2005 ވަނަ އަހަރު ދެއްކި ފިލްމުތަކުގެ ތެރެއިން އެންމެ ބޮޑު އާމްދަނީއެއް ހޯދި ފިލްމު "ނޯ އެންޓްރީ" ގެ ސީކުއަލެއް ހަދާނެކަމަށް ޑައިރެކްޓާ އަނީސް ބަޒްމީ ކަށަވަރުކޮށްދީފައިވަނީ މިދިޔަ މެއި މަހުއެވެ.
"ނޯ އެންޓްރީ" ގެ ފުރަތަމަ ބައިން ފެނުނު ލީޑް އެކްޓަރު ސަލްމާންޚާންގެ އިތުރުން އަނިލް ކަޕޫރާއި ފަރްދީންޚާންވެސް ސީކުއަލުން ފެންނާނެކަމަށް އަނީސް އޭރު ވަނީ ބުނެފައެވެ. ނަމަވެސް ލީޑް ބަޠަލާއިންގެ ވާހަކައެއް އޭރު ނުދައްކައެވެ.
އޭގެފަހުން އަޑު އިވޭގޮތުގައި ސަލްމާނާއި ފަރުދީން އަދި އަނިލް ފިލްމުގައި ފެންނާނީ ޓްރިޕްލް ރޯލުންނެވެ. އަދި ފިލްމުގެ ކޮންމެ ފިރިހެން ކެރެކްޓާއަކަށް ބަޠަލާއެއް ހަމަޖައްސާނެއެވެ.
މިއާއިއެކު މި ފިލްމުގައި ޖުމްލް 10 ބަޠަލާއިން މަސައްކަތްކުރާނެކަމަށް ބެލެވެއެވެ. މި 10 ބަޠަލާއިންނަކީ ކޮންބައެއްތޯ ބަލަން ފޭނުން މިހާރު ތިބޭނީ ކެތްމަދުވެފައިކަން ޔަޤީނެވެ.
އޮރިޖިނަލް ފިލްމުން ފެނުނު ބަޠަލާއިން ކަމުގައިވާ ބިޕާޝާ ބާސޫ، ލާރާ ދައްތާ އަދި އީޝާ ޑިއޯލް ސީކުއަލް އިން ނުފެންނާނެ ވާހަކަވެސް މިހާރު ވަނީ ފެންމަތިވެފައެވެ. ނަމަވެސް އޮރިޖިނަލް ފިލްމުގެ މުޅި ކާސްޓު ސީކުއަލްއަށް ގެންނަން ޕްރޮޑަކްޝަން ޓީމުން ވަރަށް މަސައްކަތްކުރިއެވެ. މި ފިލްމުގެ މަސައްކަތް އަނީސް ފަށާނީ މިއަހަރު ފަހުކޮޅުއެވެ. އެހެންނަމަވެސް ކާސްޓުންނާއި ބެހޭގޮތުން ރަސްމީކޮށް ޕްރޮޑަކްޝަން ޓީމުން އަދި އެއްވެސް އެއްޗެއް ނުބުނެއެވެ.
"ނޯ އެންޓްރީ" އަކީ 2002 ވަނަ އަހަރު ދެއްކި ތަމަޅަ ފިލްމު "ޗާލީ ޗެޕްލިން" ގެ ހިންދީ ރީމޭކެވެ. މީގެ ސީކުއަލްގެ މަސައްކަތް އަންނަ މޭ މަހު ފެށުމަށްވަނީ ހަމަޖެހިފައެވެ.