ސްޓެލްކޯގެ ސީއެސްއާރުގެ ދަށުން 3 ރަށެއްގެ މަގުބައްތި މަރާމާތުކޮށް ބަލެހެއްޓުމުގެ މަސައްކަތާ ހަވާލުވެއްޖެއެވެ. ރަށްރަށުގައި މަގުތަކާއި އާންމު ތަންތަނުގައި ޖަހާފައި ހުންނަ މަގުބައްތިތައް މިހާރު ބަލަހައްޓަނީ ކައުންސިލްތަކުގެ ބެލުމުގެ ދަށުންނެވެ.
ސްޓޭޓް އިލްކްޓްރިކް ކޮމްޕެނީ (ސްޓެލްކޯ)އިން ހަވާލުވެފައިވަނީ އއ.ރަސްދޫ، އއ.ތޮއްޑޫ އަދި އއ.އުކުޅަހުގެ މަގު ބައްތިތައް ބަލަހައްޓައިދިނުމުގެ މަސައްކަތާއެވެ.
މިކަމުގެ އެއްބަސްވުމުގައި ސްޓޭލްކޯގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރ އަޙްމަދު ޝަރީފެވެ. އެއްބަސްވުން ހެދި ރަށްތަކުގެ ތެރެއިން ތޮއްޑޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް އަޙްމަދު ކަރަމްއެވެ. އުކުޅަސް ކައުންސިލްގެ ފަރާތުން ކައުންސިލްގެ ރައީސް ޝައުކަތު އިބްރާހީމް، ރަސްދޫ ކައުންސިލްގެ ފަރާތުން އެކައުންސިލްގެ ރައީސް މުޙައްމަދު ނާހިދުވަނީ އެއްބަސްވުމުގައި ސޮއިކުރައްވާފައެވެ.
އެއްބަސްވުމުގައި ސޮއިކުރެއްވުމަށް ފަހު ވާހަކަދައްކަވަމުން ސްޓޭލްކޯގެ މެނޭޖިންގ ޑިރެކްޓަރ އަޙްމަދު ޝަރީފް ވިދާޅުވީ، އެކުންފުނިން ރަށްރަށުގެ ކައުންސިލްތަކާއެކު ކުރިއަށްގެންދިޔަ ބައްދަލުވުމުގައި މަގު ބައްތިތައް ބަލަހައްޓައިދިނުމުގެ މުހިންމުކަން ކައުންސިލްތަކުން ފާހަގަކުރެއްވިކަމަށެވެ.
އަދި މިއީ ރަށްރަށް ހިންގުމުގައި ކައުންސިލްތަކުން ކުރައްވަމުންދާ މަސައްކަތުގައި އެހީވުމަށް ކުރިއަށްގެންދިއުމަށް ނިންމި މަސައްކަތެއްކަމަށްވެސް ޝަރީފް ވިދާޅުވިއެވެ. ސްޓެލްކޯއިން އަބަސްދުވެސް މަސައްކަތް ކުރައްވަނީ ރައްޔިތުންނަށް ލުއިފަސޭހަ ބޭނުންތެރި ޚިދުމަތެއް ދިނުމަށްކަން ޝަރީފް ފާހަގަކުރެއްވިއެވެ. ޝަރީފް ވިދާޅުވީ ސްޓެލްކޯއިން މަސައްކަތް ކުރާނީ، އިރުއޮއްސުމަށް ފަހު ރަށުގައި ނިވިފައިވާ އެއްވެސް މަގު ބައްތިއެއް ނުބެހެއްޓުމަށްކަމަށެވެ. އަދި މައްސަލައެއް އުޅޭނަމަ، ސްޓެލްކޯއިން އެކަމަށް އެންމެ އަވަސް ޙައްލެއް ގެންނާނެކަމަށްވެސް ޝަރީފް ވިދާޅުވިއެވެ.
ޝާރީފް ވިދާޅުވީ މި ތިން ރަށުގައި ފަށާފައިވަނީ ތަޖުރިބާކުރުމުގެ މަޝްރޫޢެއް ކަމަށެވެ. ކުރިއަށް އޮތްތާންގައި އިތުރު ރަށްރަށުގެ ކައުންސިލްތަކާ ގުޅިގެން މި މަސައްކަތް ފަށާނެކަމަށްވެސް ޝަރީފް ވިދާޅުވިއެވެ.
"ވަރަށް އަވަހަށް އއ.އަތޮޅުގެ ބާކީހުރި ރަށްރަށުގައި ފާށާނަން. އަމާޒަކީ ސްޓެލްކޯގެ ޚިދުމަތްދޭ އެހެން އަތޮޅުތަކުގައިވެސް މި އަހަރު ނިމުމުގެ ކުރިން ސްޓެލްކޯއިން މި ޚިދުމަތާ ހަވާލުވުން." ޝާރިފް ވިދާޅުވިއެވެ.
މި މަސައްކަތުގައި ބައްތިތައް މަރާމާތުކޮށް ބެލެހެއްޓުމާއި އެކަމުގެ ޚަރަދުތައްވެސް ބަލަހައްޓާނީ ސްޓެލްކޯއިންނެވެ.
ޝަރީފް ވިދާޅުވީ ރަށްރަށުގެ ކައުންސިލްތަކަށް އެހީވުމަށް ކުރާ މަސައްކަތުގައި، ކުނި މެނޭޖްކުރުމުގައި ތަޖުރިބާ ކުރުމުގެ މަޝްރޫޢެެއް މާފުށީގައި ފަށާފައިވާކަމަށެވެ. މިއީ ކާމިޔާބު ކަމާއެކު ކުރިއަށްގެންދެވޭ، މަސައްކަތަކަށް ވެއްޖެނަމަ، އެހެން ރަށްތަކުގައިވެސް މިކަން ކުރިއަށްގެންދާނެކަމަށް ޝަރީފް ވިދާޅުވިއެވެ.