ރާއްޖޭގައި ގުދުރަތީ ގޮތުން އުފެދިފައިވާ އެންމެ ބޮޑު އަތޮޅަކީ ހުވަދުއަތޮޅު ދެކުނު ބުރިއެވެ. ސަޤާފަތާއި އާދަކާދަޔާ ބަހުރުވައިގެ ތަފާތުތަކެއް ލިބިފައިވާ މިއަތޮޅުގައި ވެރިކަން ކުރަނީ ތިނަދޫގައެވެ. ބޮޑުމިނުގައި 117.5 ހެކްޓަރު ހުންނަ ތިނަދޫއަކީ ރާއްޖޭގެ ނިސްބަތުން އާބާދީ ބޮޑު ރަށެކެވެ.
8 ހާހެއްހާ މީހުންގެ އާބާދީއެއް އޮތް ތިނަދޫގައި، އެންމެ އަސާސީ ޚިދުމަތްތަކުގެ ތެރޭގައި ހިމެނޭ ސިއްޙީ ޚިދުމަތުގެ ފެންވަރު ދަނީ ކުރިއަރަމުންނެވެ. ރާއްޖޭގެ ފަސް ސަރަހައްދެއްގައި ޓާޝަރީ ފެންވަރުގެ ސިއްޙީ ޚިދުމަތް ލިބޭ ހޮސްޕިޓަލްތައް ތަރައްޤީ ކުރުމަށް ރައީސް އިބްރާހިމް މުޙައްމަދު ޞާލިހުގެ ސަރުކާރުން ގެންގުޅުއްވާ ސިޔާސަތުގެ ތެރެއިން ޓާޝަރީ ފެންވަރަށް ހޮސްޕިޓަލް ތަރައްޤީކުރާ އެއް ރަށަކީވެސް ތިނަދޫއެވެ. މި ސިޔާސަތުގެ ދަށުން ގދ ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލަށްވަނީ ޚިދުމަތުގެ ކުރިއެރުން ގެނައުމުގެ މަސައްކަތް ފަށާފައެވެ.
ގދ ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްޤީ ކުރުމުގެ ދުރު ރާސްތާ ޕްލޭންގެ ދަށުން މިހާރު ވަނީ ހޮސްޕިޓަލް ތަރައްޤީކުރުމަށް ބިން ކަނޑައަޅާފައެވެ. ނަމަވެސް އުމްރާނީ ގޮތުން ޑރ. އަބްދުއްސަމަދު މެމޯރިއަލް ހޮސްޕިޓަލް ތަރައްޤީ ވާންވާއިރަށް މި ހޮސްޕިޓަލުގެ ޚިދުމަތްތައްދަނީ ކުރިއަރާ ޓާޝަރީ ހޮސްޕިޓަލަކަށް ފައްކާވަމުންނެވެ. މިހޮސްޕިޓަލް އަޕްގްރޭޑް ކުރުމުގެ މަސައްކަތުގެ 99 އިންސައްތަ މިހާރު ވަނީ ނިމިފައެވެ. އެގޮތުން ހޮސްޕިޓަލަށް 14 ކޮންސަލްޓޭޝަން ރޫމާ، އާ އޯޕީޑީ އޭރިއަކާއި ހަތަރު ޕްރައިވެޓް ރޫމާ ދެ ލޭބާ ސްވިޗްގެ އިތުރުން އައިސީޔޫ އިމާރާތެއް މިހާރު ވަނީ ތަރައްޤީކޮށް ނިންމާފައެވެ. އުމްރާނީ ތަރައްޤީގެ ތަނބުތައް މި ހޮސްޕިޓަލުގައި ޖެހުމަށް ތައްޔާރުވަމުން އަންނަ އިރު ސްޕެޝަލިސްޓް ޑޮކްޓަރުންގެ ޚިދުމަތްތައްވެސް މިހާރު ވަނީ ދޭންފަށާފައެވެ. އެއް ފުރާޅެއްގެ ދަށުން 15 ސްޕެޝަލިސްޓުންގެ ޚިދުމަތް މިހާރު ތިނަދޫން ލިބުމަކީ ރަށާއި މުޅި އަތޮޅަށްވެސް ލިބޭ ވަރަށް ބޮޑު ލުއިފަސޭހައެކެވެ. ޑޮކްޓަރަކަށް ދައްކާލުމަށް ވެރިރަށް މާލެއަށް ހުވަދުއަތޮޅުގެ ރައްޔިތުން ކުރާ ދަތުރުތަކަށާއި، މާލޭގައި ހުރުމާ ކެއުމަށް ޖީބުން ހޭދަކުރަމުން ދިޔަ އެތައް ހާސް ރުފިޔާއެއް މިހާރު މިވަނީ ސަލާމަތްވެފައެވެ.
