އެޗްބީއޯގެ ކާމިޔާބު ޓީވީ ސީރީޒް "ގޭމް އޮފް ތުރޯންސް" ލީޑް އެއް ކެރެކްޓާ ކަމަށްވާ ޖޯން ސްނޯއާ އެކު އެ ސީރީޒްގެ ސްޕިން އޮފްއެއް ގެނެސްދިނުމުގެ މަސައްކަތް ކުރަމުން ދާކަމަށް ދާދިފަހުން ރިޕޯޓުތައް ވަނީ ބުނެފައެވެ.
އޭގެފަހުން މިހާރު މިވަނީ މި ސީކުއަލްގެ ނަންވެސް އިޢުލާނުކޮށްފައެވެ. މި ފެންޓަސީ ސީރީޒްގެ ލިޔުންތެރިޔާ ގޯޖް އާރް އާރް މާޓިން ހާމަކުރިގޮތުގައި ޕްރޮޑަކްޝަން ޓީމުން މި ސީކުއަލް އަށް ދީފައިވާ ނަމަކީ "ސްނޯ" އެވެ.
ސްޕިން އޮފް ސީރީޒްގައި ވެސް ޖޯން ސްނޯގެ ރޯލުން ފެންނާނީ "ގޭމް އޮފް ތުރޯންސް"ގެ އޮރިޖިނަލް ސީރީޒްގައި އެ ރޯލު ކުޅުނު ކިޓް ހެރިންގްޓަންއެވެ. އަދި އެ ސީރީޒްގައި ފަށާނީ "ގޭމް އޮފް ތުރޯންސް" ނިންމާލި ހިސާބުން ކަމަށްވެސް މީޑިއާތަކުން ވަނީ ރިޕޯޓުކޮށްފައެވެ.
"ގޭމް އޮފް ތްރޯންސް" ގެ އިތުރު ސްޕިން އޮފްއެއްގެ މަސައްކަތްވެސް އެޗްބީއޯ އިން އަންނަނީ ކުރަމުންނެވެ. އެއީ އަންނަ އޯގަސްޓުމަހު ރިލީޒްކުރަން ހަމަޖެހިފައިވާ "ހައުސް އޮފް ދަ ޑްރެގަން" އެވެ.
"ގޭމް އޮފް ތްރޯންސް" އަކީ މާޓިންގެ "އަ ސޯންގް އޮފް އައިސް އެންޑް ފަޔާ"އަށް ބިނާކޮށް ގެނެސް ދޭން ފެށި ސިލްސިލާ ސީރީޒެކެވެ. މި ސީރީޒްގެ 8 ވަނަ ސީޒަނާއެކު ސީރީޒް ނިންމާލާފައިވަނީ 2019 ވަނަ އަހަރެވެ.
"ޓޭލްސް އޮފް ޑަންކް އެންޑް އެގް"، "ޓެން ތައުޒަން ޝިޕްސް"، "ނައިވް ވޮޔޭޖެސް"، "ފްލީ ބޮޓަމް" އަކީވެސް މި ސީރީޒްގެ ސްޕިން އޮފްތަކެކެވެ.