ގަވާއިދާ ޚިލާފަށް ރަޖިސްޓްރީކޮށްފައިވާ 80އަށްވުރެ ގިނަ އުޅަނދުގެ ރަޖިސްޓްރީ ބާޠިލުކުރި ނިންމުމަށް ޢަމަލުކުރުން ސިވިލް ކޯޓުން ހުއްޓުވައިފިއެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިއޭވިއޭޝަނުން ކުރިން ވިދާޅުވެފައިވަނީ ޤަވާއިދާ ޚިލާފަށް އުޅަނދު ރަޖިސްޓްރީކޮށްފައިވާ މައްސަލާގައި 200އެއްހައި އުޅަނދުގެ ރަޖިސްޓްރީ ބާޠިލުކުރުމަށް ނިންމާފައިވާކަމަށެވެ. އެގޮތުން ރާއްޖޭގައި ރަޖިސްޓްރީ ކުރެވޭ އުމުރު ހަމަވެފައިވާ އުޅަނދުތަކާއި، ޤަވާއިދާ ޚިލާފަށް މާލެ ޒޯނަށް ރަޖިސްޓްރީ ބަދަލުކޮށްފައިވާ 98 އުޅަނދެއްގެ ރަޖިސްޓްރީ ބާޠިލުކޮށްފައިވާކަމަށް މިނިސްޓްރީން ވިދާޅުވެފައިވެއެވެ.
ނަމަވެސް އޭގެ ތެރެއިން 87 އުޅަނދެއްގެ ރަޖިސްޓްރީ ބާޠިލުކުރުން މަޑުޖައްސާލުމަށް ސިވިލް ކޯޓުން ވަނީ ޢަމުރުކޮށްފައެވެ. ސިވިލް ކޯޓުން އެގޮތަށް ޢަމުރުކުރީ ބައެއް އުޅަނދުތަކުގެ ވެރިފަރާތުން އެކަން ހުއްޓުވައިދިނުމުގެ ވަގުތީ ޢަމުރަކަށް ސިވިލް ކޯޓުގައި އެދުމުންނެވެ.
އެގޮތުން ސިވިލް ކޯޓުގެ ޢަމުކުރުގައި ވަނީ މައްސަލަ ނިމެންދެން، ރަޖިސްޓްރީ ބާޠިލުކުރުމަށް ޓްރާންސްޕޯޓު މިނިސްޓްރީން ނެރެފައިވާ ދެ އިއުލާނާ ގުޅިގެން އެއްވެސް ފިޔަވަޅެއް ނޭޅުމަށާއި، ރަޖިސްޓްރީ ބާޠިލުކުރިކަމަށް ބުނި އުޅަނދުތަކުގެ ރަޖިސްޓްރީ ބާޠިލުވެފައިވާކަމަށް މި ހިނދަށް ނުބެލުމަށެވެ. އަދި އެ ދެ އިއުލާންގައި ހިމަނާފައިވާ އެއްވެސް އުޅަނދަކަށް ޚިދުމަތް ދިނުމުގައި ތަފާތު ނުކުރުމަށްވެސް ސިވިލް ކޯޓުގެ ޢަމުރުގައިވެއެވެ.
މި މައްސަލާގައި ދައުލަތުން ވަނީ ރަޖިސްޓްރީ ބާޠިލްކޮށްފައިވާ އުޅަނދުތަކަށް ކޯޓު އަމުރުގެ ދަށުން ހުއްދަ ދިނުމަކީ މަގުތަކުގެ ރައްކާތެރިކަން ގެއްލިދާނެކަމަށް ވިދާޅުވެފައެވެ. ނަމަވެސް ސިވިލް ކޯޓުގެ ޢަމުރުގައި ވަނީ މި މައްސަލާގައި ވަގުތީ އަމުރެއް ނެރެނުދީފިނަމަ އުޅަނދުތަކުގެ ވެރި ފަރާތްތަކުގެ އާމްދަނީއަށް ހުރަސް އެޅި، އިޢާދަނުކުރެވޭނެ ގެއްލުންތަކެއް ލިބިދާނެކަމަށެވެ.
ރާއްޖޭގައި އެއްގަމު އުޅަނދުތައް ޤަވާއިދާ ޚިލާފަށް ރަޖިސްޓްރީކުރާ މައްސަލަ ބޮޑުވެފައިވަނިކޮށް، ޓްރާންސްޕޯޓް މިނިސްޓްރީން އަންނަނީ އެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން އެއް ގަރާޖަކަށް އެތައް އުޅަނދެއް ރަޖިސްޓްރީކޮށްފައިވާކަން ފާހަގަކުރެވިފައިވާތީ އެކަންކަން ހައްލުކޮށް، ޤަވާއިދާއި ޚިލާފުވި ފަރާތްތަކާމެދު ފިޔަވަޅު އެޅުމުގެ މަސައްކަތްވެސް މިނިސްޓްރީން އަންނަނީ ކުރަމުންނެވެ.
އެގޮތުން ޓްރާންސްޕޯޓް މިނިސްޓަރ ޢާއިޝަތު ނަހުލާ ދާދި ފަހުން ވަނީ ޤަވާއިދާ ޚިލާފަށް އެއްގަމު އުޅަނދު ރަޖިސްޓްރާ މައްސަލާގައި ފަސްޖެހުމެއް ނެތި ފިޔަވަޅު އަޅާނެކަމުގެ އިންޒާރު ދެއްވާފައެވެ.
މާލޭގައި ދިމާވެފައިވާ އެންމެ ބޮޑު އެއް މައްސަލައަކީ އެއްގަމު އުޅަނދު ގިނަވެ މަގުތައް ތޮއްޖެހުމުގެ މައްސަލައެވެ. މިހާތަނަށް 80،000 އަށްވުރެ ގިނަ ވެހިކަލް މާލެއަށް ރަޖިސްޓްރީކޮށްފައިވާއިރު މީގެތެރޭގައި 4،500 އަށްވުރެ ގިނަ ކާރު ހިމެނެއެވެ. ރާއްޖޭގައި ހަތަރު ފުރޮޅުލީ އުޅަނދު ރަޖިސްޓަރކުރެވެނީ ގަރާޖެއްގެ ދަށުންނެވެ. އެހެންނަމަވެސް އެއް ގަރާޖެއްގައި ގިނަ ޢަދަދެއްގެ ވެހިކަލް ރަޖިސްޓްރީކުރުމުގެ މައްސަލަ ބޮޑުވެ އެކަމަށް ޙައްލުގެނައުމަށް ވަކި ޢަދަދަކަށް ރަޖިސްޓްރީކޮށްފައިވާނަމަ އެގަރާޖެއްގެ ދަށުން އުޅަނދު ރަޖިސްޓްރީކޮށްދިނުން މިހާރުވަނީ ހުއްޓާލާފައެވެ.