"ކުރިއަށް އޮތް ދެތިން އަހަރުގެތެރޭގައި އައު ޓާޝަރީ ހޮސްޕިޓަލްވެސް އަޅުގަނޑުމެންނާއި ހަމައަށް އަންނާނެ. ނަމަވެސް ސަރުކާރުގެ ވިސްނުމަކީ ޓާޝަރީ ހޮސްޕިޓަލް އަންނަންނޭ ކިޔާފަ މި ހޮސްޕިޓަލުގެ ޚިދުމަތްތައް ފުޅާނުކޮށް ޓާޝަރީ ފެންވަރަށް ނުގެންގޮސް ހުރުމެއް ނޫން. މި ހޮސްޕިޓަލުން ރައްޔިތުން ހިތްހަމަޖެހޭ ފެންވަރުގެ ހޮސްޕިޓަލެއް ކައިރި މުސްތަގުބަލެއްގައި ލިބިގެންދާނެ." ޑރ.ޢަބްދުއްޞަމަދު މެމޯރިއަލް ހޮސްޕިޓަލް ހިންގެެވުމާ ހަވާލުވެހުންނެވި ހޮސްޕިޓަލުގެ ޑެޕިއުޓީ ސީއީއޯ ޢަބްދުލްޢަޒީޒް ރިފާޢު ވިދާޅުވިއެވެ.
ދާއިމީ ބޮޑެތި ބަލިތަކަށް ފަރުވާ ހޯދަން ބޮޑު ހޭދައެއް ކުރަމުންދާ ހުވަދުއަތޮޅުގެ ރައްޔިތުންނަށްވެސް ގދ ތިނަދޫގައި ޓާޝަރީ ހޮސްޕިޓަލެއް ތަރައްޤީވުމުން ލުއިފަސޭހަކަން ލިބުނީ ހިތަށް ހަމަޖެހުން ގެނެސްދިނުމާއެކުއެވެ. ވަކިން ޚާއްސަކޮށް ޑައިލަސިސް ފަދަ ޚަރަދުބޮޑު އަދި ވޭން ބޮޑު ފަރުވާތައް ޑރ. އަބްދުއްސަމަދު މެމޯރިއަލް ހޮސްޕިޓަލުން ލިބުމަކީ ރައްޔިތުންގެ ލޮލުން އުފާވެރިކަމުގެ ކަރުނަ ނީރާލިކަމެކެވެ. ސަރުކާރުގެ ޕްލޭންގައި ވަނީ ޓާޝަރީ ފެންވަރަށް ތަރައްޤީވެގެން އަންނައިރު، ޑައިލިސިސްގެ ޚިދުމަތް 10 އެނދުގެ ޚިދުމަތަކަށް ފުޅާކުރުމެވެ.
"ވަރަށް ރަނގަޅު ޚިދުމަތް. ހުރިހާ ކަމެއްވެސް ރަނގަޅު ހޮސްޕިޓަލުގެ. ވަރަށް ހިތްހަމަ ޖެހޭ. ރަށުން ޚިދުމަތް ލިބިއްޖެއްޔާ އެންމެ ފަސޭހަވާނީ. އޭރުން ތިނަދޫއަށް އަންނާކަށް ނުޖެހޭނެ. މިހާރު ގެދޮރާ ދަރިން ދޫކޮށްފަ އައިސް ތިނަދޫގަ ހުންނަންޖެހެނީ. އެންމެ ބޮޑު ފަސޭހައަކަށްވާނީ ރަށުން ޑައިލިސިސް ހެދޭނެ ގޮތެއް ވުން. އިރާދަ ކުރެއްވިއްޔާ މި ދާގޮތުން އެކަންވެސް ވާނެކަަމަށް އުއްމީދުކުރެވެނީ." ތިނަދޫ ހޮސްޕިޓަލުން ޑައިލިސިސްގެ ޚިދުމަތް ހަދަމުން އަންނަ މީހަކު ކިޔައިދިނެވެ.
