ރާއްޖެއަންނަން ހަމަޖެހިފައިވާ އިންޑިޔާގެ ހަނގުރާމަމަތީ މަތިންދާބޯޓު އުފުލާ މަނަވަރާއި އިންޑިޔާ ނޭވީގެ އިތުރު 2 މަނަވަރު މާލޭ ބަނދަރުގައި ބަނދަރުކޮށްފައި އޮންނައިރު، އެ އުޅަނދުތަކާއި 1 މޭލަށްވުރެ ގާތުން ދަތުރު ނުކުރުމަށް މިސަރަޙައްދުގައި ކަނޑުދަތުރުކުރާ އުޅަނދުތަކަށް ޑިފެންސް މިނިސްޓްރީން އަންގައިފިއެވެ.މި ހިނގާ ފެބްރުއަރީ މަހުގެ 15 އިން 18 އަށް ރަސްމީ ދަތުރެއްގައި ރާއްޖެ އައުމަށް ހަމަޖެހިފައިވާ އިންޑިޔާގެ ހަނގުރާމަމަތީ މަތިންދާބޯޓު އުފުލާ މަނަވަރާއި އިންޑިޔާ ނޭވީގެ އިތުރު 2 މަނަވަރު މާލޭ ބަނދަރުގައި ބަނދަރުކުރުމަށް ހަމަޖެހިފައިވާކަމަށް ޑިފެންސް މިނިސްޓްރީން މިރޭ ނެރުނު ބަޔާނުގައި ވިދާޅުވެފައިވެއެވެ.ދިވެހިރާއްޖެއާއި އިންޑިޔާއާއި އޮތް ގާތް ގުޅުން ރަމްޒުކޮށްދިނުމުގެ ދަތުރެއްގައި އިންޑިޔާ ކަނޑުގެ ސިފައިންގެ މަނަވަރު އައި.އެން.އެސް ވިކްރަމަދިތްޔާ މާދަމާ ރާއްޖެ އަންނާނެއެވެ. އައި.އެން.އެސް ވިކްރަމަދިތްޔާ ރާއްޖެއަށް ކުރާ މިދަތުރުގައި، އައި.އެން.އެސް ދީޕަކް ބައިވެރިވާނެ ކަމަށް ރާއްޖޭގައި ހުންނަ އިންޑިއަން ހައިކޮމިޝަނުން ވިދާޅުވެއެވެ. މާދަމާއިން ފެށިގެން މިމަހުގެ 18 ވަނަ ދުވަހާއި ހަމައަށް އައި.އެން.އެސް ވިކްރަމަދިތްޔާ ރާއްޖެއަށް ކުރާ މިދަތުރަކީ، ދެ ޤައުމުގެ ދެމެދުގައި އޮތް ގާތް ގުޅުމާއި، އަސްކަރީގޮތުން ދެޤައުމުގެ ދެމެދުގައި އޮތް ފުރިހަމަ އެއްބާރުލުން ރަމްޒުކޮށްދޭ ދަތުރެއް ކަމަށް އިންޑިއާ ހައިކޮމިޝަނުން ސިފަކުރެއެވެ.މި 3 މަނަވަރު ރާއްޖެއަށް ކުރާ މިދަތުރަކީ މިމަހުގެ 7 - 9 އަށް އިންޑިޔާއިން ބޭއްވި ފްލީޓް ރިވިއުގައި ބައިވެރިވުމަށްފަހު ކުރާ ދަތުރެކެވެ. އައި.އެން.އެސް ވިކްރަމަދިތްޔާއަކީ އިންޑިޔާގެ އަސްކަރިއްޔާގެ މަތިންދާބޯޓު އުފުލާ މަނަވަރުތަކުގެ ތެރެއިން އެންމެ ފަހުން ޚިދުމަތާއި ގުޅުނު މަނަވަރެވެ. މިއީ 285 މީޓަރު ދިގު، 60 މީޓަރު ފުޅާ، އައި.އެން.އެސް ވިކްރަމަދިތްޔާ ބޭރު ޤައުމަކަށް ކުރާ ފުރަތަމަ ދަތުރެވެ. މި އުޅަނދާއިއެކު ރާއްޖެއަށް އަންނަ އައި.އެން.އެސް ދީޕަކަކީ 2014 ވަނަ އަހަރުގެ ޑިސެމްބަރު މަހު މާލެއަށް ކުރިމަތިވި ފެނުގެ ކާރިޘާއާއި ގުޅިގެން ރާއްޖެއަށް ފެނުގެ އެހީ ހިފައިގެން އައި އުޅަނދެވެ. އައި.އެން.އެސް ވިކްރަމަދިތްޔާއަށް ޒިޔާރަތްކުރުމުގެ ފުރުޞަތު މިމަހުގެ 16 އަދި 17 ވަނަ ދުވަހު އާއްމުކޮށް ހުޅުވާލެވިފައިވާ ކަމަށް އިންޑިޔާ ހައިކޮމިޝަނުން ހާމަކުރެއެވެ.