އެމެރިކާގެ މަޝްހޫރު ލަވަކިޔުންތެރިޔާ ބިޔޯންސޭގެ އައު އަލްބަމެއް އަންނަ މަހު ނެރޭނެކަމަށް އޭނާ އިޢުލާނުކޮށްފިއެވެ. މިއީ މިލިއަނުން ގުނާލެވޭ އޭނާގެ ފޭނުންނަށް ލިބުނު ބޮޑު ސަޕްރައިޒެކެވެ.
ބިޔޯންސޭގެ މިފަހަރުގެ އަލްބަމަކީ "ރެނެސަންސް" އެވެ. އަންނަ ޖުލައި މަހުގެ 29 ވަނަ ދުވަހު ރިލީޒްކުރަން ހަމަޖެހިފައިވާ މި އަލްބަމަކީ ބިޔޯންސޭގެ 7 ވަނަ ސްޓޫޑިއޯ އަލްބަމެވެ. މި އަލްބަމް އޭނާ މި ނެރެނީ 6 އަހަރު ދުވަހުގެ މެދުކެނޑުމަކަށްފަހުއެވެ.
މަޝްހޫރު ލަވަކިޔުންތެރިޔާ އޭނާގެ ފޭނުން ސަޕްރައިޒްކޮށްލީ ހަމައެކަނި އައު އަލްބަމްގެ ވާހަކައިންނެއްނޫނެވެ. މަޝްހޫރު ވޯގު މަޖައްލާގެ ޖުލައި މަހުގެ ކަވަރ ގާލް އަކީވެސް އޭނާކަމަށް ހާމަކޮށް ބިޔޯންސޭ ވަނީ އޭނާގެ ފޭނުން އުފާކޮށްދީފައެވެ.
ބިޔޯންސޭ އެންމެ ފަހުން ރިލީޒްކުރި އަލްބަމަކީ 2016 ވަނަ އަހަރު ނެރުނު "ލެމަނޭޑް" އެވެ. އައު އަލްބަމެއް ނެރެން މިހާ ގިނަ ދުވަސްވީ ކޯވިޑުގެ ބަލިމަޑުކަމާއި ހެދި ކަމަށް ބިޔޯންސޭ ވަނީ ބުނެފައެވެ. "ލެމަނޭޑް" ވަނީ 2017 އަހަރު ބޭއްވި ބްލެކް އެންޓަޓެއިންމެންޓް އެވޯޑަށް ނޮމިނޭޓްވެސް ވެފައެވެ. މި އަލްބަމަކީ ބިޔޯންސޭގެ ކެރިއަރުގައިވެސް އެންމެ ތަޢުރީފް ލިބުނު އަލްބަމެވެ.