މ. ދިއްގަރު ބިން ބޮޑުކުރުމުގެ މަޝްރޫޢުގެ ދަށުން މިހާތަނަށް ހިއްކާފައިވާ ސަރަޙައްދުގެ ގޮނޑުދޮށް ހިމާޔަތް ކުރުމުގެ މަސައްކަތް ކުރުމަށް އެމްޓީސީސީއާ ހަވާލުކޮށްފިއެވެ.
މި މަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމްއެވެ. މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ، ޕާރމަނަންޓް ސެކްރެޓަރީ، ޒީނިޔާ ހަމީދެވެ.
މި މަޝްރޫޢުގެ ދަށުން، 1470 މީޓަރުގެ ސަރަޙައްދެއްގައި ޖިއޯޓިއުބް ރިވެޓްމެންޓް ޖެހުމުގެ މަސައްކަތް ކުރުމަށް ވަނީ ހަމަޖެހިފައެވެ. 210 ދުވަހުގެ ތެރޭގައި މި މަސައްކަތް ނިންމުމަށް އެ ކުންފުންޏާ ހަވާލުކޮށްފައިވާއިރު މި މަސައްކަތަށް 29.17 މިލިޔަން ރުފިޔާ ޚަރަދުވެއެވެ.
ދިއްގަރުގެ ބިންހިއްކާ ސަރަޙައްދުގެ ގޮނޑުދޮށް ހިމާޔަތް ކުރުމަށް އެމްޓީސީސީއާ ހަވާލުކޮށްފައިވާއިރު ދިއްގަރުގެ ބިން ހިއްކުމުގެ މަސައްކަތް އެމް.ޓީ.ސީ.ސީއާ ހަވާލުކުރީ 2020 ވަނަ އަހަރުގެ ނޮވެމްބަރުމަހުއެވެ. އަދި އެރަށުގެ ގިރާސަރަޙައްދު މިހާރު ވަނީ ހިމާޔަތްކޮށްފައެވެ.
ދިއްގަރު ބިން ހިއްކުމުގެ މަޝްރޫޢުގެ ދަށުން އެރަށަށް 25 ހެކްޓަރުގެ ބިން އިތުރުކުރެވިގެންދާނެއެވެ. އަދި ހިއްކި ބިން ޙިމާޔަތްކުރުމާއި، ބޮޑު ހިލައިގެ ރިވެޓްމަންޓް ޖެހުމާއި، ބޭރު ތޮށިލުމުގެ މަސައްކަތްވެސް މި މަޝްރޫޢުގެ ތެރެއިން ކުރެވިގެންދާނެއެވެ. ބިން ހިއްކުމުގެ މަސައްކަތް ފަށާފައިވަނީ 2021 ވަނަ އަހަރުގެ މާރޗްމަހުގެ ތެރޭގައެވެ.
ދިއްގަރު ބިން ހިއްކުމުގެ މަސައްކަތަށް އެމް.ޓީ.ސީ.ސީން ބޭނުންކުރަމުންދަނީ އެކުންފުނީގެ ފްލީޓުގައި މިވަގުތު އޮތް އެންމެ ބޮޑު ޑްރެޖަރ "މަހާ ޖައްރާފު"އެވެ. މިއީ ސަރުކާރުން 121.8 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.