްތަކުގެ އެންމެ ފަހުގެ ތައްޔާރީތައް ހޯރަފިށީގެ މަގުތައް މަތިން ފެންނަމުންދާއިރު މަސައްކަތް ކުރަމުންދާ މީހުންނަށް ހިތްވަރުދިނުމުގައި ވެސް އެއްބަޔަކު އުޅެއެވެ. މި މަންޒަރުތައްވެސް ސިފަވެގެންދަނީ ދިވެހިންގެ ޘަޤާފަތާއި ރައްޔިތުންގެ ތެރޭގައި އޮތް އެއްބައިވަންތަކަމާއި އެކުވެރިކަމެވެ.