ހޯރަފުށީ އެއަރޕޯޓުން ޚިދުމަތް ހޯދާ މީހުންނަށް ފަސޭހަކުރުމަށް، އެއަރޕޯޓްގައި ޖެޓީއެއް ތަރައްޤީކުރުމުގެ ޢަމަލީ މަސައްކަތް ފަށައިފިއެވެ. އެއަރޕޯޓަށްދާ މީހުން މިހާރު ބޭނުންކުރަނީ، ހޯރަފުށީގެ މައި ބަނދަރެވެ.
ހއ.ހޯރަފުއްޓަކީ ރާއްޖޭގެ އެންމެ އުތުރުން ވައިގެ ދަތުރުފަތުރުގެ ޚިދުމަތް ލިބޭ ރަށެވެ. އެތެރޭގެ އުދުހުންތަކަށް ޚާއްސަ މި އެއަރޕޯޓްގެ ޚިދުމަތް ފެށީ 2020ވަނަ އަހަރުގެ ނޮވެމްބަރު މަހުގެ 19ވަނަ ދުވަހުއެވެ. މި އެއަރޕޯޓަކީ ރާއްޖޭގެ އެންމެ އުތުރުން، އިހަވަންދިއްޕޮޅުގެ ރައްޔިތުންނަށް ދަތުރުފަތުރުގެ ނިޒާމުން ލިބުނު ބޮޑު ކުރިއެރުމެކެވެ.
ހޯރަފުށީގެ އެއަރޕޯޓް ތަރައްޤީކޮށްފައިވަނީ ރަށުގެ ފަޅުން 34 ހެކްޓަރުގެ ބިން ހިއްކައިގެންނެވެ. އެއަރޕޯޓް ތަރައްޤީކޮށްފައިވަނީ ކޯޒްވޭއަކުން ރަށާ ގުޅާލައިގެންނެވެ.
މިއާއެކު އެ ސަރަޙައްދުގެ ރައްޔިތުންގެ ކަންބޮޑުވުމަކަށްވީ ކައިރި ރަށްތަކާ ރިސޯޓްތަކުން، ފަސޭހަކަމާއެކު އެއަރޕޯޓަށް އަރާ ފޭބޭނެ ގޮތެއް ނެތުމެވެ. މިކަން އިހަވަންދޫ ދާއިރާގެ މެމްބަރު މުހައްމަދު ޝިފާއު، ޕްލޭނިން މިނިސްޓަރ މުޙައްމަދު އަސްލަމްގެ ސަމާލްކަމަށްވެސް އޭރު ގެނެސްފައިވެއެވެ. މިކަމަށް ޙައްލު ގެނައުމަށް ހޯރަފުށީ އެއަރޕޯޓަށް ވަކިން އަރާފޭބޭނެ ފާލަމެއް ހަދަން ނިންމާފައިވާކަމަށް މިނިސްޓަރ އަސްލަމް ވިދާޅުވިއެވެ.
ހޯރަފުށީ އެއަރޕޯޓުން ޚިދުމަތް ހޯދަން އެ ސަރަޙައްދުގެ ރަށްރަށުގެ ރައްޔިތުން މިހާރު އެއަރޕޯޓަށް ދާންޖެހެނީ، ހޯރަފުށީގެ މައި ބަނދަރަށް ކަނޑު އުޅަނދު ކައިރިކުރުމަށްފަހު، ޓެކްސީގައެވެ. މިއީ ވަގުތާއި އަދި ޚަރަދުގެ ގޮތުންވެސް ބަލާއިރު ތަކުލީފެކެވެ.
ހއ. ހޯރަފުށީ އެއަރޕޯޓް ޖެޓީ ހެދުމުގެ ޢަމަލީ މަސައްކަތް 7 ސެޕްޓެމްބަރ 2022 ވަނަ ދުވަހު ފެށިއްޖެ.#MTCCProjects #RayyithungeKunfuni pic.twitter.com/JasBqp2V7z
— MTCC Plc (@MTCCPlc) September 8, 2022
އެ ސަރަޙައްދުގެ ގިނަ ރައްޔިތުން އެއަރޕޯޓްގައި ޖެޓީއެއް އޮތުމަށް އެދެމުންދާތީ އެއަރޕޯޓްގައި ޖެޓީއެއް ތަރައްޤީކުރަން ސަރުކާރުންވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީއާ ހަވާލުކޮށްފައެވެ. އަދި މިކަމުގެ ޢަމަލީ މަސައްކަތް އެ ކުންފުނިން މިވަނީ ސައިޓްގައި ފަށާފައެވެ.
މި މަސައްކަތުގެދަށުން 18000 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، ޕްރީކާސްޓް އެލް ބްލޮކް ބޭނުންކޮށްގެން ޖެޓީ ހެދުމާއި، ޖިއޯ ބޭގް ރިވެޓްމަންޓެއް ޖެހުން ހިމެނެއެވެ. އަދި ނެރު ބައްތި ޖެހުންވެސް ހިމެނެއެވެ.
މި މަޝްރޫޢު އެމްޓީސީސީއާ ހަވާލުކޮށްފައިވަނީ 5.99 މިލިއަން ރުފިޔާއަށެވެ.
ހޯރަފުށީ އެއަރޕޯޓައް 2 އެއަރލައިނަކުން އަންނަނީ ދަތުރުތައް ބާއްވަމުންނެވެ. މޯލްޑިވިއަންއިން ހަފްތާއަކު 4 ދުވަހު ހޯރަފުއްޓަށް ޝެޑިއުލް ދަތުރުތައް ބާއްވައެވެ. އަދި ޖޭއޭ މަނަފަރު ރިސޯޓާ ގުޅިގެން މަންޓާގެ، ޗަރޓަރ ދަތުރުތައްވެސް ވަނީ ފަށާފައެވެ. މި ދަތުރުތަކުގައިވެސް ޖާގަ އޮންނަ މިންވަރަކުން އާއްމު ރައްޔިތުންނަށް ދަތުރު ކުރެވޭނެއެވެ.