ރާއްޖޭގައި އަލަށް ބޭނުންކުރަން ފަށާ 'ދިވެހި
ބަޔޯމެޓްރިކް ޕާސްޕޯޓް' އަދި އީ-ގޭޓްގެ ޚިދުމަތް އަންނަ އާދީއްތަ ދުވަހު އިފްތިތާޙުކުރައްވަން
ނިންމަވައިފިއެވެ.
އާ ޕާސްޕޯޓް އަދި އީ-ގޭޓްގެ ޚިދުމަތް ލޯންޗް ކުރެއްވުމަށް
ހަމަޖެހިފައިވަނީ އާދިއްތަ ދުވަހުގެ ރޭ ހޮޓެލް ޖެންގައި ބާއްވަވާ ޚާއްޞަ
ޖަލްސާއެއްގައެވެ. އަލަށް ތަޢާރަފް ކުރެއްވުމަށް ހަމަޖެހިފައިވާ ޕާސްޕޯޓަކީ،
މިހާރު ބޭނުންކުރާ ޕާސްޕޯޓަށްވުރެ ފެންވަރުގެ ގޮތުންނާއި ސަލާމަތީ ގޮތުންވެސް ވަރުގަދަ
ޕާސްޕޯޓެކެވެ. މި ޕާސްޕޯޓުން ފެނިގެންދާނެ އެންމެ ބޮޑު އެއް ތަފާތަކީ ޕާސްޕޯޓުގެ
ޑޭޓާ ޕޭޖަށް ގެނެސްފައިވާ ބަދަލެވެ. އާ ޕާސްޕޯޓުގެ ޑޭޓާ ޕޭޖް ފަރުމާކުރައްވާފައިވަނީ
"ޕޮލިކަރބަން" ބޭނުންކުރައްވައިގެންނެވެ. އެހެންކަމުން ފެންޖެހުމުން
ފާސްޕޯޓުގައި ހުންނަ ފޮޓޯއާއި ލިޔުންތައް ފޭދިގެން ދިޔުންފަދަ މައްސަލަތައް
ކުރިމަތިނުވާނެކަމަށް ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަނުން
ވިދާޅުވެއެވެ.
އަލަށް ތަޢާރަފުކުރައްވާ ޕާސްޕޯޓާއެކު، ޕާސްޕޯޓް
ހެއްދުމުގެ އަގަށް އެއްވެސް ބަދަލެއް ނާންނާނެކަމަށާއި އަދި ކުރިން ޕާސްޕޯޓު
ހައްދާފައިވާ ފަރާތްތަކަށްވެސް ޕާސްޕޯޓުގެ މުއްދަތު ހަމަވަންދެން ކުރީގެ ޕާސްޕޯޓް
ބޭނުންކުރެވޭނެ ކަމަށްވެސް އިމިގްރޭޝަނުން ހާމަކުރައްވައެވެ.
އަލަށް
ތަޢާރަފްކުރައްވާ އީ-ގޭޓްގެ ޚިދުމަތާއެކު ފަސިންޖަރުން ޕާސްޕޯޓްގައި
ތައްގަނޑުޖަހަން އިމިގްރޭޝަން ކައުންޓަރުގައި މަޑުކުރާކަށް ނުޖެހޭނެއެވެ. އީ-ގޭޓްގައި ޕާސްޕޯޓާއި
ބޯޑިން ކާޑު ސްކޭންކުރުމަށްފަހު އިނގިލީގެ ނިޝާން ޖައްސަންޖެހޭނެއެވެ. އެއާއެކު ގޭޓް
ހުޅުވިގެންދާނީ ފަސިންޖަރުގެ މަޢުލޫމާތުތައް މެޝިންގެ އެހީގައި
ކަށަވަރުކުރުމަށްފަހުގައެވެ. މި ޚިދުމަތް ފުރަތަމަ ދެއްވުމަށް ހަމަޖެހިފައިވަނީ ދިވެހިންނަށެވެ. މި
ޚިދުމަތް ފެއްޓެވުމަށް ޑިޕާޗަރ ގޭޓްގައި އެއް އީ-ގޭޓް އަދި އެރައިވަލްގައި
ގޭޓްގައި ދެ އީ-ގޭޓް ހަރުކުރެއްވުމަށް ވަނީ ހަމަޖެހިފައެވެ.