ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގައި އެންމެ އިސްކަމެއް ދެއްވާނީ، މިއަހަރުގެ ބަޖެޓާއި ފައިހަމަކުރުމަށްޓަކައި ގެންނަވަންޖެހޭ ޤާނޫނުތައް އެކުލަވާލުމަށްކަމަށް ޕީޕީއެމްގެ ޕާލަމެންޓްރީ ގްރޫޕްގެ ލީޑަރު، އަދި މެޖޯރިޓީ ލީޑަރު އަޙްމަދު ނިހާން ޙުސައިން މަނިކު ވިދާޅުވެއްޖެއެވެ.ރައްޔިތުންގެ މަޖިލީހުގެ މިއަހަރުގެ އައު ދައުރާއެކު އިޤްތިޞާދީ އަދި އިޖްތިމާޢީ ދާއިރާގެ މުހިންމު ބިލްތަކެއް މަޖިލީހަށް ހުށައަޅުއްވާނެކަމަށް ސަރުކާރުން ވިދާޅުވެއެވެ. ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރަށް ހުށައަޅުއްވާނެ ބިލްތަކާއި ގުޅޭ ގޮތުން ވާހަކަ ދައްކަވަމުން ރައްޔިތުންގެ މަޖިލީހުގެ މެޖޯރިޓީ ލީޑަރު، ވިލިމާލެ ދާއިރާގެ މެމްބަރު އަޙްމަދު ނިހާން ޙުސައިން މަނިކު ވިދާޅުވީީ، މިއަހަރުގެ ފުރަތަމަ ދައުރުގައި އިޤްތިޞާދީ އަދި އިޖްތިމާޢީ ދާއިރާގެ މުހިންމު ބިލްތައް ތައްޔާރުކުރުމުގެ މަސައްކަތް ކުރިއަށްދާކަމަށާއި، މީގެ އިތުރުންވެސް ވަރަށް މުހިންމު އައު ޤާނޫނުތައް މިފެށޭ ދައުރުގެ ތެރޭގައި އަންނާނެކަމަށެވެ. އަދި މިދިޔަ އަހަރު ރައްޔިތުންގެ މަޖިލީހުގައި ނުނިމި ހުރި ބިލްތައް ނިންމުމަށްވެސް މަސައްކަތް ކުރައްވާނެކަމަށް ނިހާން ވިދާޅުވިއެވެ. 18 ވަނަ ރައްޔިތުންގެ މަޖިލީހުގެ 3 ދައުރުގައި، ސަރުކާރުގެ ފަރާތުން ހުށައެޅުއްވި 64 ބިލެއް ފާސްކުރައްވާފައިވާކަން ފާހަގަކުރައްވާ ނިހާން ވިދާޅުވީ، މިދިޔަ އަހަރުވެސް ރައްޔިތުންނަށް ބޮޑެތި ލުއިފަސޭހަ، އަދި އުންމީދީ ބިލްތަކެއް ނިންމަވާ ދީފައިވާކަމަށެވެ. އޭގެ ތެރޭގައި ޚާއްސަ އިޤްތިޞާދީ ސަރަހައްދުތައް ކަނޑައެޅުމުގެ ބިލާއި، ބޮޑެތި އިންވެސްޓްކުރާ ފަރާތްތަކަށް ބިން މިލްކުކުރެވޭ ގޮތަށް ޤާނޫނު އަސާސީއަށް ގެންނެވި އިޞްލާޙު ނިހާން ފާހަގަކުރެއްވިއެވެ. ނިހާން ވިދާޅުވީ، ޖިނާއީ އިޖްރާއަތު އިތުރަށް ހަރުދަނާ ކުރުމާ ގުޅުންހުރި ބިލްތަކާއި، މަދަނީ އިޖްރާއަތުގެ ބިލްތައް ތައްޔާރުކުރުމުގެ މަސައްކަތްވެސް ކުރިއަށްދާކަމަށެވެ. އެހެންކަމުން މި ފެށޭ ދައުރުގައި މުހިންމު އެތައް ބިލްތަކެއް ފާސްކުރެވޭނެކަމުގެ އުންމީދު އެބައޮތްކަމަށް ނިހާން ވިދާޅުވިއެވެ.މިދިޔަ އަހަރު ރައްޔިތުންގެ މަޖިލީހަށް 157 މައްސަލައެއް ހުށައަޅާފައިވާއިރު އޭގެ ތެރެއިން 149 މައްސަލައެއް ނިންމަވާފައިވެއެވެ. މިދިޔަ އަހަރު ޖަލްސާތައް ނިންމަވާލެއްވިއިރު ނުނިމި ތަޅުމުގައި އޮތީ 8 ބިލެކެވެ. ރައްޔިތުންގެ މަޖިލިސް މިއަހަރަށް ހުޅުވާ ޖަލްސާ އޮންނާނީ އަންނަ ފެބުރުއަރީ މަހުގެ 4 ވަނަ ދުވަހުއެވެ.