ދައުލަތުގެ ބެއްލެވުމުގެ ދަށުގައި ތިބޭ ކުދިން ބެލެހެއްޓެވުމުގެ މަސައްކަތް ހަރުދަނާ ކުރެއްވުމުގެ ގޮތުން ކުރައްވަމުންދާ މަސައްކަތުގެ ދަށުން، ހުޅުމާލޭގައި ޢިމާރާތް ކުރެއްވި ކުޑަކުދިންގެ ހިޔާގެ މަސައްކަތް ނިމި، މިހާރު އެތަނަށް ކުދިން ބަދަލުކުރުމުގެ މަސައްކަތް ކުރައްވަމުން ގެންދަވާކަމަށް ކުޑަކުދިންގެ ހިޔާއިން ވިދާޅުވެއްޖެއެވެ.ތަފާތު އެކި އިޖްތިމާޢީ މައްސަލަތަކާއި، އަދި ބަލާނޭ އެއްވެސް ފަރާތެއް ނެތުމުގެ ސަބަބުން ދައުލަތުގެ ބެއްލެވުމުގެ ދަށަށް ގެންނަވާފައިވާ ކުދިން، ބެލެހެއްޓެވުމުގެ ނިޒާމް މިހާރު ހަމަޖެހިފައިވަނީ ވިލިމާލޭގައި ހުންނަ ކުޑަކުދިންގެ ހިޔާގައެވެ. ކުޑަކުދިންގެ ހިޔާގައި މިހާރު 117 ކުދިން ތިބި އިރު، ހިޔާއަށް ކުރިމަތިވެފައިވާ އެންމެ ބޮޑު މައްސަލައަކީ ޖާގައިގެ ދަތިކަމެވެ. މިކަން ޙައްލު ކުރުމަށް ކުރެވުނު މަސައްކަތުގެ ދަށުން ދުބާއީގެ އާއިލާއެއްގެ އެހީގައި ހުޅުމާލޭގައި ކުޑަކުދިންގެ ހިޔާގެ އައު އިމާރާތެއް ވަނީ ބިނާކުރެވިފައެވެ. މިއީ 125 ކުދިންގެ ޖާގައިގެ ތަނެކެވެ. މިތަނަށް ބަދަލު ކުރުމަށް ސަރުކާރުން ނިންމަވާފައިވަނި އުމުރުން ނުވަ އަހަރު ނުވާ ކުދިންނެވެ. އެގޮތުން މި އުމުރުފުރާގެ 70 ކުދިން މި އިމާރާތަށް ބަދަލު ކުރުމަށް ނިންމަވާފައިވާއިރު، ކުރިން ދެއްވަމުން އައި ޚިދްމަތްތައް ކުރިޔަށްވުރެ ފެންވަރު ރަނގަޅުވެ، ޖާގައިގެ ގޮތުން ކުޑަކުދިންގެ ހިޔާއަށް ކުރިމަތިވި މައްސަލަ ޙައްލުވެގެންދާނެކަމަށް ކުޑަކުދިންގެ ހިޔާގެ ސީ.އީ.އޯ ޒީނާޒް އަދްނާނު ވިދާޅުވިއެވެ.މިމަހުގެ 6 ވަނަ ދުވަހުން ފެށިގެން ހުޅުމާލޭ ހިޔާއަށް ކުދިން ބަދަލު ކުރެއްވުމުގެ މަސައްކަތް ފަށްޓަވާފައިވާ ކަމަށް ޒީނާޒް ވިދާޅުވިއެވެ. މިމަސައްކަތް ކުރިއަށްދަނީ އެމް.އެން.ޑީ.އެފްއާއި ފުލުހުންގެ އެހީގައެވެ. އެގޮތުން މިހާތަނަށް 36 ކުދިން ބަދަލު ކުރެވިފައިވާކަމަށާއި މިހާރު މަސައްކަތް ކުރައްވަމުންދަނީ މި ކުދިން ބަލަހައްޓާނޭ މުވައްޒަފުން ހޯދުމުގެ މަސައްކަތާއި އެތަނުގައި އެކުދިންނަށް ބޭނުންވާ އެހެނިހެން އިންތިޒާމްތައް ހަމަޖެއްސެވުމަށް ކަމަށް ޒީނާޒް ވިދާޅުވިއެވެ.ޔޫއޭއީގެ ރައްޔިތެއް ކަމަށްވާ މަހުމޫދު އަލް ހާޖާގެ އާއިލާ އިން 689،000 (ހަސަތޭކަ އަށްޑިހަ ނުވަހާސް) ޑޮލަރު ޚަރަދުކޮށްގެން ބިނާކުރި މި އިމާރާތުގެ ބިންގާ އަޅުއްވާފައިވަނީ 2014 ވަނަ އަހަރުގެ ޑިސެމްބަރު މަހުގެ 9 ވަނަ ދުވަހުއެވެ. އަދި ހުރިހާ ކަމެއް ނިންމައި މި މަހުގެ 17 ވަނަ ދުވަހު ކުޑަކުދިންގެ ހިޔާ ހުޅުއްވުމަށް ސަރުކާރުން ވަނީ ނިންމަވާފައެވެ.