ޑރ. އަބްދުއްސަމަދު މެމޯރިއަލް ހޮސްޕިޓަލް ޓާޝަރީ ފެންވަރަށް ތަރައްޤީ ވެގެން އަންނައިރު މިއީ މުޅި ހުވަދުއަތޮޅު ރައްޔިތުން ސިއްހީ ފަރުވާއަށް ކުރާ ހޭދަ އެތައް ގުނައެއް ކުޑަކޮށްދޭނެ ކަމެކެވެ. ރާއްޖޭގެ ދަތުރުފަތުރުގެ ނިޒާމަށް އިންގިލާބީ ބަދަލެއް ގެނުވަން ތައްޔާރުވެފައިވާ އާރު ޓީ އެލް ފެރީ ނިޒާމާއެކު އަތޮޅުގެ ރަށްރަށުން ރައްޔިތުން ގދ ތިނަދޫ އަށް ދަތުރުކުރުމަށް އަދި މާ ފަސޭހަވާނެއެވެ. ޑރ. އަބްދުއްސަމަދު މެމޯރިއަލް ހޮސްޕިޓަލުން ހެނދުނު ޓެސްޓު ހެދުމަށްފަހު މެންދުރު ރަށަށް ގޮސް ހަވީރު ޓެސްޓުގެ ރިޕޯޓު ބަލާ ދިޔުމުގެ މަގު މި ޚިދުމަތާއެކު ފަހިވާނެއެވެ.
"ޓެސްޓްތަކެއް ހަދާލަން މިއައީ. އަދި ރިޕޯޓެ ނުލިބޭ، އާދެވުނުއިރު ހުރީ 10 ޖަހާފަ. އައިސް ދައްކާފަ ޓެސްޓް ނަތީޖާ ލިބޭނީ 13:30ގަ. ދެން މިޖެހެނީ ރަށަށްދާން ފެރީ ފުރާ ގަޑީގަ. ދެން އަންނަޖެހޭނީ. އެހެން ދުވަހެއްގަ ރިޕޯޓް ދައްކަން. ޤަބޫލުކުރެވެނީ ޚިދުމަތްތައް އިތުރަށް ރަނގަޅުވަމުން އަންނާނެކަމަށް. ޚާއްޞަކޮށް ސްޕީޑު ފެރީގެ ޚިދުމަތް ފެށީމަ. އޭރުން ވަރަށް ފަސޭހަވާނެ. ހީވޭ ރަނގަޅުވާނެކަމަށް. މިހާރު ކުރިއާ ބަލާފަ ޚިދުމަތްތައް ވަރަށް ރަނގަޅު." މަޑަވެލިން ތިނަދޫ ހޮސްޕިޓަލަށް ޚިދުމަތް ހޯދަން އައިސްތިބި ބައެއް މީހުން އުއްމީދާއެކު ކިޔައިދިނެވެ.
މާޒީގައި ހަމައެކަނި މާލެއިން ސިއްހީ ރަނގަޅު ފަރުވާ ލިބެން ހުރުމުގެ ސަބަބުން ދިވެހި ރައްޔިތުން ވަނީ ބޮޑެތި ތަކުލީފުތަކެއް އުފުލާފައެވެ. ނަތީޖާއެއްގެ ގޮތުން މުޅި އޭޝިޔާގައިވެސް ސިއްހީ ފަރުވާއަށް އެންމެ ބޮޑު ހޭދައެއް ކުރާ ބަޔަކަށް ވެފައިވަނީ ދިވެހިންނެވެ. ހާލަތު ރަނގަޅު ކުރުމަށް ދުރުވިސްނިވަޑައިގެން މޮޅު ރޭވުންތަކެއް ރާއްވަވާ ދިވެހިންނަށް ފަސޭހަކަން ހޯއްދަވައިދެއްވީ ރައީސް އިބްރާހިމް މުހައްމަދު ޞާލިޙެވެ. މުޅި ރާއްޖެ ތަރައްޤީ ކުރެވޭނީ އަތޮޅުތެރެ ތަރައްޤީކޮށްގެން ޤަބޫލުފުޅުކުރައްވާ އަމަލީ ގޮތުން އެކަން ދައްކުވައިދެއްވީ އިބްރާހިމް މުހައްމަދު ޞާލިހެވެ.
ސިއްހީ ފަރުވާއަށް ހޯދުމަށް ދިވެހިން ކަނޑުފަތާފައި މާލެ އެރި ދުވަސްތައް މާޒީކަމުގައި ހައްދަވަން ސަރުކާރުން ގެންގުޅުއްވާ ސިޔާސަތު މިވަނީ ކުލަވެ ހަޤީޤަތަކަށް ވާން ފަށާފައެވެ. ސިއްހީ ފަރުވާ ހޯދުމަށް ކުރި ދުރު ދަތުރުތައް ފަސޭހަކޮށްދީ ސިއްހީ ފެންވަރު ރަނގަޅު ފަރުވާ އަތްފޯރާފަށުން ރަށްރަށުން ލިބުމަކީ މުޅި ދިވެހިރާއްޖެ ތަރައްޤީވުމުގެ ކޮޅުމައްޗެވެ.