ކޯވިޑް ފެތުރޭތީ ސިއްޙީ ޚިދުމަތްދޭ ތަންތަނާއި އަދި އާއްމު ޚިދުމަތްދޭ ބައެއް ތަންތަނުގައި ރައްކާތެރިކަމުގެ ފިޔަވަޅު އިތުރުކޮށްފިއެވެ.
ޚާއްސަކޮށް ހޮސްޕިޓަލްތަކާއި ކްލިނިކްތަކުގައި މިހާރުވަނީ، ރައްކާތެރިކަމުގެ ގޮތުން މާސްކް އެޅުން މަޖުބޫރުކޮށްފައެވެ. އެގޮތުން އެންމެ ގިނަ ބަޔަކު ޚިދުމަތް ހޯދާ، އައިޖީއެމްއެޗްގައި މީހުން، އުޅޭ ވަގުތު މާސްކް އެޅުން ވަނީ ލާޒިމުކޮށްފައެވެ. އަދި ހޮސްޕިޓަލަށް ބަލިމީހުންނަށް ޒިޔާރަތްކުރެވޭ ވަގުތައްވެސް ވަނީ ބަދަލު ގެނެސްފައެވެ. އެގޮތުން ވަގުތު ކުރުކޮށް، މިހާރު ބަލިމީހުން ކައިރިއަށް ޒިޔާރަތް ކުރެވޭނެ ވަގުތަކީ ހަވީރު 05:00އިން ރޭގަނޑު 07:00އަށެވެ.
ހޮސްޕިޓަލުން ޚިދުމަތް ހޯދަން ދިއުމުގައި، އެކުގައި ގިނަ މީހުން ނުގެންދިއުމަށްވެސްވަނީ އިލްތިމާސްކޮށްފައެވެ. އަދި ކޮންމެހެން ދާންޖެހިއްޖެ ޙާލަތެއްގައި ނޫނީ، ބަލިމީހުންނަށް ޒިޔާރަތް ނުކުރުމަށްވެސްވަނީ އިލްތިމާސްކޮށްފައެވެ.
މީގެއިތުރުން އެއަރޕޯޓާއި ބައެއް އާއްމު ޚިދުމަތްދޭ ބައެއް ތަންތަނުންވެސް ދަނީ ރައްކާތެރިކަމުގެ ފިޔަވަޅު އެޅުމަށް އިލްތިމާސްކުރަމުންނެވެ. އެގޮތުން ހުރިހާ ވަގުތެއްގައިވެސް މާސްކް އެޅުމާއި އަދި އެއަރޕޯޓަށް މީހުން ފުރުވަން ދާއިރުވެސް ވީހާވެސް މަދު މީހުން ދިއުމަށް އެދެއެވެ.
ވޭތުވެދިޔަ ހަފްތާގައި ރާއްޖޭގައި ކޯވިޑްގެ އަދަދުތައްވަނީ ވަރަށް ބޮޑަށް މަތިވެފައެވެ. އެޗްޕީއޭގެ ތަފާސް ހިސާބުތަކުން ދައްކާގޮތުގައި މިދިޔަ ހަފްތާގައި 1202 ކޭސް ރިޕޯޓްކުރިއެވެ. އޭގެ ކުރީ ހަފްތާގައި މިއަދަދު ހުރީ 400ގައެވެ.
ކޯވިޑް ޖެހިގެން އެޑްމިޓް ކުރަމުންދާ މީހުންގެ ޢަދަދުވެސްވަނީ އިތުރުވެފައެވެ. އެގޮތުން މިދިޔަ ހަފްތާގައި ބައްޔަށް ޕޮޒިޓިވްވެގެން 51 މީހަކުވަނީ އެޑްމިޓްކޮށްފައެވެ. އަދި މިދިޔަ ހަފްތާގައި މި ބަލީގައި 3 މީހުން ނިޔާވިއެވެ. މިއާއެކު ރާއްޖެއިން މިބަލީގައި ނިޔާވި މީހުންގެ ޢަދަދުވަނީ 305އަށް އަރާފައެވެ.