އިއްޔެ މުޅި ސޯޝަލް މީޑިއާގައި އެންމެ ބޮޑަށް ދެކެވުނު އެއް ވާހަކައަކީ ރަންބީރާއި އާލިއާގެ ވާހަކައެވެ. ބޮލީވުޑްގެ މަޝްހޫރު ދެ ތަރިންކަމުގައިވާ އާލިއާ ބަޓްއާއި ރަންބީރު ކަޕޫރަށް ކުއްޖަކު ލިބެން އުޅޭކަން ޢިއުލާނުކުރީ އިއްޔެއެވެ.
ލޯބި ފޮޓޯއާއިއެކު އާލިއާގެ އިންސްޓަގްރާމްގައި މިކަން އިޢުލާނުކުރުމާއިއެކު އާލިއާގެ ފޭނުން ދަނީ އޭނާއަށް މަރުހަބާ ކިޔަމުންނެވެ.
މިކަމާއި ގުޅިގެން ރަންބީރުގެ މަންމަ ނީތޫ ކަޕޫރާއި ރިޕޯޓަރުން ސުވާލުކުރުމުން ނީތޫ ބުނީ އެހެން އެންމެންނަށްވުރެ އޭނާ އުފާވާ ކަމަށެވެ. އިއްޔެ އާންމުވެފައިވާ ވީޑިއޯއެއްގައި ރިޕޯޓަރުން ނީތޫއާއި ސުވާލުކުރަމުންދާއިރު ނީތޫގެ މޫނުމަތިން ހިނިތުންވުން ނުފިލައެވެ.
އިއްޔެ ހެނދުނު ބަލިވެއިންކަން އިޢުލާނުކޮށް ސޯޝަލް މީޑިއާއަށް ދޫކޮށްލި ފޮޓޯއާއިއެކު އާލިއާ ވަނީ އެންމެން ހައިރާންކޮށްލާފައެވެ. ފޮޓޯގައި ފެންނަނީ ބަނޑުގެ އަލްޓްރާސައުންޑް ސްކޭނެއް ހަދަން އާލިއާ އޮށޯވެ އޮތްއިރު ކައިރީގައި ރަންބީރު އިށީދެއިންތަނެވެ. އަދި ކެޕްޝަންގައި "އަވަ ބޭބީ ........ ކަމިންގް ސޫން" އޭ ވެސް ލިޔެފައި އޮތެވެ.
މި ޚަބަރާއިއެކު ބޮލީވުޑްގެ ގިނަ ތަރިން ދަނީ އާލިއާ އަށާއި ރަންބީރަށް މަރުހަބާ ކިޔަމުންނެވެ.
ގާތްގަޑަކަށް 3 އަހަރު ދުވަހު އެކީގައި އުޅުމަށްފަހު ރަންބީރާއި އާލިއާ ކައިވެނިކުރީ މިދިޔަ އޭޕްރީލް މަހުގެ 14 ވަނަ ދުވަހުއެވެ. ރަންބީރުގެ އާރްވީ މޭންޝަންގައި ބޭއްވި ކައިވެނީގެ ހަފްލާގައި ބައިވެރިވީ ދެފަރާތުގެ ވަރަށް ގާތް މީހުންނެވެ.