ރާއްޖޭގެ ދަތުރު ފަތުރުގެ ނިޒާމަށް ބޮޑު ބަދަލެއް ގެނައުމަށް ސަރުކާރުން ކުރަމުންދާ މަސައްކަތުގެ ދަށުން މިނީ ބަހުގެ ޚިދުމަތް ދިނުމަށް އެމްޓީސީން ގެނެސްފައިވާ ބަސްތައް ގެނައުމުގައި ކޮރަޕްޝަންގެ އަމަލެއް ހިންގާފައިވާކަމަށް ބުނާ ވާހަކަތައް އެކުންފުނިން ދޮގުކޮށްފިއެވެ.
އެމްޓީސީސީން ބުނީ ބަހުގެ ޚިދުމަތް ދިނުމަށް އެކުންފުނީގެ ރާއްޖޭގެ ޓްރާންސްޕޯޓް ލިންކް (އާރުޓީއެލް) އިން ބަސްގަނެފައިވަނީ ކޮރަޕްޝަނަށް މަގުފައިވާ ގޮތަށްކަމަށް ބުނެ ރާއްޖޭގެ ނޫހެއްގައި ލިޔެފައިވާ ލިޔުމަކީ ހަޤީޤަތާއި ޚިލާފު ދޮގު ވާހަކަތަކެއް ކަމަށެވެ.
އެމްޓީސީސީން ނެރުނު ނޫސްބަޔާނެއްގައި ބުނެފައިވަނީ ވަކި ނޫހެއްގައި ދޮގު މައުލޫމާތު ހިމަނާ ހަބަރެއް ގެނެސްދީފައިވާނީ ރައްޔިތުންނަށް އޮޅޭފަދަ ގޮތަކަށް އެ ކުންފުނި ބަދުނާމުކުރުމަށްކަމަށެވެ. އަދި މިއީ ޒާތީ ތަޢައްސުބް އިސްކޮށް، ސިޔާސީ މަންފާއެއް ހޯދުމުގެ ބޭނުމުގައި ކޮށްފައިވާކަމެއްކަމަށްވެސް އެމްޓީސީސީގެ ބަޔާނުގައިވެއެވެ.
" "ދިޔަރެސް" ނޫހުގައި ޝާއިޢުކުރި ޚަބަރުން، ރައްޔިތުންގެ ހިތުގައި މި ކުންފުންޏަށާއި، މި ކުންފުނިން ކުރިއަށްގެންދާ އުމްރާނީ ތަރައްޤީގެ މަޝްރޫޢުތަކާއި، ކުންފުނިން ފޯރުކޮށްދެމުން ގެންދާ ޢާންމު ދަތުރުފަތުރުގެ ޚިދުމަތާމެދު، އުފެދިފައިވާ އިތުބާރާއި، ލޯބި ފަނޑު ކޮށްލަން، ގަސްތުގައި މަސައްކަތް ކޮށްފައިވާކަން އެނގެއެވެ. މިއީ، ދެފުށް ފެންނަ މިނިވަން ނޫސްވެރިކަމެއް ދިވެހިރާއްޖޭގައި ކުރިއަށްދާ ޒަމާނެއްގައި، ހަޤީޤަތް އޮޅުވާލުމަށް "ދިޔަރެސް" ނޫހުން ހިންގި، ވަރަށް ނާތަހުޒީބު ޢަމަލެކެވެ." އެމްޓީސީސީގެ ބަޔާނުގައިވެއެވެ.
މާލޭގައި ތޮއްޖެހުން ކުޑަކުރުމާއި ދަތުރުފަތުގެ ނިޒާމު ހަރުދަނާކުރުމަށް ސަރުކާރުން ކުރައްވަމުން ގެންދަވާ މަސައްކަތުގެ ދަށުން މާލޭގައި މިނީ ބަހުގެ ޚިދުމަތް ފެށީ މިމަހުގެ 5 ވަނަދުވަހުއެވެ. މި ޚިދުމަތަށް ރައްޔިތުންގެ ބޮޑު ތަރުހީބެއް ލިބެމުން އަންނަކަން އެމްޓީސީސީން ފާހަކުރެއެވެ.
މާލޭގައި މިނީބަހުގެ ޚިދުމަތް ފެށި ފަހުން މިވީ ތިންދުވަހުގެ ތެރޭގައި ބަހުގައި ދަތުރުކުރާ މީހުންގެ އަދަދު އަންނަނީ އިތުރުވަމުންނެވެ. މިގޮތުން އިއްޔެ އެކަނިވެސް 8000 ވުރެ ގިނަ މީހުންވަނީ ބަހުގައި ދަތުރުކޮށްފައެވެ. ބަހުގެ ޚިދުމަތް ފެށި ފުރަތަމަ ދުވަހު 2250 މީހުންވަނީ އެ ޚިދުމަތް ބޭނުންކޮށްފައެވެ. އަދި ޖެހިގެން އައިދުވަހު ދަތުރުކުރި މީހުންގެ އަދަދުވަނީ 3200 އަރާފައެވެ.
މާލޭގެ އަމީނީމަގާއި، ސޯސަންމަގާއި މަޖީސީމަގުގެ އިތުރުން އޯކިޑްމަގު މިނީ ބަސް ދަތުރުކުރާނެއެވެ. މި ޚިދުމަތުގައި ޖުމްލަ 18 ބަސް ބޭނުންކުރެއެވެ. އަދި 42 ބަސްހުއްޓި މާލޭގައި ވަނީ ޤާއިމުކޮށްފައެވެ.
އަންނަ ހަފްތާގެ ހޯމަދުވަހުގެ ނިޔަލަށް ބަހުގައި ދަތުރުތައް ކުރާނީ ހިލެއެވެ. އޭގެ ފަހުން ދަތުރަކަށް 7 ރުފިޔާ ނަގާނެކަމަށް އެމްޓީސީސީން ބުނެއެވެ. އެހެންނަމަވެސް 65 އަހަރުން މަތީގެ މީހުނާއި 3 އަހަރުން ދަށުގެ ކުޑަކުދިންނާއި ހާއްސަ އެހީއަށް ބޭނުންވާ މީހުންނާއި ޔުނީފޯމުގައި ތިބޭ ސްކޫލް ދަރިވަރުންނަށް ހިލޭ ދަތުރުކުރެވޭނެ އިންތިޒާމުތައް އެމްޓީސީސީން ވަނީ ހަމަޖައްސައިފައެވެ.