ތ.ވޭމަންޑޫ ސްކޫލްގެ 3 ބުރި ޢިމާރާތުގެ މަސައްކަތް ތާވަލާ އެއްގޮތަށް ކުރިއަށްނުދާނަމަ އެއްބަސްވުން އުވާލާނެކަމުގެ އިންޒާރު މަސައްކަތުގެ ކޮންޓްރެކްޓަރަށް ދީފައިވާނެކަމަށް މިނިސްޓްރީ އޮފް އެޑިއުކޭޝަނުން ވިދާޅުވެއްޖެއެވެ.
ވޭމަންޑޫ ސްކޫލްގެ ޢިމާރާތުގެ މަސައްކަތް މިދިޔަ އަހަރުގެ ސެޕްޓެމްބަރުމަހުގެ 8 ވަނަ ދުވަހު ފެށިނަމަވެސް މިހާތަނަށް މަސައްކަތް ނިމިފައެއް ނުވެއެވެ.
ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު ޢަބްދުﷲ ރިޔާޒް ހުށައަޅުއްވާފައިވާ ސުވާލަކަށް ލިޔުމުން ޖަވާބު ދެއްވަމުން މިނިސްޓަރ އޮފް އެޑިއުކޭޝަން ޑރ.އަޢިޝަތު ޢަލީ ވިދާޅުވީ ތ.ވޭމަންޑޫ ސްކޫލްގެ 3 ބުރި ޢިމާރާތުގެ މަސައްކަތަކީ މިދިޔަ އަހަރުގެ ނޮވްމެބަރު މަހުގެ 3 ވަނަ ދުވަހަށް މަސައްކަތް އެއްކޮށް ނިންމާގޮތަށް ޙަވާލުކޮށްފައިވާ މަސައްކަތެއްކަމަށެވެ. އެހެންނަމަވެސް އެމުއްދަތަށް މަސައްކަތް ނިމިފައިނުވާއިރު އެކަށީގެންވާ ފިޔަވަޅެއްވެސް ކޮންޓްރެކްޓަރ އަޅާފައިނުވާކަން ފާހަގަކުރައްވާ މިނިސްޓަރ ވިދާޅުވީ ކަންކަން ރަނގަޅުކުރުމަށް 7 ދުވަހުގެ މުއްދަތެއް ދެވި އެމުއްދަތުގައި އެކަށީގެންވާ ކުރިއެރުމެއް ނުވަތަ ހުށައަޅަންޖެހޭ ލިޔެކިޔުން ހުށަނާޅާއިފިނަމަ އެއްބަސްވުން އުވާލުމުގެ އިންޒާރު ކޮންޓްރެކްޓަރަށް ދީފައިވާނެކަމަށެވެ.
އެހެންނަމަވެސް މިއަހަރުގެ ޖުލައިމަހުގެ 5 ވަނަ ދުވަހު މިމުއްދަތު ހަމަވެފައިވާއިރު އެއްބަސްވުން އުވާލާފައިވާކަމެއް ނުވަތަ ނޫންކަމެއް މިނިސްޓަރގެ ޖަވާބުގައި ވިދާޅުވެފައެއް ނުވެއެވެ. ނާސާ ލިންކް ޕްރައިވެޓް ލިމިޓެޑާ މިމަސައްކަތް ޙަވާލުކޮށްފައިވަނީ މިދިޔަ އަހަރުގެ އޯގަސްޓްމަހުގެ 18 ވަނަ ދުވަހުގައެވެ.
ވެމަންޑޫ ސްކޫލްގެ މަލްޓިޕަރޕަސް ހޯލްގެ މަސައްކަތް ނިމޭނެ ތާރީޚެއް އޮޅުންފިލުވުމަށްވެސް އެދާއިރާގެ މެމްބަރު ޢަބްދުﷲ ރިޔާޒްވަނީ އެޑިއުކޭޝަން މިނިސްޓަރާ ސުވާލުކުރައްވާފައެވެ. މިސުވާލަށްވެސް ލިޔުމުން ޖަވާބު ދެއްވަމުން އެޑިއުކޭޝަން މިނިސްޓަރ ޑރ.އާއިޝަތު ޢަލީ ވިދާޅުވީ ރިނޮކޮން މޯލްޑިވްސްއާއި މިމަސައްކަތް ޙަވާލުކޮށް މޭއިމަހުގެ 20 ވަނަ ދުވަހު މަސައްކަތް ފަށާފައިވާކަމަށެވެ. އަދި މިހާރު ކުރިއަށްދަނީ ހިޔާކުރުމާއި ކޮންކްރީޓް މަސައްކަތްތައްކަމަށް މިނިސްޓަރ ވިދާޅުވިއެވެ. އަދި ތާވަލާއެއްގޮތަށް މިއަހަރުގެ ޑިސެމްބަރު މަހުގެ ނިޔަލަށް މަސައްކަތް އެއްކޮށް ނިންމާ މިނިސްޓްރީއާއި ޙަވާލުކުރެވިގެންދާނެކަމަށް މިނިސްޓަރ ވިދާޅުވިއެވެ.
ދައުލަތުގެ ބަޖެޓުން އެންމެ ބޮޑު ހޭދައެއްކުރާ އެއް ދާއިރާއަކީ ތަޢުލީމީ ދާއިރާއެވެ. ރާއްޖޭގައި ހިންގާ ޢުމްރާނީ ތަރައްޤީއާއި ގުޅުންހުރި އެންމެ ގިނަ މަޝްރޫޢުތައް ކުރިއަށްގެންދާ އެއްދާއިރަކީވެސް ތަޢުލީމީ ދާއިރާއެވެ. އެހެންނަމަވެސް ކޮންޓްރެކްޓަރުންނައި ޙަވާލުކޮށްގެން ހިންގާ ގިނަ މަޝްރޫޢޫތަކުގެ މަސައްކަތް ހުއްޓި ކުރިއަށް ނުދާކަމުގެ ޝަކުވާ ވަނީ ބޮޑުވެފައެވެ. މިމައްސަލަ ޙައްލުކުރުމަށް މިނިސްޓްރީތަކުން ކޮންޓްރެކްޓަރުންނާއި މަޝްވަރާކޮށް އަދި އެއްބަސްވުން އުވާލުމުގެ އިންޒާރުދީ ބައެއް ޙާލަތްތަކުގައި އެއްބަސްވުން އުވާލާފައިވެސްވެއެވެ.