ކުރީގެ ރައީސް މުޙައްމަދު ނަޝީދު ދޫކޮށްލުމަށް ގޮވާލައި ބައިނަލްއަޤުވާމީ މުޖުތަމަޢާއި، ނަޝީދުގެ ޤާނޫނީ ޓީމުން މަސައްކަތް ކުރަމުންދަނީ ހަމައެކަނި ނަޝީދު މިނިވަންކުރުމުގެ މަޤުޞަދުގައި ނޫންކަމަށާއި، އެމަސައްކަތް ކުރަމުންދަނީ ލާދީނީ ފިކުރަށް ރާއްޖޭގައި ފުރުޞަތު ދިނުމުގެ ބޭނުމުގައި ކަމަށް ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ޑރ.އަބްދުﷲ ޚަލީލް ތުހުމަތުކުރައްވައިފިއެވެ.ނިލަންދޫ ދާއިރާގެ މެންބަރު ނެރުއްވި ބަޔާނެއްގައި ވަނީ ރައީސް ޔާމީންގެ ސަރުކާރުން ދީނުގެ ހަރުކަށި ފިކުރަށް ފުރުޞަތު ދެމުންދާކަމަށް ތުހުމަތުކޮށް، ނަޝީދުގެ ޤާނޫނީ ޓީމުން މަސައްކަތް ކުރަމުންދަނީ ރާއްޖެއާއިމެދު ބައިނަލްއަޤުވާމީ މުޖުތަމަޢުން ދެކޭގޮތް ބަދަލުކުރުމަށް ކަމަށެވެ. އަދި މިމައްސަލައާއި މެދު ބައިނަލްއަޤުވާމީ މުޖުތަމަޢާއި، އާންމުންގެ ތެރޭގައި ދެކެވެމުންދާ ވާހަކަތަކަކީ ޝަރުޢީ ކޯޓެއްގެ ކުރިމަތީގައި އެއްވެސް ބުރަދަނެއްހުރި ވާހަކަތަކެއް ނޫންކަމަށާއި ޝަރުޢީ ކޯޓަކުން އެވާހަކަތަކަށް ބައްލަވައި، ޝަރީޢަތް ކުރައްވާނެ އެއްވެސް ޖާގައެއް އޮންނާނެކަމަށް ދެކެވަޑައިނުގަންނަވާ ކަމަށް ވިދާޅުވެފައިވެއެވެ. ނަޝީދުގެ ޤާނޫނީ ޓީމުގެ ފަރާތުން ބައިނަލްއަޤުވާމީ މުޖުތަމަޢުގައި ރާއްޖޭގެ ޝަރުޢީ ދާއިރާގެ އަގުވައްޓާލުމަށް ތަކުރާރުކޮށް މަސައްކަތް ކުރަމުންދާކަމަށްވެސް މި ބަޔާނުގައި ތުހުމަތުކުރައްވާފައިވެއެވެ. އަދި ނަޝީދަކީ ސިޔާސީ ކުށްވެރިއެއްކަމަށް ދައްކައި، ނަޝީދު ކުރައްވާފައިވާ ކުށް ފޮރުވަން ޤާނޫނީ ޓީމުން މަސައްކަތް ކުރަމުންދާކަމަށްވެސް ތުހުމަތުކުރައްވާފައިވެއެވެ.