ޓީވީ ސީރީޒް "ތަޝަން އޭ އިޝްގު: ދިލްސޭ ދިލް ތަކް" ރިއަލިޓީ ޝޯ "ބިގް ބޮސް" އަދި އެނޫންވެސް ޓީވީ ޝޯތަކުން ފެނުނު ޖޭސްމީން ބާސިންވެސް ބޮލީވުޑް ފިލްމަކުން ފެންނަން ތައްޔާރުވެއްޖެއެވެ.
އެކްޓަރ ގިޕީ އަގަރްވާލާއިއެކު "ހަނީމޫން" ކިޔާ ފިލްމަކުން ޖޭސްމީން ބޮލީވުޑަށް ތައާރަފްވާ ފިލްމު ޕްރޮޑިއުސްކުރަނީ މަޝްހޫރު ޕްރޮޑިއުސަރ ޑައިރެކްޓަރ މަހޭޝް ބަޓްއެވެ. މަހޭޝްގެ އިތުރުން އޭނާއަށް ބޮޑުބޭބެ ކިޔާ ވިކްރަމް ބަޓް އަކީވެސް މީގެ އެއް ޕްރޮޑިއުސަރެވެ.
ޖޭސްމީން ސޮއިކޮށްފައިވާ މި ފިލްމުގެ ޑައިރެކްޓަރަކީ މަނީޝް ޗަވަންއެވެ. މިއީ މަނީޝް ފުރަތަމަ ޑައިރެކްޓުކުރާ ފިލްމެވެ. އަދި ނަމެއް އިއުލާންކޮށްފައި ނުވާ މި ފިލްމުގެ މަސައްކަތް ފަށަން ހަމަޖެހިފައިވަނީ އަންނަ ޖުލައި މަހު ފަހުކޮޅުއެވެ. ފިލްމުގެ ކާސްޓުންނާއި ޖޯންރާވެސް އަދި ނޭގެއެވެ.
މިހާރު ތާވަލުކޮށްފައިވާގޮތުން މި ފިލްމު ރިލީޒްކުރާނީ އަންނަ އޮކްޓޫބަރު 25 ގައެވެ.
ޖޭސްމީން އާ ލޯބިވެރިޔާ އަދި ޓީވީ ތަރި އަލީ ގޯނީ ކައިވެނިކުރަން ނިންމި ވާހަކަ މިދިޔަ އަހަރު ވަނީ އިއުލާނުކޮށްފައެވެ.
ދެ ތަރިން އެކީގައި ކަލާޒްގެ ރިއަލިޓީ ޝޯ "ބިގް ބޮސް 14" ގައި ވެސް ވާދަކުރި އެވެ. އަލީ އާއި ޖޭސްމިން ލޯބީގެ ގޮތުން ގުޅިގެން އުޅޭކަން ކަށަވަރުކޮށްދިނީ ވެސް އެ ޝޯގެ ތެރޭގަ އެވެ. އެކަމަކު އެ ޝޯގެ ކުރިން ވެސް އަލީ އާއި ޖޭސްމިންއާ ދެމެދު ހާއްސަ ގުޅުމެއް އޮވެ އެވެ. އެ ގުޅުން އެންމެ ބޮޑަށް ބަދަހިވީ ރިއަލިޓީ ޝޯ "ހަތުރޯން ކޭ ކިލާޅީ" ގެ ނުވަ ވަނަ ސީޒަންގެ ތެރޭގަ އެވެ.