5 އަހަރު ފަހުން އެނބުރި އަންނަ ސެލިބްރިޓީ ޑާންސް ޝޯ "ޖަލަކް ދިކްލާ ޖާ" ގައި ބައިވެރުވުމަށް މަޝްހޫރު ކްރިކެޓް ކުޅުންތެރިންކަމަށްވާ ސުރޭޝް ރައިނާ އާއި ހަރުބަޖަންދް ސިންގަށް ހުށަހަޅައިފިއެވެ.
މި ދެމީހުންގެ އިތުރުން ސްރީލަންކާގެ ކުރީގެ ކްރިކެޓް ކުޅުންތެރިޔާ ލަސިތް މަލިންގާއަށް ވެސް ޝޯގައި ބައިވެރިވުމަށް ވަނީ ހުށަހަޅާފައެވެ. ކަލާސް ޓީވީން ދައްކާ މި ޝޯގައި މި ތަރިން ބައިވެރިވާނެކަމަށް ކަލާސް އިން ވަނީ ޔަޤީންވެސްކޮށްދީފައެވެ. މަޝްހޫރު އިތުރު ސެލިބްރިޓީންވެސް މި ޝޯގައި ބައިވެރިވާއިރު އެމީހުންގެ ނަންތަކެއް އަދި ހާމައެއް ނުކުރެއެވެ.
މި ޝޯގެ ޖަޖުންގެ ގޮތުގައި މިފަހަރު ހޮވާފައިވަނީ ޑައިރެކްޓަރު/ޕްރޮޑިއުސަރު ކަރަން ޖޯހަރު، މޮޅުން ނެށުންތަކެއް ފިލްމުތަކުގައި ދައްކާފައިވާ މާދުރީ ޑިކްސިޓް އަދި ވަރަށް ހުނަރުވެރި ނެށުންތެރިއެއްކަމަށްވާ ނޯރާ ފަތޭއެވެ.
މި ޝޯގެ އެންމެ ފަހު ސީޒަން ދައްކާފައިވަނީ 2016 ން 2017 އަށެވެ. އޭގެ ޓީއާރުޕީ ދަށްކަމުން ޝޯއަށް ބޮޑު ބަދަލުތަކެއް ގެންނަން، ޝޯ އުފައްދާ ފަރާތުން އޭރު ވަނީ ނިންމާފަ އެވެ.
2006 ވަނަ އަހަރު ދަންކަން ފެށި ޖަލަކް ދިކްލާ ޖާގެ 9 ސީޒަނެއް މިހާތަނަށް ގެނެސްދީފައިވެއެވެ. މި ޝޯގެ ޖަޖްކަން ކޮށްފައިވާ ތަރިންގެ ތެރޭގައި މާދުރީ ޑިކްޝިޓް، ޖޫހީ ޗައުލާ، ޝިލްޕާ ޝެޓީ އަދި ޝާހިދު ކަޕޫރު ފަދަ ފިލްމީ ތަރިން ވެސް ހިމެނެ އެވެ.