ފުވައްމުލައް ސިޓީއަކީ ގުދުރަތީގޮތުން ރާއްޖޭގެ އެންމެ ތަފާތު އަތޮޅެވެ. އެއްފަސްކޮށް އޮންނަ ފުވައްމުލައް ސިޓީގެ ރަޖިސްޓްރީވެފައިވާ އާބާދީ 12700 އިން މައްޗަށް އަރައެވެ. އަދި ރަށަށް ހިޖުރަކޮށްގެންނާއި، އެކި މަސައްކަތުގައި ރަށުގައި ދިރިއުޅޭ މީހުންނާއެކު، ރަށުގައި ދިރިއުޅޭ އާބާދީ 14000އަށް އަރައެވެ.
ބިމުގެ ގޮތުން ބަލާއިރު ފުވައްމުލަކަކީ އެއްފަސް ބޮޑު ރަށެކެވެ. ރަށުގެ ބޮޑު މިނުގައި 491 ހެކްޓަރު ހުރެއެވެ. ރަށް ބޮޑު ނަމަވެސް، ފުވައްމުލަކުގެ ބޮޑު ބަޔަކީ ކުޅި، ފާތަކާއި ޗަސްބިމެވެ.
މިއާއި ގުޅިގެން ފުވައްމުލަކުގައިވެސް ބިމުގެ ދަތިކަން އެބައޮތެވެ.
ރާއްޖޭގެ އާބާދީ ބޮޑު އެހެން ރަށްތަކޭ އެއްގޮތަށް، ފުވައްމުލައް ސިޓީއަށްވެސް އޮތް އެއް މައްސަލައަކީ، ބޯހިޔާވަހިކަމުގެ މައްސަލައެވެ. ފުވައްމުލައް ސިޓީގެ މޭޔަރ އިސްމާއިލް ރަފީޤް ޕީއެސްއެމް ނިއުސްއަށް ވިދާޅުވީ ރަށުގެ ރައްޔިތުން ގޯތި ބޭނުންވާ މިންވަރު ހާމަވަނީ، އެންމެ ފަހުން ރަށުން ދޫކުރި 34 ހައުސިން ޔުނިޓަށް 800 ފަރާތުން ފޯމް ހުށައަޅާފައިވާތީކަމަށެވެ.
ރަށުގައި މައިންބަފައިންގެ ގޯތީގައި، އެތައް އާއިލާތަކެއް ދިރިއުޅެމުން އަންނަކަން ފާހަގަކުރައްވާ ރަފީޤް ވިދާޅުވީ، ބޯހިޔާވަހިކަމުގެ މަޝްރޫޢަކީ ރަށުގެ ރައްޔިތުން ވަރަށް ބޮޑަށް އިންތިޒާރު ކުރަމުން އަންނަ މަސައްކަތެއްކަމަށެވެ.
ފުވައްމުލައް ސިޓީގައި 200 ހައުސިން ޔުނިޓް ތަރައްޤީކޮށްދެއްވާނެކަން ސަރުކާރުން އޮތީ ހާމަކޮށްފައެވެ. ނަމަވެސް މިއަހަރުގެ މަރޗް މަހު، ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު ފުވައްމުލައް ސިޓީއަށް ކުރއްވި ދަތުރުފުޅުގައި ވަނީ މި އަދަދު 400އަށް އިތުރުކޮށްދެއްވުމަށް ސަރުކާރުން ނިންމަވާފައިވާކަން ހާމަކުރައްވާފައެވެ. މިއީ ސަރުކާރުގެ މުހިންމު ނިންމެވުމެއްކަމަށް ރަފީޤް ފާހަގަކުރެއްވިއެވެ.
"ކައުންސިލުން އެދުނީ 200 ޔުނިޓް އިތުރުކުރުމަށް، އަދި ސަރުކާރުން ވަނީ އެކަން އެގޮތަށް ކޮށްދީފަ. މިހާރު މިއޮތީ ޔުނިޓްތައް އަޅާ ބިން ކަނޑައަޅާ ޕްލޭނިން އަށް ހުށައަޅާފަ. ވަރަށް އަވަހަށް އިޢުލާންކޮށް ކޮންޓްރެކްޓަރަކާ ހަވާލުކޮށް، ލަސްނުވެ މަސައްކަތްތައް ފަށާނެ." ރަފީޤް ވިދާޅުވިއެވެ.
ރަފީޤް ވިދާޅުވީ ކުދިކުދި ގޭބިސީތަކުގައި ވަރަށް ދަތި ހާލުގައި އުޅޭ ރައްޔިތުން ތިބިކަމަށެވެ. ނަމަވެސް މިހާރު ގެ އަޅަން ބިން ދޫކުރުމުގެ ވިސްނުން މިވަގުތު ނުގެންގުޅޭކަމަށެވެ. ގެ އަޅަން ބިން ދޫކުރިނަމަވެސް، ގެ އެޅޭނެ މާލީ ތަނަވަސްކަން ނެތް އާއިލާތައް ގިނަކަމަށެވެ. އެހެންކަމުން ރަށަށް މިވަގުތަށް އެންމެ މުހިންމުކަމަކީ، ހައުސިން ޔުނިޓްތައް އަޅާ، ޚިދުމަތްތައް ފުރިހަމަކޮށްފައި ދޫކުރުންކަމަށެވެ.
"މިފަހަރުގެ ހައުސިން މަޝްރޫޢު ތަފާތުވާނެ. ތަނަވަސް އެޕަރޓްމަންޓްތަކުގެ އިތުރުން، ފްލެޓްތަކުގައި ލިފްޓް ލުމާއި ގްރައުންޑް ފްލޯގައި ޕާކިން ހެދުމާއި ކުނި އުކާލުމުގެ ފަސޭހަ ޚިދުމަތާ، ކޮމާޝަލް ޔުނިޓްތައްވެސް ހުންނާނެ." ރަފީޤް ވިދާޅުވިއެވެ.
ފުވައްމުލައް ސިޓީ ކައުންސިލުން އަންނަނީ، ޕްރައިވެޓް ސެކްޓަރަށް ހުޅުވާލައިގެން ހައުސިން ޕްރޮޖެކްޓްތައް ކުރިއަށްގެންދިއުމަށްވެސް މަސައްކަތް ކުރަމުންނެވެ. މިއީ އިޖްތިމާއީ ބޯހިޔާވަހިކަމަށްވުރެ، މަތީ ފަންތިއެއްގައި ގެންދާ ހައުސިން ސްކީމްތަކެކެވެ.
މިކަމާއި ގުޅިގެން ވިޔަފާރިވެރިންނާ މަޝްވަރާ ކުރަމުންދާކަމަށް ފުވައްމުލައް ސިޓީ ކައުންސިލުން ވިދާޅުވިއެވެ.